കോവിഡിന്റെ മറവില്‍ സര്‍ക്കാര്‍ ജീവനക്കാരുടെ പെന്‍ഷന്‍ പ്രായം വര്‍ധിപ്പിക്കുന്നതിനെ കുറിച്ച് ആലോചന സജീവമാകുന്നു.. മാര്‍ച്ച് 31നും ഏപ്രില്‍ 30 നും വിരമിച്ച ജീവനക്കാര്‍ക്ക് വിരമിക്കല്‍ ആനുകൂല്യം നല്‍കാന്‍ പണം കണ്ടെത്താനാവാത്ത സാഹചര്യത്തിലാണ് പെന്‍ഷന്‍ പ്രായം 57 ആക്കാന്‍ സര്‍ക്കാര്‍ ഗൗരവമായി ആലോചിക്കുന്നത്.

മദ്യത്തിന് 35 ശതമാനം വിലകൂട്ടിയതിനും ബസ് ചാര്‍ജ് വര്‍ധിപ്പിച്ചതിനും പിന്നാലെ പെന്‍ഷന്‍ പ്രായം കൂട്ടാനാണ് ആലോചന. തമിഴ്‌നാട്ടില്‍ പെന്‍ഷന്‍ പ്രായം 59 ആക്കിയത് ഒരു മാതൃകയായി സര്‍ക്കാരിന് മുന്നിലുണ്ട്.

കോവിഡ് പ്രതിരോധിക്കാന്‍ ഒരു മാസത്തെ ശമ്പളം നല്‍കിയതിന്റെ പേരില്‍ പിണങ്ങി നില്‍ക്കുന്ന സര്‍ക്കാര്‍ ജീവനക്കാരെ കൈയിലെടുക്കാന്‍ പുതിയ തീരുമാനം വഴി കഴിയുമെന്ന് ധനവകുപ്പ് കരുതുന്നു. ധനമന്ത്രിയുടെ താതപര്യ പ്രകാരമാണ് ഇത്തരമൊരു നീക്കം നടക്കുന്നത്. പക്ഷേ മുഖ്യമന്ത്രിക്ക് ഇതിനോട് യോജിപ്പില്ലെന്നാണ് വിവരം. അതേ സമയംഇന്നത്തെ സാഹചര്യത്തില്‍ പെന്‍ഷന്‍ പ്രായം വര്‍ധിപ്പിക്കാതെ മുന്നോട്ടു പോകാന്‍ കഴിയില്ലെന്ന വ്യക്തമായ സന്ദേശം ധനമന്ത്രി മുഖ്യമന്ത്രിക്ക് നല്‍കിയിട്ടുണ്ട്.

നേരത്തെയും ധനമന്ത്രി ഇത്തരമൊരു കാഴ്ചപ്പാടിലാണ് മുന്നോട്ടു പോയിരുന്നത്. കഴിഞ്ഞ ബജറ്റില്‍ പെന്‍ഷന്‍ പ്രായം വര്‍ധിപ്പിക്കണമെന്ന നിര്‍ദ്ദേശം അദ്ദേഹം സമര്‍പ്പിച്ചിരുന്നെങ്കിലും മുഖ്യമന്ത്രി അംഗീകരിച്ചില്ല.

2018 ല്‍ പ്രളയം വന്നപ്പോള്‍ പെന്‍ഷന്‍ പ്രായം വര്‍ധിപ്പിക്കണമെന്ന ആശയം മുന്നോട്ടുവച്ചത് സര്‍ക്കാര്‍ ജീവനക്കാര്‍ ആയിരുന്നു .എന്നാല്‍ സാലറി ചലഞ്ചിനോട് ജീവനക്കാര്‍ സഹകരിക്കാതെ വന്നപ്പോള്‍ നിര്‍ദ്ദേശം മാറ്റി വച്ചു.

സര്‍ക്കാര്‍ ജീവനക്കാരുടെ സംഘടനകള്‍ തന്നെയാണ് ഇപ്പോള്‍ ഇക്കാര്യം സര്‍ക്കാരിന് മുന്നില്‍ സമര്‍പ്പിച്ചിരിക്കുന്നത്. ഇടത് സംഘടനാ നേതാക്കള്‍ പെന്‍ഷന്‍ പ്രായം വര്‍ധിപ്പിക്കുമെന്ന പ്രചരണം നടത്തുന്നുണ്ട്. ഒരു മാസത്തെ ശമ്പളം നല്‍കിയ സ്വന്തം അണികളെ തൃപ്തിപ്പെടുത്താനുള്ള നീക്കം കൂടിയാണ് ഇത് . പെന്‍ഷന്‍ പ്രായം വര്‍ധിപ്പിക്കുന്ന കാര്യത്തില്‍ ഇടത്-വലത് സംഘടനകള്‍ക്ക് ഒരേ അഭിപ്രായമാണുള്ളത്.

നേരത്തെ യുഡിഎഫ് സര്‍ക്കാരിന്റെ കാലത്ത് പെന്‍ഷന്‍ പ്രായം വര്‍ധിപ്പിക്കാന്‍ തീരുമാനിച്ചിരുന്നു. സര്‍ക്കാര്‍ ജീവനക്കാരുടെ പിന്തുണയോടെയായിരുന്നു ഇത്. പെന്‍ഷന്‍ പ്രായം 58 ആക്കാനായിരുന്നു നീക്കം.

കേരള അഡ്മിനിസ്‌ട്രേറ്റീവ് സര്‍വീസ് നടപ്പിലാക്കാന്‍ തീരുമാനിച്ചതിലുള്ള വിഷമവും ജീവനകാര്‍ക്കുണ്ട്. സര്‍ക്കാര്‍ ജീവനക്കാര്‍ ഇടഞ്ഞു നില്‍ക്കുകയാണെങ്കില്‍ തെരഞ്ഞടുപ്പില്‍ ബുദ്ധിമുട്ടുണ്ടാകുമെന്ന് സര്‍ക്കാരിനറിയാം. സര്‍ക്കാര്‍ ജീവനക്കാരാണ് എക്കാലവും ഇടതിന്റെ വോട്ടു ബാങ്ക്.

കെ എ എസ് നടപ്പിലാക്കുമ്പോള്‍ അതിന് മറുമരുന്നായി പെന്‍ഷന്‍ പ്രായം വര്‍ധിപ്പിക്കാന്‍ നേരത്തെ തന്നെ സര്‍ക്കാര്‍ ആലോചിച്ചിരുന്നു. എന്നാല്‍ അത്തരം താത്പര്യങ്ങളിലൊക്കെ വിള്ളല്‍ വീഴ്ത്തുന്ന സംഭവങ്ങളാണ് ഇപ്പോള്‍ ഉണ്ടായിരിക്കുന്നത്, എന്നിരുന്നാലും കോവിഡിനെ അതിജീവിക്കണമെങ്കില്‍ സര്‍ക്കാര്‍ ജീവനക്കാരുടെ പെന്‍ഷന്‍ പ്രായം വര്‍ധിപ്പിക്കേണ്ട അവസ്ഥയിലാണ് സര്‍ക്കാര്‍. അങ്ങനെ ചെയ്തില്ലെങ്കില്‍ പെന്‍ഷന്‍ കാരണം ഉണ്ടാകുന്ന സാമ്പത്തിക ബാധ്യത സര്‍ക്കാരിന് നേരിടാനാവില്ല.