കര്‍ണാടകയിലെ കലബുര്‍ഗിയില്‍ കൊറോണ ബാധിച്ചു മരിച്ചയാളുമായി അടുത്തിടപഴകിയ മെഡിക്കല്‍ വിദ്യാര്‍ഥിനി തൃശൂര്‍ ജനറല്‍ ആശുപത്രിയിലെ ഐസൊലേഷനില്‍. മലയാളി മെഡിക്കല്‍ വിദ്യാര്‍ഥിനിക്ക് നേരിയ രോഗലക്ഷണങ്ങള്‍ കണ്ടതിനെ തുടര്‍ന്നാണു ഐസൊലേഷനിലാക്കിയത്. ശനിയാഴ്ച അര്‍ധരാത്രിയാണ് വിദ്യാര്‍ഥിനി അടക്കം 11 പേര്‍ തൃശൂരിലെത്തിയത്. കോവിഡ്-19 ബാധിച്ച 19 പേരാണ് നിലവില്‍ സംസ്ഥാനത്തു ചികിത്സയിലുള്ളത്. 7677 പേര്‍ നിരീക്ഷണത്തിലുണ്ട്. ഇതില്‍ 7375 പേര്‍ വീടുകളിലും 302 പേര്‍ ആശുപത്രികളിലുമാണ് നിരീക്ഷണത്തിലുള്ളത്.
ശനിയാഴ്ച ആശുപത്രിയില്‍ പ്രവേശിപ്പിക്കപ്പെട്ടവരുടെ എണ്ണം 106 ആണ്. 1897 സാന്പിളുകള്‍ പരിശോധനയ്ക്ക് അയച്ചതില്‍ 1345 പേര്‍ക്ക് രോഗബാധയില്ലെന്ന് സ്ഥിരീകരിച്ചിട്ടുണ്ട്. അതേസമയം, രോഗം സ്ഥിരീകരിച്ച ഇറ്റാലിയന്‍ പൗരന്റെ സഞ്ചാരവഴികളും സന്പര്‍ക്ക വലയങ്ങളും കണ്ടെത്തുന്നതു ദുഷ്‌കരമായി തുടരുന്ന സാഹചര്യത്തില്‍ തലസ്ഥാനജില്ലയില്‍ കര്‍ശന നിയന്ത്രണം ഏര്‍പ്പെടുത്തി. വിമാനത്താവളങ്ങളിലും ട്രെയിനുകളിലും റോഡ് വഴിയുള്ള വാഹനങ്ങളിലും ആളുകളെ പരിശോധിക്കാന്‍ നടപടി തുടങ്ങി.
ആരോഗ്യ പ്രവര്‍ത്തകര്‍ക്കും വോളന്റിയര്‍മാര്‍ക്കും ഒപ്പം പോലീസിന്റെയും പങ്കാളിത്തതോടെയുള്ള സ്‌ക്വാഡുകളാണ് ഇതിനായി രൂപീകരിച്ചിട്ടുള്ളത്. വിമാനത്താവളങ്ങളിലെത്തുന്ന മുഴുവന്‍ യാത്രക്കാരെയും പരിശോധിക്കാന്‍ സംവിധാനം ഏര്‍പ്പെടുത്തി. പരിശോധന ശക്തിപ്പെടുത്തുന്നതിന്റെ ഭാഗമായി വിമാനത്താവളങ്ങളില്‍ എസ്പിയുടെ നേതൃത്വത്തിലുള്ള പോലീസ് സംഘത്തെ നിയോഗിക്കും.