നെല്ലിയാമ്പതി തോട്ടം മേഖലയിലെ ലോക്ക്ഡൗണ് ഇളവ്; 55 % പേര് ജോലിക്കെത്തി
കോവിഡ് 19 രോഗവ്യാപനം തടയാന് സര്ക്കാര് പ്രഖ്യാപിച്ച ലോക്ഡൗണില് തോട്ടം മേഖലയ്ക്ക് ഇളവ് അനുവദിച്ചപ്പോള് സ്ഥിരം തൊഴിലാളികളില് 55 % പേരും ഇന്നലെ ജോലിക്കെത്തി. അതേസമയം സര്ക്കാര് നിയന്ത്രണത്തിലുള്ള കെഫ്ഡിസിയുടെ (കേരള ഫോറസ്റ്റ് ഡവലപ്മെന്റ് കോര്പറേഷന്) എസ്റ്റേറ്റുകള് ഇന്നലെ പ്രവര്ത്തിച്ചില്ല.
പ്രധാനപ്പെട്ട തോട്ടങ്ങളായ എ.വി.ടി എസ്റ്റേറ്റിലെ 423 തൊഴിലാളികളും പോബ്സണ് എസ്റ്റേറ്റിലെ 223 പേരും ചന്ദ്രാമല എസ്റ്റേറ്റിലെ 185 പേരും പൂത്തുണ്ട് എസ്റ്റേറ്റിലെ 15 പേരും പുല്ലാല എസ്റ്റേറ്റിലെ 11 പേരും മറ്റ് ഏതാനും എസ്റ്റേറ്റുകളിലെ 50 പേരും ജോലിക്കെത്തിയെന്നാണു കണക്ക്. അങ്ങനെ നെല്ലിയാമ്പതി തോട്ടങ്ങളില് ആകെ ജോലിചെയ്യുന്ന 1650 പേരില് 900 പേര് ഇന്നലെ ജോലിക്കെത്തിയെന്നാണു കണക്ക്.
ലോക്ഡൗണ് കാലത്ത് സര്ക്കാര് സഹായവും സ്വകാര്യ എസ്റ്റേറ്റുകളുടെ സഹായവും ലഭിച്ചതിനാല് പട്ടിണിയില്ലാതെ 15 ദിവസം കഴിച്ചുകൂട്ടാനായെങ്കിലും മറ്റ് ചെലവുകളെല്ലാം മുടങ്ങിക്കിടക്കുകയായിരുന്നു. പ്രധാനമായും തേയില കൊളുന്ത് നുള്ളിയെടുക്കുന്ന ജോലിയാണ് ഇന്നലെ തുടങ്ങിയത്. യഥാസമയം നുള്ളിയെടുക്കാന് കഴിയാതെ പോയതോടെ തേയില കൊളുന്ത് മൂത്ത് പോയത് എസ്റ്റേറ്റുകള്ക്കു നഷ്ടം വരുത്തിയിരുന്നു. എ.വി.ടി തേയില ഫാക്ടറിയും പോബ്സ് ഗ്രൂപ്പ് ഫാക്ടറിയും ഇന്നലെ തുറന്നവയില് ഉള്പ്പെടുന്നു.
കോവിഡ് 19 രോഗവ്യാപനം തടയാനുള്ള നിബന്ധനകള് പാലിച്ചാണു തൊഴിലാളികളുടെ ജോലി. സാമൂഹിക അകലം പാലിച്ചും മുഖാവരണം ധരിച്ചുമായിരുന്നു തൊഴില്. തേയില ശേഖരണവും കാപ്പിത്തോട്ടത്തില് ജലസേചനവും ഫാക്ടറിയിലെ ഉല്പാദനവും ഉള്പ്പെടെ അടിയന്തര സ്വഭാവമുള്ള തൊഴിലുകള് മാത്രമേ ചെയ്യാന് അനുവാദമുള്ളൂ. ഇന്ത്യാ-ശ്രീലങ്ക കരാര് പ്രകാരം ശ്രീലങ്കന് അഭയാര്ഥികളെ സംരക്ഷിക്കാന് കൂടി ലക്ഷ്യമിട്ട് 30 വര്ഷം മുന്പ് ആരംഭിച്ചതാണ് പകുതിപ്പാലത്തെ കെഎഫ്ഡിസിയുടെ നിയന്ത്രണത്തിലുള്ള എസ്റ്റേറ്റ്.
പിന്നീട് സര്ക്കാര് ഏറ്റെടുത്ത റോസറി എസ്റ്റേറ്റും, മീരാഫ്ലോഴ്സ്, പോത്തുമല, ബിയാട്രിസ് എന്നീ എസ്റ്റേറ്റുകളും കെഎഫ്ഡിസിയുടെ മേല്നോട്ടത്തില് നടന്നുവരികയാണ്. എന്നാല് മുന്നൂറിലധികം തൊഴിലാളികളുള്ള ഈ എസ്റ്റേറ്റുകള് ഇന്നലെ പ്രവര്ത്തിച്ചില്ല. വറുതിയിലായ തൊഴിലാളികള്ക്ക് ആശ്വാസം നല്കാന് വനംവകുപ്പ് നടപടിയില്ല. ലോക്ഡൗണ് പ്രഖ്യാപിച്ചതോടെ അടച്ചിട്ട തോട്ടങ്ങളില് അത്യാവശ്യമായി ചെയ്യേണ്ട ജോലികളൊന്നും ഇല്ലെന്നാണ് അധികൃതര് പറയുന്നത്.
https://www.facebook.com/Malayalivartha