കീഴ്ത്താടിയില് നീര്ക്കെട്ടുമായി കാട്ടാനക്കുട്ടിയെ അവശനിലയില് കണ്ടെത്തി
പാലക്കാട് വീട്ടിക്കുണ്ട് ഊരിനടുത്ത് ഉദ്ദേശം 6 വയസുള്ള ഒരു കാട്ടാനക്കുട്ടിയെ അവശ നിലയില് കണ്ടെത്തി. കൂട്ടംതെറ്റി തീറ്റയെടുക്കാതെ 2 ദിവസമായി വനാതിര്ത്തിയില് കാണപ്പെട്ട കുട്ടിക്കൊമ്പന് ഇന്നലെയാണ് മനുഷ്യവാസമുള്ളിടത്തേക്ക് എത്തിയത്. പ്രദേശവാസികള് വിവരമറിയിച്ചതിനുസരിച്ച് വനപാലകരും വെറ്റിനറി സര്ജനും സ്ഥലത്തെത്തി.
ഊരിനടുത്ത് നിലയുറപ്പിച്ചിരുന്ന ആനക്കുട്ടി വൈകുന്നേരത്തോടെ കിടപ്പായി. ആനയുടെ കീഴ്ത്താടിയില് നീര്ക്കെട്ടുണ്ട്. വായ്ക്കകത്ത് പുഴുവരിച്ചതായും കാണുന്നുണ്ട്. അഗളി വെറ്റിനറി സര്ജന് ഡോ.നവീന് സ്ഥലത്തെത്തി പരിശോധന നടത്തി. അഗളി റെയ്ഞ്ച് ഫോറസ്റ്റ് ഓഫിസര് കെ.ടി.ഉദയന്റെ നേതൃത്വത്തില് കാവലേര്പ്പെടുത്തി.
അതിനിടെ കോയമ്പത്തൂര് കറുപ്പരായന് ക്ഷേത്രത്തിനു സമീപം വനപ്രദേശത്ത് കുഴഞ്ഞു വീണതിനെ തുടര്ന്ന് ശിരുമുഗ വനമേഖലയില് പെത്തിക്കുട്ടയില് ചികിത്സയില് ആയിരുന്ന എട്ട് വയസുള്ള കൊമ്പന് ചരിഞ്ഞു.
കാലുകള്ക്ക് ഗുരുതരമായി പരുക്കേറ്റ ആനയ്ക്ക് നില്ക്കാന് പ്രയാസമായിരുന്നു. കഴിഞ്ഞ 26-ാം തീയതി മുതല് വെറ്ററിനറി ഡോക്ടര് സുകുമാരന്റെ നേതൃത്വത്തില് നല്കിയ ചികിത്സയെ തുടര്ന്ന് ബുധനാഴ്ച ഏതാനും അടി ദൂരം നടന്നു. എന്നാല് ഇന്നലെ ഉച്ച കഴിഞ്ഞ് ചരിഞ്ഞു.
ഇതോടെ ജില്ലയില് മേട്ടുപ്പാളയം വനപ്രദേശത്ത് കഴിഞ്ഞ 24 മണിക്കൂറിനകം ചരിഞ്ഞ കാട്ടാനകളുടെ എണ്ണം മൂന്നായി. ഇവയില് ഒന്നിനെ കര്ഷകര് വെടിവച്ചു കൊന്നതാണ്.
https://www.facebook.com/Malayalivartha