സംസ്ഥാനത്തെ യഥാര്‍ത്ഥ പ്രതിപക്ഷ നേതാവാണ് രമേഷ് ചെന്നിത്തലയെങ്കിലും ആ റോളില്‍ പലപ്പോഴും തിളങ്ങുന്നത് ബിജെപി അധ്യക്ഷന്‍ കെ. സുരേന്ദ്രനാണ്. ഉച്ചയുറക്ക സമയത്ത് ചെന്നിത്തല പത്ര സമ്മേളനം നടത്തി കാട് കയറുമ്പോള്‍ ഉരുളയ്ക്ക് ഉപ്പേരി പോലെയിട്ട് സര്‍ക്കാരിനേയും ഭരിക്കുന്ന പാര്‍ട്ടിയേയും മുള്‍ മുനയില്‍ നിര്‍ത്തുന്നത് കെ. സുരേന്ദ്രന്‍ തന്നെയാണ്. എന്തിന് ഈ സ്വര്‍ണക്കടത്ത് കേസില്‍ പോലും സുരേന്ദ്രനാണ് ആദ്യം രംഗത്തെത്തിയത്. സുരേന്ദ്രന്‍ പല കാര്യങ്ങളും അവതരിപ്പിച്ച ശേഷമാണ് അത് പിന്തുടര്‍ന്ന് ചെന്നിത്തലയും രംഗത്തെത്തുന്നത്. അതിനാല്‍ തന്നെ ചെന്നിത്തല മണിക്കൂറുകളോളം എടുത്ത് പത്രസമ്മേളനം നടത്തുമ്പോഴും കേള്‍ക്കാന്‍ ആളില്ല. ചാന്‍ റേറ്റ് താഴുന്നതോടെ ചാനലുകാരും ചെന്നിത്തലയെ അവഗണിച്ച മട്ടാണ്.

അതേസമയം കെ. സുരേന്ദ്രന്‍ അതല്ല. ശബരിമല വിഷയത്തിലൂടെ ഉയര്‍ത്തെഴുന്നേറ്റ സുരേന്ദ്രന് വലിയൊരു ജന വിഭാഗത്തിന്റെ വിശ്വാസം നേടിയെടുക്കാന്‍ കഴിഞ്ഞു. സുരേന്ദ്രന്‍ പറയുന്ന പല കാര്യങ്ങളും ജനം ഏറ്റെടുക്കുന്ന അവസ്ഥയാണ്. ഇപ്പൊഴിതാ സ്വര്‍ണ്ണക്കടത്ത് കേസുമായി ബന്ധപ്പെട്ടുള്ള സി.പി.എം ലഘുലേഖയെ പരിഹസിച്ച് കൊണ്ടാണ് സുരേന്ദ്രന്‍ രംഗത്തെത്തിയിരിക്കുന്നത്. പാര്‍ട്ടിയുടെ ലഘുലേഖ ആര് വായിക്കാനാണെന്നും വായിച്ചാല്‍ തന്നെ ആരും അത് വിശ്വസിക്കില്ലെന്നുമാണ് കെ.സുരേന്ദ്രന്‍ തന്റെ ഫേസ്ബുക്ക് പോസ്റ്റിലൂടെ പറയുന്നത്. അതോടൊപ്പം ഇടതുപക്ഷ മാദ്ധ്യമങ്ങളേയും മറ്റും സി.പി.എം ഇനി രക്ഷപെടില്ലെന്നാണ് തനിക്ക് തോന്നുന്നതെന്നും ബി.ജെ.പി അദ്ധ്യക്ഷന്‍ കുറിപ്പിലൂടെ പറയുന്നത്. സര്‍ക്കാരിന്റെ ജനപിന്തുണയില്‍ വിരളിപൂണ്ടവരാണ് സ്വര്‍ണ്ണക്കടത്ത് കേസും മറ്റുമായി സര്‍ക്കാരിനെതിരെ അജണ്ട സൃഷ്ടിക്കുന്നത് എന്നാണ് സി.പി.എം ലഘുലേഖ വിമര്‍ശനം ഉന്നയിക്കുന്നത്. ഇതോടൊപ്പം സര്‍ക്കാരിനെ പ്രതിക്കൂട്ടില്‍ നിര്‍ത്താന്‍ മാദ്ധ്യമങ്ങള്‍ ശ്രമിക്കുന്നു എന്നും ആരോപണമുണ്ട്.

സി.പി.എമ്മിന്റെ ലഘുലേഖ പ്രചാരണം സംബന്ധിച്ച് മാധ്യമങ്ങള്‍ ചര്‍ച്ച ചെയ്യുന്നതു കാണുമ്പോള്‍ സത്യത്തില്‍ ചിരിയാണ് വരുന്നതെന്നാണ് സുരേന്ദ്രന്‍ പറയുന്നത്. ഈ ലഘുലേഖ ആരു വായിക്കാനാണ്? ഇനി വായിച്ചാലും ആരു വിശ്വസിക്കാനാണ്? ജനങ്ങള്‍ നല്ല വിവരവും വിവേകവുമുള്ളവരാണ്. കേരളത്തിലെ ഒട്ടേറെ വീടുകളിലും ഒട്ടുമിക്ക കടകളിലും സ്ഥാപനങ്ങളിലും ദേശാഭിമാനി പത്രം നിര്‍ബന്ധപൂര്‍വ്വം ഇടുന്നുണ്ട്. അതില്‍ ഒരു പത്തു ശതമാനം ആളുകള്‍ പോലും പത്രം കൈ കൊണ്ടു തൊടുക പോലും ചെയ്യുന്നില്ല.പിന്നല്ലേ വായിക്കുന്നത്. വീടുകളില്‍ ഇടുന്നത് പല മുതലാളിമാരും സ്‌പോണ്‍സര്‍ ചെയ്യുന്ന കോപ്പികളാണ്. കടകളിലും സ്ഥാപനങ്ങളിലും ഉടമകളെ ഭീഷണിപ്പെടുത്തി വരിക്കാരാക്കുന്നതാണ്.

സകലമാന സര്‍ക്കാര്‍ പരസ്യങ്ങളും നാട്ടിലുള്ള മുഴുവന്‍ മുതലാളിമാരുടെ പരസ്യവും കിട്ടിയിട്ടും കൈരളി ചാനലിന്റെ ടി.ആര്‍.പി. റേറ്റിംഗ് പത്താം സ്ഥാനത്താണ്. അതും പതിനൊന്നാമത്തെ വേറൊരെണ്ണം ഇല്ലാത്തതുകൊണ്ട്. തലകുത്തി മറിഞ്ഞാലും സി. പി. എം ഇനി രക്ഷപ്പെടുമെന്ന് തോന്നുന്നില്ല.ബംഗാളിലെയും ത്രിപുരയിലേയും ഗതിയാണ് വരാന്‍ പോകുന്നതെന്ന് പിണറായി വിജയന് നന്നായറിയാം. അതുകൊണ്ടാണ് നേരം വെളുക്കുവോളം കക്കുന്നത്. മല്‍സരിച്ച് കക്കുകയാണ് നേതാക്കളെല്ലാം. പഴഞ്ചൊല്ലില്‍ പതിരില്ലെന്നൊക്കെ പറയാം പക്ഷെ പലനാള്‍ കള്ളന്‍ ഒരു നാള്‍ പിടിക്കപ്പെടുമെന്നത് സ്വര്‍ണ്ണക്കള്ളക്കടത്തുകേസ്സിലൂടെ തെളിഞ്ഞിരിക്കുകയാണ്.

നന്ദിഗ്രാമും അഴിമതിയും ബംഗാളിനേയും തൊഴിലില്ലായ്മയും പട്ടിണിയും ത്രിപുരയേയും സ്വാധീനിച്ചെങ്കില്‍ ഇതെല്ലാം ഒരുമിച്ചു വന്നതാണ് കേരളത്തിലെ സി.പി.എമ്മിന്റെ സമ്പൂര്‍ണ്ണ തകര്‍ച്ചയ്ക്കു കാരണമാവാന്‍ പോകുന്നത്. എന്ന് പറഞ്ഞാണ് ഫേസ്ബുക്ക് പോസ്റ്റ് അവസാനിക്കുന്നത്.