പീഡനക്കേസില്‍ കുടുക്കുമെന്ന് ഭീഷണിപ്പെടുത്തി വ്യാപാരിയുടെ പണം തട്ടിയ കേസില്‍ അഭിഭാഷകനും സ്ത്രീയും ഉള്‍പ്പെടെ നാലുപേര്‍ അറസ്റ്റിലായി.

കല്ലാര്‍കുട്ടി കത്തിപ്പാറ പഴക്കാളിയില്‍ ലതാദേവി(32), അടിമാലി ബാറിലെ അഭിഭാഷകനായ ചാറ്റുപാറ മറ്റപ്പിള്ളില്‍ ബെന്നി മാത്യു(56), പടിക്കപ്പ് പരിശകല്ല് ചവറ്റുകുഴിയില്‍ ഷൈജന്‍(43), പടിക്കപ്പ് തട്ടായത്ത് ഷെമീര്‍(38) എന്നിവരാണ് പിടിയിലായത്.

ടൗണില്‍ ചെരിപ്പുകട നടത്തിയിരുന്ന വ്യാപാരി വിജയനെ ഭീഷണിപ്പെടുത്തിയാണ് ഇവര്‍ 1.37 ലക്ഷം രൂപ തട്ടിയെടുത്തത്. ജനുവരി 27 ന് കേസിന് ആസ്പദമായ സംഭവങ്ങളുടെ തുടക്കമെന്ന് പൊലീസ് പറഞ്ഞു.

27-ന് ഒന്നാം പ്രതി ലത, വിജയന്റെ വീട്ടിലെത്തി. വിജയന്റെ ബന്ധുവിന്റെ പേരിലുള്ള ഒമ്ബതര സെന്റ് സ്ഥലം വാങ്ങാനെന്ന വ്യാജേനയായിരുന്നു സന്ദര്‍ശനം. സംസാരിക്കുന്നതിനിടെ ലത സൂത്രത്തില്‍ വിജയനൊപ്പമുള്ള ചിത്രങ്ങള്‍ മൊബൈലില്‍ പകര്‍ത്തി.

ഫെബ്രുവരി നാലിന് റിട്ട. ഡിവൈഎസ്പിയാണെന്ന വ്യാജേന വിജയനെ വിളിച്ച ഷൈജന്‍, വീട്ടിലെത്തിയ യുവതിയോട് വിജയന്‍ അപമര്യാദയായി പെരുമാറിയതിന്റെ തെളിവ് കൈവശമുണ്ടെന്നും ഏഴര ലക്ഷം രൂപ തന്നാല്‍ ഒതുക്കിത്തീര്‍ക്കാമെന്നും പറഞ്ഞു.

പണം നല്‍കിയില്ലെങ്കില്‍ പീഡനക്കേസില്‍ കുടുക്കുമെന്നും ഭീഷണിപ്പെടുത്തി. ഭയന്ന വിജയന്‍ 70,000 രൂപ ആദ്യം നല്‍കി. ഷൈജന്‍ പറഞ്ഞതുപ്രകാരം രണ്ടാംപ്രതിയായ ബെന്നിയുടെ അടിമാലി ടൗണിലെ വക്കീല്‍ ഓഫീസിലാണ് പണമെത്തിച്ചത്.

പിന്നീട് പലപ്പോഴായി പ്രതികള്‍ വിജയനെ ഭീഷണിപ്പെടുത്തി ആകെ 1.37 ലക്ഷം രൂപ വാങ്ങിയെടുത്തു. ഫെബ്രുവരി 10-ന് കേസിലെ മറ്റൊരു പ്രതിയായ ഷെമീറിന്റെ വാഹനത്തില്‍ വിജയനെ ബെന്നിയുടെ ഓഫീസില്‍ കൊണ്ടുവന്ന് മൂന്നു ചെക്കിലായി ഏഴുലക്ഷം രൂപ ബലമായി എഴുതിവാങ്ങി. ഭീഷണി തുടര്‍ന്നതോടെ വിജയന്‍ പൊലീസില്‍ പരാതി നല്‍കുകയായിരുന്നു.

ഇതിനിടെ, പതിനാലാം മൈല്‍ സ്വദേശിയെ പീഡനക്കേസില്‍ പെടുത്തുമെന്ന് ഭീഷണിപ്പെടുത്തി 25,000 രൂപ തട്ടിയെടുത്തെന്ന പരാതിയില്‍ മറ്റൊരു കേസും ഇതേപ്രതികള്‍ക്കെതിരേ പൊലീസ് രജിസ്റ്റര്‍ചെയ്തു.

2017 സെപ്റ്റംബര്‍ 18-ന് കല്ലാര്‍കുട്ടിയില്‍ പോസ്റ്റ്മാനെ ഭീഷണിപ്പെടുത്തി എഴുപതിനായിരം രൂപ തട്ടിയെടുത്തത് ലതയും ഷൈജനും ചേര്‍ന്നാണെന്ന് പൊലീസ് വ്യക്തമാക്കി. കൂടുതല്‍ പേര്‍ പ്രതികളുടെ തട്ടിപ്പിന് ഇരയായിട്ടുണ്ടെന്നാണ് സൂചന.