കോണ്ഗ്രസിനെയും ഇന്ത്യ മുന്നണിയെയും കടന്നാക്രമിച്ച് പ്രധാനമന്ത്രി നരേന്ദ്ര മോദി....
സര്ക്കാരുണ്ടാക്കി പണം കവരുകയാണ് കോണ്ഗ്രസിന്റെയും ഇന്ത്യ മുന്നണിയുടെയും ലക്ഷ്യമെന്നും എന്ഡിഎ മുന്നണി കഴിഞ്ഞ പത്ത് വര്ഷങ്ങളായി ജനങ്ങള് അനുഭവിക്കുന്ന പ്രശ്നങ്ങള്ക്ക് പരിഹാരം കാണാനാണ് ശ്രമിക്കുന്നതെന്നും പ്രധാനമന്ത്രി പറഞ്ഞു. കോലാപൂരില് സംഘടിപ്പിച്ച തിരഞ്ഞെടുപ്പ് പ്രചാരണ പരിപാടിയില് സംസാരിക്കുന്നതിനിടെയാണ് ഇന്ത്യ മുന്നണിക്കെതിരെ നരേന്ദ്ര മോദി രൂക്ഷവിമര്ശനം ഉന്നയിച്ചത്.
'രാജ്യത്തെ യുവാക്കളുടെയും സ്ത്രീകളുടെയും ക്ഷേമത്തിലാണ് എന്ഡിഎ മുന്നണി ശ്രദ്ധ കേന്ദ്രീകരിക്കുന്നത്. രാജ്യത്തെ ബിസിനസുകള് പ്രോത്സാഹിപ്പിക്കുന്നതിനായി എന്ഡിഎ ആത്മനിര്ഭര് സംരഭങ്ങള് ആരംഭിച്ചു. യുവാക്കള്ക്ക് അവസരങ്ങള് ഒരുക്കുന്നതിനായി സ്റ്റാര്ട്ടപ്പുകള് ആരംഭിച്ചു'- പ്രധാനമന്ത്രി പറഞ്ഞു. മഹാരാഷ്ട്രയുടെ ഫുട്ബോള് കേന്ദ്രമാണ് കോലാപൂര്. ഫുട്ബോള് ടെര്മിനോളജിയില് സംസാരിക്കുകയാണെങ്കില് രണ്ടാം ഘട്ട തിരഞ്ഞെടുപ്പ് ഇന്നലെ അവസാനിച്ചതോടെ ബിജെപി-എന്ഡിഎ മുന്നണി 2-0 ലീഡ് ചെയ്തുകൊണ്ടിരിക്കുകയാണെന്ന് മോദി പറഞ്ഞു. ഇന്ത്യ മുന്നണി ദേശവിരുദ്ധ അജണ്ടകള്ക്കാണ് പ്രധാന്യം നല്കുന്നതെന്നും പ്രധാനമന്ത്രി കൂട്ടിച്ചേര്ത്തു.
'ഇന്ത്യ മുന്നണി രാജ്യത്ത് അധികാരത്തില് വന്നാല് പൗരത്വഭേദഗതി റദ്ദാക്കുമെന്നാണ് പറയുന്നത്. മൂന്നക്ക സീറ്റ് തികയ്ക്കാന് പാട് പെടുന്ന ഇന്ത്യ മുന്നണി എങ്ങനെയാണ് സര്ക്കാരുണ്ടാക്കുന്നത്. പ്രതിപക്ഷ സഖ്യം രാജ്യത്ത് പുതിയൊരു ഫോര്മുല കൂടി സൃഷ്ടിക്കുകയാണ്. ഒരു വര്ഷത്തില് ഒരു പ്രധാനമന്ത്രി. അതായത് അഞ്ച് വര്ഷത്തേക്ക് അഞ്ച് പ്രധാനമന്ത്രി. കോണ്ഗ്രസും ഇന്ത്യ മുന്നണിയും കര്ണാടകയിലും തമിഴ്നാട്ടിലും മറ്റും പ്രസംഗിച്ച് നടക്കുന്നത് ദക്ഷിണേന്ത്യയെ പ്രത്യേക രാഷ്ട്രമാക്കുമെന്നാണ്. ഛത്രപതി ശിവജിയുടെ നാടിന് അത് അംഗീകരിക്കാന് സാധിക്കുമോ?' - പ്രധാനമന്ത്രി പറഞ്ഞു.
https://www.facebook.com/Malayalivartha