ആലുവ എടത്തല പഞ്ചായത്തില് മിന്നല് ചുഴലിക്കാറ്റ്, ഒരു മിനിറ്റ് കൊണ്ട് 50 ലക്ഷത്തോളം രൂപയുടെ നഷ്ടം
ആലുവ എടത്തല പഞ്ചായത്തിലെ മലേപ്പള്ളി ഭാഗത്ത് ഒരു കിലോമീറ്റര് ചുറ്റളവിലുള്ള പ്രദേശത്ത് ഒരു മിനിറ്റ് മാത്രം നീണ്ടുനിന്ന അതിശക്തമായ മിന്നല് ചുഴലിക്കാറ്റ് വന് നാശം വരുത്തിവച്ചു.
50 ലക്ഷത്തോളം രൂപയുടെ നഷ്ടം കണക്കാക്കുന്നു. കക്കടാംപള്ളിമുകള് കോളനിയിലെ ഓമന രാജന്റെ വീട് പൂര്ണമായി തകര്ന്നു. രാജന് ഹൃദയാഘാതത്തെ തുടര്ന്നു മരിച്ചിട്ടു 2 മാസമേ ആയുള്ളൂ. ഭാര്യ ഓമനയും സ്കൂള് വിദ്യാര്ഥികളായ 2 മക്കളുമാണ് ഇവിടെ താമസം. 6 വീടുകള്ക്കു ഭാഗികമായ കേടുപാടുകള് സംഭവിച്ചു.
3, 6, 17 വാര്ഡുകളിലാണ് കാറ്റ് സംഹാര താണ്ഡവമാടിയത്. 14 വൈദ്യുതി പോസ്റ്റുകള് ഒടിഞ്ഞുവീണു. കായ്ഫലമുള്ള 33 ജാതിമരങ്ങളും മറ്റു വൃക്ഷങ്ങളും കടപുഴകി. പുരയിങ്ങളുടെ മതിലുകള് വ്യാപകമായി നിലംപൊത്തി. മലേപ്പള്ളി ഊലിക്കര ഹനീസ് അഹമ്മദിന്റെ വീടിന്റെ പോര്ച്ച് മരം വീണു തകര്ന്നു. ഇവിടെ ഉണ്ടായിരുന്ന 3 കാറുകള് കാറ്റു വീശുന്നതിനു കുറച്ചു മുന്പു മുറ്റത്തേക്കു മാറ്റിയിട്ടതിനാല് കേടുപാടുകള് പറ്റിയില്ല.
കക്കടാംപള്ളിമുകള് കോളനിയില് ചിറങ്ങര അസീസ്, കക്കടാംപള്ളി വിശ്വംഭരന്, ശ്രീധരന്, കാളിക്കുട്ടി എന്നിവരുടെ വീടുകളാണു ഭാഗികമായി തകര്ന്നത്. കാറ്റ് വീശുമ്പോള് വീടുകളിലെല്ലാം ആളുകളുണ്ടായിരുന്നു. ശബ്ദം കേട്ട് ഇറങ്ങിയോടിയതിനാല് രക്ഷപ്പെട്ടു. ഹനീസിന്റെ 25 ജാതിമരങ്ങളും കൊല്ലംകുടി യാക്കൂബിന്റെ 8 ജാതിമരങ്ങളും കടപുഴകി. കായ്ഫലമുള്ളവയാണ് എല്ലാം. രാജീവ് ഗാന്ധി സഹകരണ ഓഡിറ്റോറിയത്തിനു സമീപം ഞാല്ക്കണ്ടത്തില് ലോഹയ്യന്റെ വീടിന്റെ അടുക്കള, മരം വീണു തകര്ന്നു.
മലേപ്പള്ളിയില് നിന്ന് അല്അമീന് കോളജിലേക്കു പോകുന്ന റോഡിലും എസ്ഒഎസ്-കക്കടാംപള്ളിമുകള്-മര്വ റോഡിലും 7 വീതം വൈദ്യുതി പോസ്റ്റുകള് ഒടിഞ്ഞു. ഇവ പുനഃസ്ഥാപിക്കാനുള്ള ജോലികള് നടക്കുന്നു. പഞ്ചായത്ത് അംഗങ്ങളായ കെ.കെ. റഫീഖ്, എം.പി. കുഞ്ഞഹമ്മദ് എന്നിവരാണ് കടപുഴകിയ മരങ്ങള് വെട്ടിനീക്കാനും മറ്റും നേതൃത്വം നല്കിയത്.
ആലുവ മര്ച്ചന്റ്സ് അസോസിയേഷന്റെ ദുരന്ത നിവാരണ സംഘവും സഹായത്തിനെത്തി. അന്വര് സാദത്ത് എംഎല്എ, ബിജെപി ജില്ലാ പ്രസിഡന്റ് എസ്. ജയകൃഷ്ണന്, വൈസ് പ്രസിഡന്റ് എം.എന്. ഗോപി, യുഡിഎഫ് നിയോജകമണ്ഡലം കണ്വീനര് എം.കെ.എ. ലത്തീഫ് തുടങ്ങിയവര് സ്ഥലം സന്ദര്ശിച്ചു. അടിയന്തര നഷ്ടപരിഹാരം അനുവദിക്കണമെന്ന് എംഎല്എ ആവശ്യപ്പെട്ടു.
https://www.facebook.com/Malayalivartha