കേരളം ചെറുകിട വ്യവസായങ്ങള്‍ക്കു സ്വന്തം പാക്കേജ് പ്രഖ്യാപിച്ചു. മൊത്തം 3,434 കോടി രൂപയുടെ സഹായമാണു ലഭ്യമാക്കുക. കേന്ദ്ര പാക്കേജിനു പിന്നാലെയാണ് ഇത്. നിലവില്‍ പ്രവര്‍ത്തിക്കുന്ന സൂക്ഷ്മ-ചെറുകിട-ഇടത്തരം സംരംഭങ്ങള്‍ക്ക് (എംഎസ്എംഇ) നല്‍കുന്ന അധിക വായ്പയ്ക്ക് മാര്‍ജിന്‍ മണി സഹായവും പലിശ ഇളവും അനുവദിക്കും.

സൂക്ഷ്മ-ചെറുകിട-ഇടത്തരം സംരംഭങ്ങള്‍ക്ക് മൂലധനത്തിനു പ്രത്യേക വായ്പയും എംഎസ്എംഇകളില്‍പ്പെട്ട ഉത്പാദന വ്യവസായങ്ങള്‍ക്ക് പലിശസബ്‌സിഡിയും അനുവദിക്കും. വൈവിധ്യവല്‍ക്കരണത്തിനും വികസനത്തിനുമായ വായ്പയുടെ പലിശയ്ക്ക് 6 മാസത്തേക്ക് 6% കിഴിവ്. കെഎസ്‌ഐഡിസിയും കിന്‍ഫ്രയും വായ്പാ കുടിശിക ഒറ്റത്തവണ തീര്‍പ്പാക്കും. സംരംഭങ്ങള്‍ക്കു വായ്പ പലിശ തിരിച്ചടവിന് 6 മാസം നീട്ടി നല്‍കും. വ്യവസായവകുപ്പിനു കീഴിലെ സ്റ്റാന്‍ഡേര്‍ഡ് ഡിസൈന്‍ ഫാക്ടറികളില്‍ 3 മാസം വാടക ഒഴിവാക്കും.

കെഎസ്‌ഐഡിസിയുടെ വായ്പ ലഭിച്ചിട്ടുള്ള വ്യവസായങ്ങള്‍ക്കു പ്രവര്‍ത്തന മൂലധനത്തിനും ആസ്തി സൃഷ്ടിക്കുന്നതിനും പ്രത്യേക വായ്പ. കെഎസ്‌ഐഡിസിയുടെ എല്ലാ ഓപ്പറേറ്റിങ് യൂണിറ്റുകള്‍ക്കും പലിശയും മുതലും തിരിച്ചടയ്ക്കുന്നതിന് 3 മാസ മൊറോട്ടോറിയം. ശേഷം പിഴപ്പലിശയില്ലാതെ വായ്പ തിരിച്ചടയ്ക്കാം. കെഎസ്‌ഐഡിസി വായ്പയെടുത്ത സംരംഭകരുടെ പിഴപ്പലിശ 6 മാസത്തേക്കു ഒഴിവാക്കും.

കെഎസ്‌ഐഡിസിയുടെയും കിന്‍ഫ്രയുടെയും വ്യവസായ പാര്‍ക്കുകളില്‍ സ്ഥലം എടുക്കുന്ന സംരംഭകരുടെ തിരിച്ചടവ് കാലാവധി വര്‍ധിപ്പിക്കും. മുന്‍കൂര്‍ അടയ്‌ക്കേണ്ട പാട്ടപ്രീമിയം കുറയ്ക്കും. എംഎസ്എംഇകള്‍ക്ക് കെഎസ്‌ഐഡിസി 50 ലക്ഷത്തിനു മുകളിലുള്ള വായ്പ അനുവദിക്കും. സ്ത്രീകള്‍ക്കും പട്ടികജാതി പട്ടികവര്‍ഗക്കാര്‍ക്കും യുവസംരംഭകര്‍ക്കും സംരംഭക സഹായപദ്ധതി നടപ്പാക്കും. 25% മാര്‍ജിന്‍ മണി നല്‍കും.