സ്വര്‍ണ്ണക്കടത്തില്‍ എന്‍ ഐ എ യുടെ നീക്കമെല്ലാം അതീവ രഹസ്യമായിരുന്നു. സ്വപ്നയെ പിടിച്ചതും ഒടുവില്‍ റമീസിനെ അര്‍ദ്ധ രാത്രി വീട് വളഞ്ഞു പൊക്കിയതുമെല്ലാം നാടകീയമായാണ്.
പുലര്‍ച്ചെ രണ്ടു മണി. പെരിന്തല്‍മണ്ണ വെട്ടത്തൂരിലെ കെ.ടി.റമീസിന്റെ വീട്. 3 വാഹനങ്ങളിലായെത്തിയ കസ്റ്റംസ് സംഘം കവാടം തുറന്ന് വീടു വളഞ്ഞു. കോളിങ് ബെല്‍ അമര്‍ത്തിയപ്പോള്‍ ആരും വാതില്‍ തുറന്നില്ല. ജനല്‍പാളി തുറന്ന് ആരാണെന്ന് അന്വേഷണം. സംഘം വിവരം പറഞ്ഞു. എതിര്‍പ്പൊന്നും കൂടാതെ റമീസ് പുറത്തുവന്നു. നടപടികള്‍ പൂര്‍ത്തിയാക്കി റമീസുമായി 2.30ന് സംഘം മടങ്ങി.തലേദിവസം വൈകിട്ട് വീട്ടുമുറ്റത്തു റമീസിനെ കണ്ട നാട്ടുകാരന്‍ പോലും പിറ്റേന്ന് രാവിലെ മാധ്യമങ്ങളിലൂടെയാണ് ഇയാള്‍ പിടിയിലായ വിവരമറിയുന്നത്.

കൊച്ചി കസ്റ്റംസ് പ്രിവന്റീവ് അസിസ്റ്റന്റ് കമ്മിഷണര്‍ എന്‍.എസ്.ദേവിന്റെ നേതൃത്വത്തിലായിരുന്നു നീക്കം. പൊലീസ് പോലും വിവരമറിഞ്ഞത് രാവിലെ.രാവിലെ ചാനലുകളെല്ലാം വീടിനു മുന്നില്‍ കുതിച്ചെത്തിയിട്ടും നാട്ടുകാര്‍ അധികമാരും അടുത്തില്ല. നേരത്തേ പലകേസുകളിലും റമീസിന്റെ പേര് കേട്ടിട്ടുള്ളതിനാല്‍ സംഭവത്തില്‍ ഞെട്ടലൊന്നുമില്ലെന്ന് പ്രദേശവാസികളൊരാള്‍ പറഞ്ഞു.

വെട്ടത്തൂരിലെ ഇടത്തരം കുടുംബത്തില്‍ പിറന്ന റമീസ് പഠിച്ചതും വളര്‍ന്നതുമൊക്കെ നാട്ടില്‍ത്തന്നെയാണെന്ന് പ്രദേശവാസികള്‍ പറയുന്നു. പിന്നീടാണ് രാജ്യാന്തര തലത്തിലേക്കുള്ള ഉയര്‍ച്ച. പലപ്പോഴും വില കൂടിയ വാഹനങ്ങളില്‍ യാത്ര ചെയ്യുന്നത് നാട്ടുകാര്‍ കാണാറുണ്ട്. ചിലപ്പോള്‍ അന്വേഷിച്ചാല്‍ വിദേശ വിനോദ സഞ്ചാരത്തിലാണെന്ന മറുപടിയാണ് ലഭിക്കാറുള്ളത്. നാട്ടില്‍ സജീവമായി ഇടപെടാറില്ല.

റമീസിന്റെ അയല്‍വാസികളും നാട്ടുകാരുമായ ചിലര്‍ നേരത്തേ സ്വര്‍ണം കടത്തിയ കേസില്‍ പിടിയിലായിട്ടുണ്ട്. 2015 മാര്‍ച്ച് 20ന് കാര്‍ഗോ വഴി 17.5 കിലോഗ്രാം സ്വര്‍ണം കടത്താന്‍ ശ്രമിച്ചതിന് നാട്ടുകാരനായ ഒരാള്‍ക്കൊപ്പം റമീസിനെയും ഡിആര്‍ഐ പിടികൂടിയിരുന്നു. 2014ല്‍ തിരുവനന്തപുരത്തു നിന്ന് സ്വര്‍ണവുമായി റമീസിന്റെ അയല്‍വാസിയെ പിടിച്ചിരുന്നു. അന്ന് ഇയാളുടെ കൂടെയുണ്ടായിരുന്നെന്ന് സംശയിക്കുന്ന സന്ദീപ് നായരുടെ ഫോണ്‍ രേഖകള്‍ പരിശോധിച്ചപ്പോള്‍ റമീസ് വിളിച്ചതായി കണ്ടെത്തിയിരുന്നു. എന്നാല്‍ ഈ കേസുകളൊന്നും വലിയ രീതിയില്‍ മുന്നോട്ടുപോയില്ല.
അന്തര്‍ദേശീയ ബന്ധമുണ്ടെന്ന് സംശയിക്കുന്ന ഈ കേസിന്റെ അന്വേഷണം എന്‍ ഐ എ ഏറ്റെടുത്തതോടെ രാഷ്ട്രീയ കോളിളക്കത്തിനുപരി ഈ വിഷയത്തിന് പുതിയ മാനം കൈ വന്നിരിക്കുകയാണ്. ഇനിയും എന്‍ ഐ എ വിരിച്ച വലയില്‍ കുടുങ്ങിയ നിരവധി പ്രമുഖരുടെ പേര് വിവരങ്ങള്‍ പുറത്തു വരാനുണ്ട്. വരും ദിവസങ്ങളില്‍ കേരളം പുലരുന്നത് അപ്രതീക്ഷിതമായ പല വാര്‍ത്തകളും കേട്ടുകൊണ്ടാവാം.