കൊറോണ പ്രതിരോധത്തിന്റെ ഭാഗമായി സര്ക്കാര് ലോക്ഡൗണ് പ്രഖ്യാപിച്ചതിനെ തുടര്ന്ന് ജോലിക്ക് നില്ക്കുന്ന വീട്ടില് നിന്നും എത്തിയ യുവതിയെ കയ്യൊഴിഞ്ഞ് ഭര്ത്താവ്...
ജോലിക്ക് നില്ക്കുന്ന വീട്ടില് നിന്നും കഴിഞ്ഞ ദിവസമാണ് ആ യുവതി സ്വന്തം വീട്ടിലേക്കു മടങ്ങിയത്. കൊറോണ പ്രതിരോധത്തിന്റെ ഭാഗമായി സര്ക്കാര് ലോക്ഡൗണ് പ്രഖ്യാപിച്ചതിനെ തുടര്ന്നായിരുന്നു ഇത്. എന്നാല്, വീട്ടില് കിട്ടിയത് പ്രതീക്ഷിച്ച സ്വീകരണമല്ല. അകത്തേക്കു കയറാന് ഭര്ത്താവ് സമ്മതിച്ചില്ല. 'കൊറോണയെല്ലാം പോയിട്ട് വന്നാല് മതി'യെന്നായിരുന്നു നിലപാട്. ഭര്ത്താവിന്റെ ചീത്ത ഭയന്ന് ബന്ധുക്കളും അയല്വീട്ടുകാരും കൈയൊഴിഞ്ഞതോടെ ആ യുവതി പെരുവഴിയിലായി. ഒടുവില് പോലീസിന്റെ ഇടപെടലിലാണ് മറ്റൊരു സ്ഥലത്ത് താമസസൗകര്യം ഒരുങ്ങിയത്.
ആ യുവതിയുടേത് ഒറ്റപ്പെട്ട സംഭവമല്ലെന്ന് പോലീസ് അധികൃതര് പറയുന്നു. കൊച്ചിയിലെ ഒരു സ്ഥാപനത്തില് ജോലിചെയ്യുന്ന പെണ്കുട്ടിയോട് വീട്ടിലേക്ക് വരേണ്ടെന്ന് വിളിച്ചുപറഞ്ഞത് സ്വന്തം അച്ഛനും അമ്മയുമാണ്. പോലീസ് ഇവരെ വിളിച്ചു സംസാരിച്ചെങ്കിലും പേടിയാണെന്നായിരുന്നു മറുപടി. ജോലിചെയ്യുന്ന സ്ഥാപനം ഒടുവില് താമസസൗകര്യം ഒരുക്കി. 'കൊറോണ വരുമോ എന്ന ഭീതിയിലാണ് പലരും ഇതെല്ലാം ചെയ്യുന്നത്. ഇത്തരം സാഹചര്യങ്ങളില് നിയമത്തിന്റെ അധികാരം പ്രയോഗിച്ചു അവരെ വീടുകളില് പ്രവേശിപ്പിക്കുന്നത് ഗുണംചെയ്യില്ല. അതിനാല് മറ്റു താമസസൗകര്യങ്ങള് ഒരുക്കുകയാണ് ചെയ്യുന്നത്' -മിനിയുടെ പരാതി പരിഹരിച്ച പോലീസ് ഉദ്യോഗസ്ഥന് പറഞ്ഞു.
ജോലിസ്ഥലത്തുനിന്ന് മടങ്ങിയെത്തുന്ന സ്ത്രീകള്ക്ക് വീട്ടുകാരുള്പ്പെടെ പ്രവേശനം നിഷേധിക്കുന്നതായി ഏറെ പരാതികള് ഉയരുന്നുണ്ടെന്നു വനിതാ ശിശു വികസന വകുപ്പ് അധികൃതരും പറയുന്നു. ഇത്തരത്തില് താമസം നിഷേധിക്കപ്പെടുന്നവരെ പുനരധിവസിപ്പിക്കാന് സര്ക്കാര്തലത്തില് സൗകര്യം ഒരുക്കിയിട്ടുണ്ടെന്നും അവര് പറഞ്ഞു. ഒഴിഞ്ഞുകിടക്കുന്ന ഹോസ്റ്റലുകളും മറ്റുമാണ് ഇതിനായി ഉപയോഗിക്കുന്നത്.
അതേസമയം, കേരളത്തില് ആദ്യത്തെ കൊറോണ മരണം കൊച്ചിയില് റിപ്പോര്ട്ട് ചെയ്തു. അറുപത്തൊമ്പതുകാരനായ എറണാകുളം മട്ടാഞ്ചേരി ചുള്ളിക്കല് സ്വദേശിയാണ് മരിച്ചത്. കളമശ്ശേരി മെഡിക്കല് കോളേജ് ആശുപത്രിയിലെ വെന്റിലേറ്ററില് ചികിത്സയിലിരിക്കെയാണ് മരണം. ദുബായില്നിന്ന് ഇദ്ദേഹം എത്തിയത് മാര്ച്ച് 16-നാണ്. കടുത്ത ന്യുമോണിയ ലക്ഷണങ്ങളെ തുടര്ന്ന് 22-ന് ഐസൊലേഷന് വാര്ഡിലേക്ക് മാറ്റി. ഹൃദ്രോഗത്തിനും ഉയര്ന്ന രക്തസമ്മര്ദത്തിനും ചികിത്സയിലായിരുന്ന ഇദ്ദേഹം നേരത്തേ ബൈപ്പാസ് ശസ്ത്രക്രിയയ്ക്കു വിധേയനായിരുന്നു. രാവിലെ എട്ടു മണിയോടെയായിരുന്നു മരണമെന്ന് എറണാകുളം മെഡിക്കല് കോളജ് നോഡല് ഓഫിസര് വാര്ത്താക്കുറിപ്പില് വ്യക്തമാക്കി.
ഇയാളുടെ ഭാര്യയും എയര്പോര്ട്ടില് നിന്ന് വീട്ടിലേയക്ക് കൊണ്ടുവന്ന ടാക്സി ഡ്രൈവറും കോവിഡ് 19 രോഗബാധിതരാണ്. ഇവര് ദുബായില്നിന്ന് എത്തിയ വിമാനത്തിലെ 40 പേരും നിരീക്ഷണത്തിലാണ്. വിമാനത്താവളത്തിലെ ജീവനക്കാരെയും ഇവര് താമസിച്ചിരുന്ന ഫ്ളാറ്റില് ഉണ്ടായിരുന്ന എല്ലാവരെയും നിരീക്ഷണത്തിലാക്കിയിട്ടുണ്ട്.
https://www.facebook.com/Malayalivartha
