കോവിഡ് കാലത്ത് ന്യൂഡല്ഹിയില് നിന്നു തിരിച്ച ആദ്യ രാജധാനി സൂപ്പര് ഫാസ്റ്റ് സ്പെഷല് ട്രെയിന് തിരുവനന്തപുരത്ത് എത്തി... കോഴിക്കോട് ഇറങ്ങിയ ആറു പേര്ക്ക് രോഗലക്ഷണം, സ്റ്റേഷനില് നിന്നു വീടുകളിലേക്കു കൊണ്ടുപോകാന് ഡ്രൈവര് മാത്രമുള്ള വാഹനങ്ങള് അനുവദിച്ചു, ഡ്രൈവര് ഹോം ക്വാറന്റീന് സ്വീകരിക്കണം, റെയില്വേ സ്റ്റേഷനില് നിന്നു വിവിധ സ്ഥലങ്ങളിലേക്കു കെഎസ്ആര്ടിസി സര്വീസ് ഏര്പ്പെടുത്തി
കോവിഡ് കാലത്ത് ന്യൂഡല്ഹിയില് നിന്നു തിരിച്ച ആദ്യ രാജധാനി സൂപ്പര് ഫാസ്റ്റ് സ്പെഷല് ട്രെയിന് (02432) തിരുവനന്തപുരത്തെത്തി. പുലര്ച്ചെ അഞ്ചരയോടെയാണ് ട്രെയിന് തലസ്ഥാനത്ത് എത്തിയത്. 602 പേരാണ് തിരുവനന്തപുരത്ത് ഇറങ്ങിയത്. സംസ്ഥാനത്തെ ആദ്യ സ്റ്റോപ്പായ കോഴിക്കോട് റെയില്വേ സ്റ്റേഷനില് രാത്രി 10 മണിക്ക് ട്രെയിന് എത്തി. 216 യാത്രക്കാര് കോഴിക്കോടും രണ്ടാമത്തെ സ്റ്റോപ്പായ എറണാകുളത്ത് 269 പേരുമാണ് ഇറങ്ങിയത് .
പുലര്ച്ചെ 1.40നാണ് ട്രെയിന് എറണാകുളം സൗത്ത് ജംങ്ഷനില് എത്തിയത്. ഒരു എസി ഫസ്റ്റ് ക്ലാസ്, 5 സെക്കന്ഡ് എസി, 11 തേര്ഡ് എസി കോച്ചുകളിലായി 1100 യാത്രക്കാരാണ് ട്രെയിനില് ഉണ്ടായിരുന്നത്.. കോഴിക്കോട് ഇറങ്ങിയ ആറു പേര്ക്ക് കോവിഡ് രോഗലക്ഷണം കണ്ടതിനെ തുടര്ന്ന് മെഡിക്കല് കോളജിലേക്ക് മാറ്റിയിരുന്നു .കോഴിക്കോട് ഉള്പ്പെടെയുള്ള സ്റ്റേഷനുകളില് യാത്രക്കാരുടെ വിശദാംശങ്ങള് പരിശോധിക്കാന് കൃത്യമായ ക്രമീകരണങ്ങള് ഒരുക്കിയിരുന്നു.
ജില്ലാ അടിസ്ഥാനത്തില് ഹെല്പ് ഡെസ്കുകളില് ആരോഗ്യ, പൊലീസ് വകുപ്പുകളിലെ ജീവനക്കാര് രേഖകള് പരിശോധിച്ചു. വൈദ്യപരിശോധനയ്ക്കു ശേഷം രോഗലക്ഷണം ഇല്ലാത്തവര്ക്ക് 14 ദിവസത്തെ നിര്ബന്ധിത ഹോം ക്വാറന്റീന് അനുവദിച്ചു. ഹോം ക്വാറന്റീന് പാലിക്കാനാകാത്തവര്ക്ക് ഇന്സ്റ്റിറ്റിയൂഷനല് ക്വാറന്റീന് സൗകര്യമാണ് ഒരുക്കിയത്. രോഗലക്ഷണമുള്ളവരെ തുടര്പരിശോധനകള്ക്കു വിധേയരാക്കി ആവശ്യമെങ്കില് ചികിത്സകേന്ദ്രത്തിലേക്കു കൊണ്ടുപോകാനും ആരോഗ്യവകുപ്പ് ജീവനക്കാര് സ്റ്റേഷനുകളില് സൗകര്യമൊരുക്കി. എല്ലാ യാത്രക്കാരുടെയും ലഗേജ് അണുമുക്തമാക്കാനും സൗകര്യമൊരുക്കി.
സ്റ്റേഷനില് നിന്നു വീടുകളിലേക്കു കൊണ്ടുപോകാന് ഡ്രൈവര് മാത്രമുള്ള വാഹനങ്ങള് അനുവദിച്ചു. ഡ്രൈവര് ഹോം ക്വാറന്റീന് സ്വീകരിക്കണം. റെയില്വേ സ്റ്റേഷനില് നിന്നു വിവിധ സ്ഥലങ്ങളിലേക്കു കെഎസ്ആര്ടിസി സര്വീസ് ഏര്പ്പെടുത്തി. യാത്രക്കാരെ കൂട്ടിക്കൊണ്ടുപോകാന് റെയില്വേ സ്റ്റേഷനില് വരുന്ന വാഹനങ്ങള് പാര്ക്ക് ചെയ്യുന്ന സ്ഥലത്തേക്കും ആവശ്യാനുസരണം കെഎസ്ആര്ടിസി സര്വീസ് ഉറപ്പാക്കി.
കോവിഡ്-19 ജാഗ്രതാ പോര്ട്ടലില് പാസിന് അപേക്ഷിക്കാതെ വരുന്ന യാത്രക്കാര് 14 ദിവസം നിര്ബന്ധിത ഇന്സ്റ്റിറ്റിയൂഷനല് ക്വാറന്റീനില് പോകേണ്ടിവരുമെന്നു സര്ക്കാര് നേരത്തെ വ്യക്തമാക്കിയിരുന്നു. സ്റ്റേഷനുകളില് അകത്തേക്കു പ്രവേശിക്കാനും പുറത്തേക്കു പോകാനും വെവ്വേറെ വഴികളാണ് ഒരുക്കിയത്. തിരുവനന്തപുരത്തു പ്ലാറ്റ്ഫോം നമ്പര് 2, 3 എന്നിവയാണ് സ്പെഷല് ട്രെയിനുകള്ക്കായി മാറ്റി വച്ചത്. ഒന്നാം പ്ലാറ്റ്ഫോമുകളില് യാത്രക്കാരുടെ പരിശോധനയ്ക്കും മറ്റുമായി 5 താല്ക്കാലിക കൗണ്ടറുകള് ക്രമീകരിച്ചു.
https://www.facebook.com/Malayalivartha