ഹോട്ടലില് ഭക്ഷണം കഴിച്ച ശേഷം നല്കിയത്, എത്ര വേണമെങ്കിലും എഴുതിയെടുത്തോളൂ എന്നും പറഞ്ഞു ബ്ലാങ്ക് ചെക്ക്! ഒടുവില് കേസും പുക്കാറും!
തൃശൂര് പുഴയ്ക്കലിലെ ഒരു ഹോട്ടലിനു മുന്നില് കാര് നിര്ത്തി കയറിവന്ന യുവാവ് ഓര്ഡര് ചെയ്തവയെല്ലാം ഹോട്ടലുകാര് നല്കുമ്പോള് അവര് ഇങ്ങനൊരു ട്വിസ്റ്റ് ഉണ്ടാകുമെന്ന് പ്രതീക്ഷിച്ചില്ല. മൂക്കുമുട്ടെ തിന്ന യുവാവിന്റെ കൈയ്യില് ബില്ലെത്തിച്ചപ്പോള് കൊടുക്കാന് കൈയില് കാശില്ല! പക്ഷേ പെട്ടെന്നു തന്നെ അയാള് അതിനു പരിഹാരവും കണ്ടെത്തി.
കാറില് നിന്നും ചെക്കുബുക്കെടുത്തു കൊണ്ടുവന്നു ഒപ്പിട്ടു നല്കി. എത്ര വേണമെങ്കിലും പണം എഴുതിയെടുത്തോളൂ എന്നും പറഞ്ഞു. ഹോട്ടലുകാര് അമ്പരപ്പിലായി. എന്നാല് അവിടെ ചായകുടിക്കുകയായിരുന്ന പോലീസുകാരനു സംഭവത്തില് ഒരു പന്തികേടുതോന്നി.
യുവാവ് വന്ന കാര് അപ്പോഴാണ് പോലീസുകാരന് ശ്രദ്ധിച്ചത്. അതോടെ പോലീസുകാരനു കാര്യമെല്ലാം മനസിലായി. ഇതു മോഷണം പോയ കാറാണെന്ന് അദ്ദേഹം തിരിച്ചറിഞ്ഞു. പോലീസുകാരുടെ ഗ്രൂപ്പിലൂടെ ഇതുസംബന്ധിച്ച മെസേജ് നേരത്തെ ലഭിച്ചിരുന്നതാണ്.
പിന്നെയെല്ലാം പെട്ടെന്നായിരുന്നു. മോഷ്ടാവിനെ കാര് സഹിതം പേരാമംഗലം സ്റ്റേഷനിലെത്തിച്ചു. തുടര്ന്ന് കേസ് മെഡിക്കല് കോളജ് പോലീസിനു കൈമാറി. തൃശൂര് മെഡിക്കല് കോളജ് ആശുപത്രിയ്ക്കു മുന്നില് നിര്ത്തിയിട്ടിരുന്ന കാര് തട്ടിയെടുത്ത് മുങ്ങുകയായിരുന്നു യുവാവ്. നഗരത്തിലടക്കം 22 കിലോമീറ്ററുകള് സഞ്ചരിച്ചശേഷം വൈകുന്നേരത്തോടെ ആയിരുന്നു പുഴയ്ക്കലിലെ ഹോട്ടലില് ഭക്ഷണം കഴിക്കാനെത്തിയത്. ഹോട്ടലുകാര്ക്ക് നല്കിയത്, കാറിലുണ്ടായിരുന്ന ചെക്ക്ബുക്കിലെ ലീഫ് ആയിരുന്നു.
പിടിയിലായ യുവാവ് മാനസികാസ്വാസ്ഥ്യം പ്രകടിപ്പിച്ചിരുന്നു. തനിക്കെതിരേയല്ല കേസെടുക്കേണ്ടതെന്നും കാറില് താക്കോല് വച്ചിട്ടു പോയ ഉടമക്കെതിരേയാണ് കേസെടുക്കേണ്ടതെന്നും യുവാവ് പോലീസിനോടു പറഞ്ഞു. യുവാവിന്റെ ബന്ധുക്കളെ വിവരമറിയിച്ച ശേഷം പിന്നീട് കേസ് രജിസ്റ്റര് ചെയ്തു.
https://www.facebook.com/Malayalivartha