പ്രതിദിന കോവിഡ് രോഗികള്‍ അയ്യായിരം കടന്നാല്‍ ചികിത്സ സംവിധാനങ്ങള്‍ മതിയാകാതെ വരും. ആഗസ്റ്റ് 19ന് ആകെ രോഗികളുടെ എണ്ണം 50,000 ആയിരുന്നത് ഒരുമാസത്തിനുള്ളില്‍ ലക്ഷത്തിലേക്ക് ഉയര്‍ന്നിരിക്കുകയാണ്. പ്രതിദിന രോഗികളുടെ എണ്ണം 900 കടന്ന തിരുവനന്തപുരവും 500 കടന്ന എറണാകുളവും കടുത്ത ആശങ്കയിലാണ്.
രോഗവ്യാപന നിരക്കില്‍ ചെന്നൈ, മുംബൈ നഗരങ്ങളെ പിന്തള്ളിയാണ് തിരുവനന്തപുരത്തിന്റെ കുതിപ്പ്. രോഗവ്യാപനം രൂക്ഷമാകുന്നത് ആരോഗ്യപ്രവര്‍ത്തകരിലും വെല്ലുവിളിയുയര്‍ത്തിയിട്ടുണ്ട്. ഒരാഴ്ചക്കിടെ 560ഓളം ആരോഗ്യപ്രവര്‍ത്തകരാണ് രോഗബാധിതരായത്. രോഗികളുടെ എണ്ണം ലക്ഷം കടന്നാല്‍ സംവിധാനങ്ങള്‍ അപ്പാടെ പാളുമെന്ന് ആരോഗ്യവകുപ്പ് മുന്നറിയിപ്പ് നല്‍കിയിരുന്നു.

പരിശോധനകളുടെ എണ്ണം 40,000ത്തില്‍ നിന്ന് 75,000ലേക്കെങ്കിലും ഉയര്‍ത്തേണ്ട സമയം കഴിഞ്ഞുവെന്നാണ് ഐ.എം.എ ഉള്‍പ്പെടെ പറയുന്നത്. വെന്റിലേറ്റര്‍, ഐ.സിയു സൗകര്യങ്ങള്‍ കുറവാണെന്നതാണ് പ്രധാന വെല്ലുവിളി. ആരോഗ്യപ്രവര്‍ത്തകരുടെ കുറവും പ്രതിസന്ധിയാണ്. ലക്ഷണങ്ങള്‍ ഉള്ളവരെപോലും വീടുകളില്‍ പാര്‍പ്പിച്ച് ചികിത്സിക്കേണ്ടിവരുമെന്നാണ് ആരോഗ്യവിദഗ്ധര്‍ പറയുന്നത്.

എന്നാല്‍, കോവിഡ് ബാധിതരില്‍ മറ്റു രോഗങ്ങളുള്ളവരെ വീടുകളില്‍ ചികിത്സിക്കാനാവില്ല. പ്രാഥമിക ചികിത്സ കേന്ദ്രങ്ങളില്‍ 980 ജൂനിയര്‍ ഡോക്ടര്‍മാര്‍ ഉള്‍പ്പെടെ ആരോഗ്യപ്രവര്‍ത്തകരുടെ പ്രത്യേകവിഭാഗത്തെ സജ്ജമാക്കിയിട്ടുണ്ട്. എന്നാല്‍, സാലറി ചലഞ്ചുമായി ബന്ധപ്പെട്ട പ്രശ്‌നങ്ങള്‍ നിലനില്‍ക്കുന്നതിനാല്‍ ഇവരില്‍ ഭൂരിഭാഗംപേരും തുടരാന്‍ സാധ്യതയില്ല. അതേസമയം പ്രതിരോധപ്രവര്‍ത്തനങ്ങള്‍ക്കായി രൂപവത്കരിച്ച കോവിഡ് ബ്രിഗേഡ് അംഗങ്ങളെ രംഗത്തിറക്കുമെന്നാണ് പറയുന്നത്.