സംസ്ഥാന സര്‍ക്കാര്‍ പ്രളയ കാലത്തെ നഷ്ടം വിലയിരുത്താനായി സമാഹരിച്ച പണം സ്വപ്‌നയെപ്പോലുള്ള പേരും കള്ളികള്‍ കമ്മീഷന്‍ അടിച്ചു എന്ന് പറഞ്ഞാല്‍ ഏതു മലയാളിക്കാണ് അരിശം വരാത്തത് .അത്രമാത്രമേ ഇപ്പോള്‍ പ്രതിപക്ഷവും ചെയ്യുന്നുള്ളു .ഭരണപക്ഷം തെറ്റുചെയ്യുമ്പോള്‍ അല്ലെങ്കില്‍ ഗുരുതര വീഴ്ച നടത്തിയിട്ട് ജനങ്ങളുടെ നെഞ്ചത്തേക്ക് കുതിര കയറുമ്പോള്‍ സ്വാഭാവികമായും പ്രതിപക്ഷത്തുള്ള രാഷ്ട്രീയകകഷികള്‍ അവരവരുടേതായ നിലയില്‍ അതിശക്തമായി എതിര്‍ക്കും .

സംസ്ഥാന സര്‍ക്കാരിന്റെ ലൈഫ് മിഷന്‍ പദ്ധതിയുടെ ഭാഗമായി വടക്കാഞ്ചേരിയില്‍ നടക്കുന്ന ഫ്‌ലാറ്റ് നിര്‍മാണത്തിനു പിന്നില്‍ സ്വപ്നയും സരിത്തും വഴി യുഎഇ കോണ്‍സുലേറ്റ് വരെ നീളുന്ന അഴിമതിയുണ്ടെന്ന് ആരോപണം ശക്തമാകുമ്പോള്‍ ,പരസ്പര ബന്ധമില്ലാത്ത ആരോപണങ്ങള്‍ ഉന്നയിച്ചു തടി തപ്പാനാണ് മുഖ്യമന്ത്രിയുടെ ശ്രമം . വിദേശത്തു ഗൂഢാലോചന നടത്തി കേന്ദ്രമറിയാതെ സംസ്ഥാന സര്‍ക്കാര്‍ വിദേശ ഫണ്ട് സ്വീകരിച്ചെന്നും ഇതില്‍ ഒരു കോടി രൂപ സ്വപ്നയ്ക്കു കമ്മിഷന്‍ ലഭിച്ചെന്നും വടക്കാഞ്ചേരി എം എല്‍ എ അനില്‍ അക്കര ഗവര്‍ണര്‍ക്ക് അയച്ച കത്തില്‍ ആരോപിച്ചു. ഈ വിഷയത്തില്‍ ഗവര്‍ണ്ണര്‍ അടിയന്തിരമായി ഇടപെടണം എന്ന വാദമാണ് ഉയര്‍ന്നു കേള്‍ക്കുന്നത് .

ഏതുവിധേയനെയും സംസ്ഥാന സര്‍ക്കാരിനെ കരിവാരിത്തേക്കാനാണ് പ്രതിപക്ഷത്തിന്റെ ശ്രമം എന്ന ആരോപണം മുഖ്യമന്ത്രി ഉന്നയിക്കുമ്പോഴും അഴിമതിയുടെ കഥകള്‍ പുറത്തുവരുബോള്‍ മാധ്യമപ്രവര്‍ത്തകര്‍ക്ക് നേരെ വാളോങ്ങുന്ന തരത്തിലുള്ള സമീപനമാണ് സ്വീകരിക്കുന്നത് . വടക്കാഞ്ചേരിയില്‍ നടക്കുന്ന ഫ്‌ലാറ്റ് നിര്‍മാണവുമായി ബന്ധപ്പെട്ട് കമ്മീഷന്‍ അടിച്ചെടുത്തതായി സ്വപ്ന ഇതിനോടകം തുറന്ന് പറഞ്ഞിട്ടും സര്‍ക്കാരിന് വീഴ്ച പറ്റിയില്ല എന്ന് പറയുന്നത് എത്രമാത്രം ധാര്‍ഷ്ട്യവും ധിക്കാരവും നിറഞ്ഞ സമീപനം ജനങ്ങളോട് വച്ചുപുലര്‍ത്തുന്നതുകൊണ്ടാണെന്നു മനസ്സിലാക്കാവുന്നതേ ഉള്ളു .അതിനു മറുപടി പറയേണ്ടത് അതിനേക്കാള്‍ ശക്തമായ ഭാഷയില്‍ തന്നെയാണ് .അതാണ് ഇപ്പോള്‍ പ്രതിപക്ഷം ചെയ്യുന്നത് .

സ്വപ്നയുടെ സ്വകാര്യ ലോക്കറില്‍ കണ്ടെത്തിയ ഒരു കോടി രൂപ വടക്കാഞ്ചേരിയിലെ ഭാവന നിര്‍മ്മാണ പദ്ധതിയുടെ ഭാഗമാണെന്നു സ്വപ്ന തന്നെ അന്വേഷണ ഉദ്യോഗസ്ഥര്‍ക്കു മൊഴി നല്‍കിയതായാണു വിവരം. അങ്ങനെയെങ്കില്‍ പദ്ധതിക്കായി സ്ഥലം വിട്ടുനല്‍കിയ സംസ്ഥാന സര്‍ക്കാരിനും അഴിമതിയില്‍ പങ്കുണ്ടെന്നും സിബിഐ അന്വേഷിക്കണമെന്നുമാണ് ആവശ്യം.

വിദേശ ഫണ്ടിന്റെ ദുരുപയോഗവും കേന്ദ്ര നയതന്ത്ര മാനദണ്ഡങ്ങളുടെ ലംഘനവും വിശദമായി തന്നെ അന്വേഷിക്കണം. നിര്‍മാണ സ്ഥലത്തെ പരസ്യ ബോര്‍ഡില്‍ കേരള ലൈഫ് മിഷന്‍ പദ്ധതി യുഎഇ കോണ്‍സുലേറ്റ് വഴി എമിറേറ്റ്‌സ് റെഡ് ക്രസന്റ് സ്‌പോണ്‍സര്‍ ചെയ്തതാണെന്നും നിര്‍മാണ ചുമതല 'യുണിടെക്കി'നാണെന്നും വെണ്ടയ്ക്ക വലുപ്പത്തില്‍ എഴുതിയിട്ടുണ്ട്. എന്നിട്ടും ഇതിനു പിന്നില്‍ നടന്ന ക്രമക്കേട് അറിഞ്ഞിട്ടില്ല എന്നാണ് മുഖ്യമന്ത്രി പറയുന്നത് ,അഥവാ അറിഞ്ഞിട്ടും അറിഞ്ഞിട്ടില്ല എന്ന ഭാവമാണ് മുഖ്യമന്ത്രി പറയുന്നത് യുഎഇ ചാരിറ്റി സ്ഥാപനമായ റെഡ് ക്രസന്റിന് ഇന്ത്യയില്‍ നേരിട്ടു പദ്ധതികള്‍ ഏറ്റെടുക്കാന്‍ കഴിയില്ല. ഏറ്റെടുക്കണമെങ്കില്‍ മാതൃ എന്‍ജിഒ ആയ റെഡ് ക്രോസ് വഴി സമീപിക്കണം.ഇതില്‍ തന്നെ വലിയ തട്ടിപ്പ് നടന്നിട്ടുണ്ട് എന്നത് പകലുപോലെ വ്യക്തമാവുകയാണ് .അതിനാല്‍ തന്നെ ഇതിനു തക്കതായ വിശദീകരണം നല്‍കാതെ സംസ്ഥാന മുഖ്യമന്ത്രി പദത്തിലിരിക്കുന്ന പിണറായി വിജയന് ഒഴിഞ്ഞുമാറാന്‍ കഴിയില്ല . റെഡ്‌ക്രോസിന്റെ ഇന്ത്യയിലെ ഭാരവാഹികള്‍ രാഷ്ട്രപതിയും കേന്ദ്ര ആരോഗ്യ മന്ത്രിയുമാണ്.

രാഷ്ട്രപതി ഭവനും കേന്ദ്ര സര്‍ക്കാരും അറിയാതെ എങ്ങനെ യുഎഇ റെഡ് ക്രസന്റ് കേരളത്തില്‍ പണം ചെലവു ചെയ്‌തെന്നും അതിനു കേരള സര്‍ക്കാര്‍ എങ്ങനെ സ്ഥലം വിട്ടു നല്‍കിയെന്നും അന്വേഷിക്കും .ഇതില്‍ ഗുരുതരമായ ആരോപണമാണ് സംസ്ഥാന സര്‍ക്കാര്‍ നേരിടുന്നത് .കേരത്തിലെ ഈ വന്‍തട്ടിപ്പ് പുറത്തുവന്നതോടെ പിണറായും കൂട്ടരും കടുത്ത മാനസിക സമ്മര്‍ദ്ദത്തിലാണ് .