ബിജെപി നേതാവും മുന്‍ കേന്ദ്രമന്ത്രിയുമായ അല്‍ഫോന്‍സ് കണ്ണന്താനത്തിന്റെ അമ്മ കോവിഡ് ബാധിച്ച് മരിച്ചതിനു ശേഷം ആ വിവരം മറച്ചുവച്ച് മൃതദേഹം നാട്ടിലെത്തിച്ച് സംസ്‌കരിച്ചെന്ന ആരോപണത്തില്‍ പ്രതികരണവുമായി കണ്ണന്താനം.

അമ്മ മരിക്കുമ്പോള്‍ കോവിഡ് പോസിറ്റീവായിരുന്നില്ലെന്ന് അദ്ദേഹം പറഞ്ഞു. മരിക്കുന്നതിനു മുന്‍പുതന്നെ രോഗം നെഗറ്റീവായിരുന്നു. മരണശേഷം നടത്തിയ പരിശോധനയിലും കോവിഡ് നെഗറ്റീവായിരുന്നു. ഇതേത്തുടര്‍ന്നാണ് മൃതദേഹം നാട്ടില്‍ കൊണ്ടു വരികയും സംസ്‌കരിക്കുകയും ചെയ്തത്. എയിംസില്‍ നടത്തിയ പരിശോധനകളുടെ ഫലം ആര്‍ക്കു വേണമെങ്കിലും പരിശോധിക്കാവുന്നതാണ്.

അതേസമയം കോവിഡ് ബാധിച്ചതിനെ തുടര്‍ന്ന് മാതാവിന്റെ ആന്തരിക അവയവങ്ങള്‍ പലതിനും തകരാറുകള്‍ സംഭവിച്ചിരുന്നു. അതു പൂര്‍വസ്ഥിതിയില്‍ ആകാതിരുന്നതാണ് മരണകാരണം. ഹൃദയാഘാതം വന്നാണ് മരിച്ചതെന്ന് പറയാനാവില്ല. അതുകൊണ്ടു തന്നെ സാങ്കേതികമായി കോവിഡ് ബാധിച്ചതാണ് മരണകാരണം എന്നു പറയുന്നതില്‍ തെറ്റില്ലെന്നും അല്‍ഫോന്‍സ് കണ്ണന്താനം വിശദീകരിച്ചു.

അല്‍ഫോന്‍സ് കണ്ണന്താനത്തിന്റെ മാതാവ് ഡല്‍ഹി എയിംസ് ആശുപത്രിയില്‍ കോവിഡ് ചികിത്സയിലിരിക്കെ കഴിഞ്ഞ ജൂണ്‍ 10-നാണ് മരിച്ചത്. തുടര്‍ന്ന് മൃതദേഹം വിമാനത്തില്‍ കോട്ടയം മണിമലയിലെത്തിച്ച് പൊതുദര്‍ശനത്തിനുവച്ച ശേഷം 14-ന് സംസ്‌കരിക്കുകയായിരുന്നു. ഇത്തരം ആരോപണങ്ങളോട് പ്രതികരിക്കേണ്ടതില്ലെന്ന നിലപാടാണ് ആദ്യം സ്വീകരിച്ചതെങ്കിലും തെറ്റിദ്ധാരണ മൂലം ആളുകള്‍ ഭീതിയിലാകുന്ന സാഹചര്യം ഒഴിവാക്കുന്നതിനാണ് ഇത് വിശദീകരിക്കുന്നതെന്ന് കണ്ണന്താനം പറഞ്ഞു.

ജോമോന്‍ പുത്തന്‍പുരയ്ക്കലാണ് അമ്മ കോവിഡ് ബാധിച്ച് മരിച്ച വിവരം അല്‍ഫോന്‍സ് കണ്ണന്താനം മറച്ചുവച്ചെന്നും പിന്നീട് ഒരു ഘട്ടത്തില്‍ ഇതു വെളിപ്പെടുത്തിയെന്നും ആരോപിച്ച് രംഗത്തു വന്നത്. രാജ്യത്ത് കോവിഡ് പോസിറ്റീവായി മരിക്കുന്നവരുടെ മൃതദേഹം സംസ്‌കരിക്കുന്നതു സംബന്ധിച്ച് കൃത്യമായ പ്രോട്ടോക്കോള്‍ പാലിക്കേണ്ടതുണ്ട്. ഇവിടെ ഇത് പാലിക്കപ്പെട്ടില്ലെന്നാണ് ജോമോന്റെ ആരോപണം.

കോവിഡ് നെഗറ്റീവായ സാഹചര്യത്തില്‍ മൃതദേഹം നാട്ടിലെത്തിച്ച് കേന്ദ്ര സര്‍ക്കാരിന്റെ പ്രോട്ടോക്കോള്‍പാലിച്ച് സംസ്‌കരിക്കുന്നതിന് തടസമില്ലെന്നാണ് വിദഗ്ധരുടെ വിലയിരുത്തല്‍. മൃതദേഹത്തില്‍ നിന്ന് ഒരു കാരണവശാലും കോവിഡ് രോഗാണു പുറത്തേയ്ക്ക് വ്യാപിക്കുന്നതിന് സാഹചര്യമില്ലാത്തതിനാല്‍ പേടിക്കേണ്ടതില്ല. ഇന്ത്യന്‍ ഭരണഘടന അനുശാസിക്കുന്ന മാന്യമായ സംസ്‌കാരത്തിന് അവരും അര്‍ഹരാണ്. അതു കൊണ്ടു തന്നെ കോവിഡ് ബാധിച്ച് മരിക്കുന്നവരോടുള്ള അനാവശ്യ ഭീതി സമൂഹത്തില്‍ ആവശ്യമില്ലെന്നും റിട്ടയര്‍ഡ് ഫൊറന്‍സിക് ഡോക്ടര്‍ ഷെര്‍ലി വാസു പറഞ്ഞു.