സ്വകാര്യ കാലാവസ്ഥ നിരീക്ഷണ ഏജന്‍സിയായ സ്‌കൈമെറ്റ്, കേരളത്തില്‍ തെക്കുപടിഞ്ഞാറന്‍ കാലവര്‍ഷം നിശ്ചയിച്ചതിലും നേരത്തെ എത്തിക്കഴിഞ്ഞുവെന്ന് പ്രഖ്യാപിച്ചപ്പോള്‍ അങ്ങനെ പറയാറായിട്ടില്ലെന്നാണ് സര്‍ക്കാര്‍ ഉടമസ്ഥതയിലുള്ള കാലാവസ്ഥാ നിരീക്ഷണ കേന്ദ്രത്തിന്റെ അനുമാനം.

അതേസമയം, കേരളത്തില്‍ കാലവര്‍ഷമെത്തിയെന്ന വാര്‍ത്തകള്‍ ശരിയല്ലെന്നു കേന്ദ്ര ഭൗമശാസ്ത്ര മന്ത്രാലയം സെക്രട്ടറി എം. രാജീവനും പറഞ്ഞു. സമൂഹമാധ്യമങ്ങളില്‍ പ്രചരിക്കുന്നതു വ്യാജവാര്‍ത്തകളാണെന്നും കാലാവസ്ഥാ വകുപ്പ് കൃത്യമായ പ്രവചനങ്ങളാണു നടത്തുന്നതെന്നും അദ്ദേഹം വ്യക്തമാക്കി.

കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം കാലവര്‍ഷം ജൂണ്‍ 5-ന് കേരളത്തിലെത്തുമെന്നാണ്. കൂടുതല്‍ വിശദീകരണങ്ങള്‍ക്കായി നാളെ പത്രസമ്മേളനം വിളിച്ചിട്ടുണ്ടെന്നും അദ്ദേഹം പറഞ്ഞു. ഇന്ത്യന്‍ ഉപഭൂഖണ്ഡത്തില്‍ 4 മാസം നീളുന്ന മഴക്കാലത്തിന്റെ തുടക്കം കേരളത്തില്‍ നിന്നാണ്. രാജ്യത്തു ലഭിക്കുന്ന മഴയില്‍ 75% ഈ കാലത്താണ്.

യെമന്‍ തീരത്തിനു സമീപമുള്ള ന്യൂനമര്‍ദം ശക്തി പ്രാപിക്കുന്നതിനിടെ അറബിക്കടലില്‍ ലക്ഷദ്വീപിനടുത്ത് രണ്ടാമത്തെ ന്യൂനമര്‍ദം ഇന്നു രൂപം കൊള്ളുമെന്ന് കാലാവസ്ഥാ വകുപ്പ്. ഇതിന്റെ ഫലമായി ഇന്ന് ഇടുക്കി, കോട്ടയം, തിരുവനന്തപുരം, കൊല്ലം, പത്തനംതിട്ട, ആലപ്പുഴ, എറണാകുളം ജില്ലകളില്‍ ശക്തമായ മഴയ്ക്കു സാധ്യതയുള്ളതിനാല്‍ യെലോ അലര്‍ട്ട് പ്രഖ്യാപിച്ചു. 5 ദിവസം മഴ തുടരുമെന്നാണ് പ്രവചനം. കേരളതീരത്ത് മത്സ്യബന്ധനം പൂര്‍ണമായി നിരോധിച്ചു.

ശ്രീലങ്കയിലും തെക്കുകിഴക്ക് അറബിക്കടലിലും കാലവര്‍ഷമെത്തി. കേരളത്തില്‍ കാലവര്‍ഷം തുടങ്ങിയെന്ന സ്വകാര്യ കാലാവസ്ഥാസ്ഥാപനങ്ങളുടെ പ്രഖ്യാപനം ശരിയല്ലെന്ന് കേന്ദ്ര കാലാവസ്ഥാകേന്ദ്രം അറിയിച്ചു. ഇടവപ്പാതി നാളെ കേരളത്തിലെത്തുമെന്നാണ് നിഗമനം.

മഴക്കാലത്തിനു മുന്നോടിയായി കേരളത്തിന്റെ അഭ്യര്‍ഥനപ്രകാരം ദേശീയ ദുരന്തപ്രതികരണസേനയുടെ 4 ടീമുകള്‍ ഉടന്‍ എത്തും. ഇടുക്കി, വയനാട്, തൃശൂര്‍, ആലപ്പുഴ ജില്ലകളിലാണ് ഇവരെ വിന്യസിക്കുക. നിലവില്‍ തൃശൂരിലുള്ള സംഘത്തിനു പുറമെയാണ് 4 ടീമുകള്‍. ഒരു ടീമില്‍ 48 പേരുണ്ടാകും.