പാമ്പുകളെ കയ്യിലെടുത്ത് കളിക്കുന്നത് ശീലം; നിഗുഡമായി ആ വലിയ ബാഗ്; അഞ്ചലിലെ ഉത്രയുടെ മരണത്തില് വഴിത്തിരിവാകുന്ന വെളിപ്പെടുത്തലുമായി മാതാപിതാക്കളും ബന്ധുക്കളും
അഞ്ചലില് യുവതി പാമ്പു കടിയേറ്റു മരിച്ച സംഭവത്തില് മാതാപിതാക്കളുടെ മൊഴി രേഖപ്പെടുത്തി ക്രൈംബ്രാഞ്ച്. ഉത്രയുടെ (25) മരണത്തില് അന്വേഷണം വേണമെന്ന ആവശ്യവുമായി രക്ഷിതാക്കള് രംഗത്തെത്തിയതിനു ഉത്ര മേയ് ഏഴിനാണ് പാമ്പുകടിയേറ്റു മരിച്ചത്. ഉത്രയുടെ വീട്ടിലെ മുറിയിലായിരുന്നു സംഭവം. ഭര്ത്താവ് സൂരജിനൊപ്പം കിടന്നുറങ്ങുമ്പോഴായിരുന്നു പാമ്പുകടിയേറ്റത്. ഇതിനു പിന്നില് ദൂരൂഹതയുണ്ടെന്നും സംഭവം അന്വേഷിക്കണമെന്നുമാണ് ഉത്രയുടെ മാതാപിതാക്കള് കൊല്ലം റൂറല് എസ്പി ഹരിശങ്കറിന് നല്കിയ പരാതിയില് ആവശ്യപ്പെട്ടത്.
മാത്രമല്ല സൂരജിന്റെ അസ്വാഭാവിക പെരുമാറ്റവും വീട്ടുകാരുമായുണ്ടായ അസ്വാരസ്യങ്ങളും ഉത്രയുടെ മാതാപിതാക്കള് വെളിപ്പെടുത്തുന്നു. ഇതിനു മുമ്പും സൂരജിന്റെ വീട്ടില്വച്ചും നേരത്തേ ഉത്രയ്ക്ക് പാമ്പുകടിയേറ്റിയിരുന്നു. അതിന്റെ ചികിത്സ കഴിഞ്ഞ് തിരികെ സ്വന്തം വീട്ടിലെത്തി വിശ്രമിക്കുമ്പോഴായിരുന്നു രണ്ടാമതും പാമ്പുകടിയേറ്റത്. മരണം സംഭവിച്ചതിന്റെ തലേന്ന് വലിയൊരു ബാഗുമായി സൂരജ് വീട്ടിലെത്തിയെന്നാണു മാതാപിതാക്കള് പറയുന്നത്. ഇതുള്പ്പെടെയുള്ള മാതാപിതാക്കളുടെ ആരോപണങ്ങളെപ്പറ്റി റൂറല് ജില്ലാ ക്രൈംബ്രാഞ്ച് ഡിവൈഎസ്പി എ.അശോകന്റെ നേതൃത്വത്തില് മൊഴിയെടുത്തതായാണു സൂചന. വരുംദിവസങ്ങളിലും ഇത് തുടരും. പ്രാഥമിക റിപ്പോര്ട്ട് വൈകാതെതന്നെ നല്കും. റൂറല് എസ്പി ഹരിശങ്കറിന്റെ മേല്നോട്ടത്തിലാണ് അന്വേഷണം.
ഒരു മാസത്തിനിടെ രണ്ടുതവണയാണ് ഉത്രയ്ക്കു പാമ്പുകടിയേറ്റത്. അടച്ചുറപ്പുള്ള എസി മുറിയില് ഉറങ്ങിക്കിടന്ന ഉത്രയ്ക്ക് പാമ്പുകടിയേറ്റതില് ഭര്ത്താവിനു ബന്ധമുണ്ടെന്നു സംശയിക്കുന്നതായി ഉത്രയുടെ മാതാപിതാക്കള് പറഞ്ഞു. സൂരജിനു പാമ്പുപിടിത്തക്കാരുമായി ബന്ധമുണ്ടെന്ന് ഉത്രയുടെ അച്ഛന് ആരോപിച്ചു. സമഗ്ര അന്വേഷണം ആവശ്യപ്പെട്ട് രക്ഷിതാക്കള് കൊല്ലം റൂറല് എസ്പിക്ക് പരാതി നല്കി.
സ്വത്ത് തട്ടിയെടുക്കാനായി സഹോദരനാണ് ഉത്രയെ അപായപ്പെടുത്തിയതെന്നു കാട്ടി ഭര്ത്താവ് സൂരജും റൂറല് എസ്പിക്കു പരാതി നല്കി. തുടര്ന്നാണ് അന്വേഷണം ജില്ലാ ക്രൈംബ്രാഞ്ചിന് കൈമാറിയത്. സൂരജ് പാമ്പുകളെ കയ്യിലെടുത്ത് കളിപ്പിക്കാറുണ്ടെന്ന് ഉത്രയുടെ ബന്ധുക്കള് അന്വേഷണ സംഘത്തോട് പറഞ്ഞു.
അടൂരിലെ ഭര്തൃവീട്ടില് സംഭവത്തിനു ദിവസങ്ങള്ക്ക് മുന്പ് ഉത്ര പാമ്പിനെ കണ്ടിരുന്നു. സൂരജ് ഇതിനെ കൈകൊണ്ട് പിടിച്ചു ചാക്കിലാക്കിയതായി ഉത്ര പറഞ്ഞിരുന്നതായും ബന്ധുക്കള് പറയുന്നു. പോസ്റ്റുമോര്ട്ടം റിപ്പോര്ട്ട് ഉടന് ലഭിക്കുമെന്നും കൂടുതല് തെളിവുകള് ഇതോടെ ലഭ്യമാകുമെന്നുമാണ് അന്വേഷണ സംഘം കരുതുന്നത്.
കുടുംബവീട്ടിലെ കിടപ്പ് മുറിയില് അബോധാവസ്ഥയില് കണ്ടെത്തിയ ഉത്രയെ സ്വകാര്യ ആശുപത്രിയില് എത്തിച്ചെങ്കിലും രക്ഷിക്കാനായില്ല. നാട്ടുകാര് മുറിക്കുള്ളില് നടത്തിയ തിരച്ചിലിലാണ് പാമ്പിനെ കണ്ടെത്തിയത്. ശീതീകരിച്ച മുറിയുടെ ജനാലയും കതകും അടച്ചിരുന്നിട്ടും പാമ്പ് എങ്ങനെ അകത്തു കയറി എന്നാണ് ഉത്രയുടെ വീട്ടുകാരുടെ സംശയം. മുറിയില് കാണപ്പെട്ട വിഷപ്പാമ്പിനെ തല്ലിക്കൊല്ലുകയും ചെയ്തിരുന്നു. പാമ്പുകടിയേറ്റ ദിവസം ഭര്ത്താവ് സൂരജും മുറിയില് ഉണ്ടായിരുന്നു. എന്നാല് പാമ്പ് കടിച്ചതും ഉത്ര മരിച്ചതും അറിഞ്ഞില്ലെന്നാണു മൊഴി നല്കിയത്. മകള്ക്കു വിവാഹസമ്മാനമായി നല്കിയ സ്വര്ണാഭരണങ്ങള് പലതും കാണാനില്ലെന്നും രക്ഷിതാക്കള് ആരോപിച്ചു. ഉത്ര സൂരജ് ദമ്പതികള്ക്ക് ഒരു വയസുള്ള മകനുണ്ട്.
https://www.facebook.com/Malayalivartha