വളരെ സീരിയസായി സ്വര്‍ണക്കടത്ത് കേസ് അന്വേഷണം നടത്തുമ്പോഴും അതിനിടയിലെ ചില സാഹചര്യങ്ങള്‍ ചിരിയുളവാക്കുന്നതാണ്. അന്വേഷണ സംഘത്തിന്റെ ലൈറ്റായുള്ള ചോദ്യങ്ങള്‍ക്ക് സ്വപ്നയുള്‍പ്പെടെയുള്ള പ്രതികള്‍ കുഴയ്ക്കുന്ന ഉത്തരങ്ങളാണ് പലപ്പോഴും നല്‍കുന്നത്. ഇത് പൊളിച്ചടുക്കുന്നതാണ് എന്‍ഐഎയുടെ ഡയറക്ടായുള്ള മറുചോദ്യം. ഇതിനിടയില്‍ കോടതിയില്‍ സീരിയസായി നടക്കുന്ന വാദങ്ങള്‍ക്കിടയില്‍പ്പോലും ചിലപ്പോള്‍ ചിരിപൊട്ടുന്ന സാഹചര്യങ്ങളും ഉണ്ടാകാറുണ്ട്. ഇത് കേട്ട് പലപ്പോഴും പ്രതികള്‍ക്ക് പോലും ചിരിയടക്കാന്‍ പ്രയാസമാണ്. അതേസമയം തട്ടത്തിലാണെന്റെ ദു:ഖം എന്നത് പോലെയാണ് സ്വപ്ന സുരേഷ്. കോടതിയ്ക്ക് വെളിയില്‍ തട്ടമില്ലാതെ സ്വപ്നയെ കാണാനാവില്ല. കാറ്റത്ത് ഒന്നു തട്ടം മാറിയാലോ ഞെട്ടിത്തരിച്ചു പോകും. നമ്മള്‍ ചിത്രങ്ങളില്‍ കാണുന്ന പഴയ സ്വപ്നയൊന്നുമല്ല. കരഞ്ഞ് തളര്‍ന്ന് രൂപം പോലും മാറിയ വേറെ ഏതോ ഒരു സ്വപ്നയെപ്പോലെ.

എന്നാല്‍ ഈ കാണുന്ന പഞ്ചപാവമല്ല സ്വപ്നയെന്നാണ് അന്വേഷണ സംഘത്തിന്റെ കണ്ടെത്തല്‍. സ്വപ്നയ്ക്ക് അത്രയും സ്വാധീനം ഉണ്ടെന്നാണ് വിലയിരുത്തല്‍. സ്വപ്‌നയുടെ ജാമ്യാപേക്ഷയെ എതിര്‍ത്തുള്ള കസ്റ്റംസിന്റെ വാദത്തിലാണ് സ്വപ്നയുടെ ഉന്നത ബന്ധം ചുരുളഴിയുന്നത്. സരിത്ത് പിടിയിലായതിന് പിന്നാലെ ഒളിവില്‍ പോകാനും സ്വപ്‌ന തന്റെ സ്വാധീനം ഉപയോഗിച്ചതായാണ് കസ്റ്റംസ് കണ്ടെത്തിയിരിക്കുന്നത്. അതിര്‍ത്തി കടക്കാന്‍ പോലും സ്വപ്‌ന ഉന്നതങ്ങളിലെ തന്റെ സ്വാധീനം ഉപയോഗപ്പെടുത്തി.

കോണ്‍സുലേറ്റ് ഉദ്യോഗസ്ഥ എന്ന നിലയില്‍ ഭരണത്തില്‍ സ്വാധീനം ഉണ്ടാകുന്നത് ഒരു സ്വാഭാവികമായ കാാര്യമാണെന്നും സ്വര്‍ണ്ണക്കടത്തിന് ഒത്താശ ചെയ്‌തെന്ന് കുറ്റത്തിന് ഒരുമാസമായിട്ടും കസ്റ്റംസിന് തെളിവ് കണ്ടെത്താനായിട്ടില്ലെന്നുമാണ് സ്വപ്‌നയുടെ അഭിഭാഷകന്‍ വാദിച്ചത്. അതേസമയം സ്വപ്‌നയ്‌ക്കെതിരേ ശക്തമായ തെളിവുണ്ടെന്നാണ് കസ്റ്റംസ് പറയുന്നത്.

പോലീസിലും സ്വപ്‌നയ്ക്ക് വലിയ പിടിപാടുണ്ട്. ഉന്നത ബന്ധം ഉപയോഗപ്പെടുത്തിയാണ് കേരളം കടന്നത്. കോവിഡ് കാലത്തെ കര്‍ശന പരിശോധനകള്‍ നില നില്‍ക്കുമ്പോള്‍ പോലും ചെക്ക് പോസ്റ്റ് കടന്നുപോകാന്‍ കഴിയുമെന്ന് സ്വപ്‌നയ്ക്ക് ഉറപ്പുണ്ടായിരുന്നു.

കുറ്റവാളി അല്ലെങ്കില്‍ പിന്നെ സ്വപ്‌ന എന്തിനാണ് സന്ദീപിനൊപ്പം നാടുവിട്ടത് എന്നും കസ്റ്റംസ് ചോദിച്ചു. സന്ദീപിന്റെ ഭാര്യ സ്വപ്‌നയ്‌ക്കെതിരേ മൊഴി നല്‍കിയിട്ടുണ്ട്. ബാഗില്‍ സ്വര്‍ണ്ണം ഉണ്ടെന്ന് ഉറപ്പുള്ളത് കൊണ്ടാണ് തിരിച്ചയയ്ക്കാന്‍ സ്വപ്‌ന ശ്രമിച്ചത്.

പിന്നീടാണ് എല്ലാവരേയും ചിരിപടര്‍ത്തിക്കൊണ്ടുള്ള എന്‍ഐഎയുടെ ചോദ്യം വന്നത്. രാത്രി ഒരുമണിക്ക് പ്രതികളെല്ലാം ഫ്‌ളാറ്റില്‍ ഒത്തു ചേര്‍ന്നത് പ്രാര്‍ത്ഥിക്കാനോ കോവിഡ് പ്രതിരോധത്തെക്കുറിച്ച് ആലോചിക്കാനോ എന്നാണ് കസ്റ്റംസ് ചോദിച്ചത്. കംസ്റ്റംസിന്റെ ഈ തരത്തിലുള്ള അപ്രതീക്ഷിത വാദം വന്നതോടെ ചിരിപടര്‍ന്നു. പക്ഷെ കോടതിയായതിനാല്‍ ആ ചിരിക്ക് ആയുസ് കുറവായിരുന്നു. കസ്റ്റംസ് സ്വര്‍ണ്ണക്കടത്തിന്റെ ഗൂഡാലോചനയ്ക്ക് വേണ്ടിയായിരുന്നു ഒത്തുകൂടിയതെന്നാണ് കസ്റ്റംസ് വാദിച്ചത്. ഉന്നത ഉദ്യോഗസ്ഥനും ഈ ഫ്‌ളാറ്റില്‍ വന്നിട്ടുണ്ട്. ഇത്തരത്തില്‍ സ്വാധീനമുള്ളവര്‍ ഉള്ളപ്പോള്‍ ജാമ്യം നല്‍കിയാല്‍ കേസിന്റെ അവസ്ഥ പിന്നെന്താകുമെന്നും കസ്റ്റംസ് ചോദിച്ചു. ഇതോടെയാണ് സ്വപ്നയുടെ ജാമ്യം തുലാസിലായത്.

ഇതിന് പിന്നാലെ സ്വപ്നയ്ക്ക് കുരുക്കായി ദുബായില്‍ നിന്നും വിവാഹ സമ്മാനമായി കിട്ടിയെന്ന് പറയുന്ന ഒരു കിലോ സ്വര്‍ണവും മാറിയിരിക്കുകയാണ്. ഇത്രയും സ്വര്‍ണം ഒറ്റത്തവണയായി ഇന്ത്യയിലെത്തിക്കാന്‍ നിയമപരമായി കഴിയില്ല. അതോടൊപ്പം എം ശിവശങ്കറിനും കുരുക്ക് മുറുകുകയാണ്. സ്വപ്‌നയുടെ ഇപ്പോഴത്തെ ഭര്‍ത്താവ് അകന്ന ബന്ധുവാണെന്നും ഇതാണു പരിചയത്തിലേക്ക് എത്തിച്ചതെന്നുമാണ് ശിവശങ്കര്‍ ആദ്യം പറഞ്ഞത്. എന്നാല്‍, മൊെബെല്‍ കോള്‍ ലിസ്റ്റ് പരിശോധിച്ചപ്പോള്‍ സരിത്തുമായി പല തവണ സംസാരിച്ചിരുന്നെന്നും ഒരു മണിക്കൂര്‍വരെ നീണ്ട സംസാരം നടന്നെന്നും അന്വേഷണ സംഘം കണ്ടെത്തി. ഇതോടെയാണ് ശിവശങ്കറുടെ കാര്യവും ഓക്കെയാകുന്നത്.