സ്വപ്നത്തേക്കാള്‍ വേഗത്തില്‍... മലയാളികളെ ഞെട്ടിപ്പിച്ച സ്വര്‍ണക്കടത്ത് കേസിലെ അന്വേഷണ സംഘമായ എന്‍ഐഎ ദുബായില്‍ നടത്തിയത് ചടുല നീക്കം; ആരും ചിന്തിക്കുന്നതിന് മുമ്പ് ദുബായിലെത്തി പൊക്കേണ്ടവരെ പൊക്കി ചോദ്യം ചെയ്ത് കൊച്ചുവെളുപ്പാന്‍ കാലത്ത് ദുബായ് വിട്ടു
സ്വപ്ന സുരേഷ് മുഖ്യ പ്രതിയായ സ്വര്‍ണ കള്ളക്കടത്ത് കേസ് അന്വേഷിക്കാന്‍ ദേശീയ അന്വേഷണ ഏജന്‍സിയായ എന്‍ഐഎ ദുബായിലേക്ക് തിരിച്ചപ്പോള്‍ മോഹന്‍ലാലിന്റെ അക്കരെയക്കരെയക്കരെ എന്ന സിനിമയാണ് ഓര്‍മ്മ വരുന്നത്. ശ്രീനിവാസന്റെ സ്‌ക്രിപ്റ്റും പ്രിയദര്‍ശന്റെ സംവിധാനവും മോഹന്‍ലാലിന്റേയും ശ്രീനിവാസന്റേയും അഭിനയവും കൂടിയായപ്പോള്‍ സിഐഡി അന്വേഷണത്തിന്റെ പോക്ക് നമ്മള്‍ കണ്ടതാണ്. സര്‍ക്കാര്‍ ചെലവില്‍ അമേരിക്കയില്‍ അടിച്ച് പൊളിക്കുന്ന സിഐഡികള്‍. സ്വര്‍ണക്കടത്ത് കേസില്‍ അന്വേഷണ സംഘം ദുബായില്‍ പോയപ്പോഴും മലയാളികള്‍ ഈ ചിത്രം ഓര്‍ത്ത് പോയത് സ്വാഭാവികം.
എന്നാല്‍ മലയാളികളെ ഞെട്ടിപ്പിച്ചിരിക്കുകയാണ് ഈ അന്വേഷണ സംഘം. രണ്ടു ദിവസത്തിനകം ദുബായില്‍ എത്തുമെന്ന് ചാനലുകാര്‍ ബ്രേക്കിംഗ് നല്‍കിയപ്പോള്‍ തന്നെ രണ്ട് ദിവസം മുന്നേ എത്തിയതായി വിവരവും വന്നു. മാത്രമല്ല കുറഞ്ഞത് രണ്ടാഴ്ചയെങ്കിലും അന്വേഷണ സംഘം ദുബായില്‍ കറങ്ങുമെന്നാണ് എല്ലാവരും കരുതിയത്. എന്നാല്‍ സകലരേയും ഞെട്ടിച്ച് പുലിമടയില്‍ പോയി പൊക്കേണ്ടവരെ പൊക്കി ചോദ്യം ചെയ്തിട്ട് മൂന്ന് ദിവസം കൊണ്ട് എന്‍ഐഎ തിരികെ മടങ്ങിയിരിക്കുകയാണ്.
പ്രധാനമന്ത്രിയുടെ സുരക്ഷ ഉപദേഷ്ടാവ് അജിത് ഡോവലിന്റെ ശക്തമായ മേല്‍നോട്ടമാണ് എന്‍ഐഎയ്ക്ക് ചടുലമായ ഈ നീക്കം നടത്തി പ്രതികളെ ദുബായില്‍ പോയി ചോദ്യം ചെയ്യാന്‍ കഴിഞ്ഞത്. എന്‍ഐഎ സംഘം ദുബായില്‍ പോകാനായി അനുമതി ചോദിച്ചപ്പോള്‍ തന്നെ അജിത് ഡോവല്‍ യുഎഇയുമായി ബന്ധപ്പെട്ടു. ഇന്ത്യയുമായി ശക്തമായ ബന്ധമുള്ള യുഎഇ അന്വേഷണത്തിന് എല്ലാ പിന്തുണയും നല്‍കി. ഇതോടെയാണ് ആരാരുമറിയാതെ അന്വേഷണ സംഘത്തിന് ദുബായില്‍ പോയി വളരെപ്പെട്ടന്ന് തിരിച്ചു വരാന്‍ കഴിഞ്ഞത്.
വിശ്രമമില്ലാതെ ദുബായില്‍ നടത്തിയ അന്വേഷണത്തില്‍ നിര്‍ണായക വിവരങ്ങളാണ് അന്വേഷണ സംഘത്തിന് ലഭിച്ചത്. രഹസ്യ സ്വഭാവം നിലനിര്‍ത്തിയാണ് സംഘം തങ്ങളുടെ ദൗത്യം പൂര്‍ത്തീകരിച്ചത്. നയതന്ത്ര ബാഗേജ് വഴിയുള്ള സ്വര്‍ണക്കടത്ത് കേസിലെ മൂന്നാം പ്രതിയായ ഫൈസല്‍ ഫരീദിനെ മണിക്കൂറുകളോളം ചോദ്യം ചെയ്തു. കൂടാതെ കേസില്‍ സംശയ നിഴലിലുള്ള പലരേയും ചോദ്യം ചെയ്തതായാണ് അറിവ്. കേസില്‍ വിശദമായ ചോദ്യം ചെയ്യലിന് ഫൈസല്‍ ഫരീദിനെ കൈമാറണമെന്ന് ഇന്ത്യ യുഎഇയോട് ആവശ്യപ്പെട്ടേക്കുമെന്നും റിപ്പോര്‍ട്ടുണ്ട്.
അന്വേഷണം പൂര്‍ത്തിയാക്കിയ ശേഷം അബൂദബിയില്‍ നിന്ന് ഇന്നലെ വെളുപ്പിനാണ് എന്‍ഐഎ സംഘം ഡല്‍ഹിക്ക് തിരിച്ചത്. ദുബായിലും അബൂദബിയിലും മൂന്ന് ദിവസം അവശ്യമായ തെളിവുകള്‍ ശേഖരിച്ചാണ് എന്‍ഐഎ ടീം മടങ്ങിയത്.
ദുബായുമായി ബന്ധപ്പെടുത്തി ലൈഫ് മിഷന്‍ കരാറും ശ്രദ്ധ നേടിയിരുന്നു. സ്വപ്ന സുരേഷിന് ഒരു കോടി കമ്മീഷന്‍ കിട്ടിയത് ഈ വകയാണെന്നും പറയുന്നുണ്ട്. ഇതിനെപ്പറ്റിയും അന്വേഷണ സംഘം അന്വേഷണം നടത്തിയതായാണ് സൂചന. അതേസമയം വടക്കാഞ്ചേരി ലൈഫ് മിഷന്‍ കരാര്‍ കിട്ടിയത് സന്ദീപ് നായര്‍ വഴിയെന്ന് യൂണിടാക്ക് വ്യക്തമാക്കി. സംസ്ഥാന സര്‍ക്കാരുമായോ ഉദ്യോഗസ്ഥരുമോയോ യാതൊരു ചര്‍ച്ചയും നടന്നിട്ടില്ലെന്നും സ്വപ്‌നയായിരുന്നു ഇടനിലക്കാരിയെന്നും കമ്പനി വ്യക്തമാക്കി. 18 കോടിയുടെ കരാറാണ് ഒപ്പിട്ടത്. അതില്‍ പതിനാലര കോടി തങ്ങള്‍ക്കി കിട്ടി. കരാര്‍ ഒപ്പിട്ടതിന് സ്വപ്ന കമ്മിഷന്‍ ആവശ്യപ്പെട്ടെന്നും പറയുന്നു. കരാറിനായി എല്ലാം സ്വപ്‌നയാണ് ചെയ്തത്. തനിക്ക് ഭാഷ അറിയാത്തതിനാല്‍ അറബിയുമായി സംസാരിച്ചത് സ്വപ്‌നയാണ്. കോണ്‍സുലേറ്റിന്റെ അക്കൗണ്ടില്‍ നിന്നാണ് പണം ലഭിച്ചത്. ഇതുസംബന്ധിച്ച മൊഴി താന്‍ എന്‍.ഐ.എക്ക് നല്‍കിയിട്ടുണ്ട്. ഈ പണമാണ് എം.ശിവശങ്കറിന്റെ ചാര്‍ട്ടേഡ് അക്കൗണ്ടന്റിന്റെയും സ്വപ്നയുടെയും പേരിലുള്ള ലോക്കറില്‍ നിന്ന് എന്‍ഐഎ കണ്ടെടുത്തത്.
ദുബായില്‍ അന്വേഷണം ശക്തമാകുമ്പോള്‍ ഇവിടെ നയതന്ത്ര സ്വര്‍ണക്കടത്ത് കേസ് പ്രതി സ്വപ്ന സുരേഷിന്റെ ജാമ്യാപേക്ഷയില്‍ വിധി പറയുന്നത് മാറ്റി വച്ചു. കൊച്ചിയിലെ സാമ്പത്തിക കുറ്റകൃത്യ കോടതിയാണ് വിധി പറയല്‍ മാറ്റിയത്. ദുബായില്‍ പോയ എന്‍ഐഎ സംഘം തിരിച്ചെത്തി വിശകലം നടത്തുന്നതോടെ കാര്യങ്ങള്‍ മണിമണിയായി വ്യക്തമാകും.
"
https://www.facebook.com/Malayalivartha
