സിപിഎമ്മും മുന്നണിയും പറഞ്ഞാല് രാജിയെന്ന് ജലീല്; ധാര്മികതാ രാജി വേണ്ടെന്ന് പാര്ട്ടി
ധാര്മികതയുടെ പേരില് രാജി ആവശ്യമില്ലെന്ന നിലപാടില് സിപിഎം ഉറച്ച് നില്ക്കുന്നു. സിപിഎമ്മും മുന്നണിയും പറഞ്ഞാല് രാജിവയ്ക്കാം എന്ന പ്രഖ്യാപനത്തിലേക്കു മന്ത്രി കെ.ടി.ജലീല്. ചോദ്യം ചെയ്യല് വേളയില് മാധ്യമങ്ങളോട് എല്ലാം ഒളിച്ചുവച്ചുവെന്ന ആക്ഷേപം നേരിട്ട മന്ത്രി, ചാനലുകള്ക്ക് അഭിമുഖ പരമ്പര തന്നെ നല്കി അതിനു മറുപടി നല്കി.
കോണ്സുലേറ്റിന്റെ ആവശ്യപ്രകാരം ഖുര്ആന് ഏറ്റുവാങ്ങിയതില് തെറ്റില്ലെന്നു ന്യായീകരിക്കുന്ന ജലീല്, അതു വിതരണം ചെയ്യാനായി സി ആപ്റ്റില് എത്തിച്ച ശേഷമുള്ള കാര്യങ്ങളില് ഉത്തരവാദിത്തമില്ലെന്ന ന്യായമാണ് അഭിമുഖങ്ങളില് സ്വീകരിക്കുന്നത്. അതില് ഒരു പാക്കറ്റ് എന്തിനു പൊട്ടിച്ചുവെന്ന ചോദ്യത്തിനു വ്യക്തമായ ഉത്തരമില്ല. ഇന്നലത്തെ എന്ഐഎ റെയ്ഡ് പോലും മന്ത്രി അറിഞ്ഞിട്ടുമില്ല. സി ആപ്റ്റില് എന്തെങ്കിലും കള്ളക്കളി നടന്നെങ്കില്, ചെയ്തവര് അനുഭവിക്കട്ടെയെന്ന നിലപാടിലാണു വകുപ്പ് മന്ത്രിയായ ജലീല്.
തിങ്കളാഴ്ച മന്ത്രിയോട് ഖുര്ആന്റെ മറവില് സ്വര്ണം കടത്തിയോ എന്ന് ചോദ്യമുണ്ടായപ്പോള് 'അങ്ങനെ സംഭവിച്ചിട്ടുണ്ടാകാം' എന്ന മന്ത്രിയുടെ
മറുപടി വന് വിവാദമായിരുന്നു. ആരോപിച്ചതു മന്ത്രി ശരിവച്ചില്ലേയെന്നു പ്രതിപക്ഷം ചോദ്യം ഉയര്ത്തിയതോടെ ജലീല് ഇന്നലെ ജാഗ്രതയിലായി. ഖുര്ആനൊപ്പം സ്വര്ണം കടത്തിയിരിക്കാന് ഒരു സാധ്യതയുമില്ലെന്നു പിന്നീട് അഭിമുഖത്തില് മന്ത്രി തിരുത്തി. അന്വേഷണത്തില് ഒന്നും സംഭവിക്കില്ലെന്നു നൂറു ശതമാനം ആത്മവിശ്വാസത്തിലാണു താനെന്നും വ്യക്തമാക്കി.
മന്ത്രിയുടെ രാജി അടക്കമുള്ള ആവശ്യങ്ങളുയര്ത്തി സെക്രട്ടേറിയറ്റിനും കലക്ടറേറ്റുകള്ക്കും മുന്നില് ഇന്നലെ യുഡിഎഫ് പ്രതിഷേധിച്ചു. സെക്രട്ടേറിയറ്റിനു മുന്നില് യുവമോര്ച്ചയുടെ 24 മണിക്കൂര് രാപകല് സമരം ഇന്നു രാവിലെ തുടങ്ങും.
വിവാദവും പ്രതിഷേധവും ആറിത്തണുപ്പിക്കാന് രാജി സഹായിക്കുമെങ്കിലും രാഷ്ട്രീയമായി വലിയ പ്രയോജനമൊന്നും അതുണ്ടാക്കുന്നില്ല എന്നാണ് സിപിഎം വിലയിരുത്തല്. അതുകൊണ്ടു തന്നെ ധാര്മികതയുടെ പേരിലുള്ള രാജിയാവശ്യത്തെ ഗൗരവത്തിലെടുക്കുന്നില്ല. പിണറായി മന്ത്രിസഭയില് നേരത്തേ രാജിവച്ച ഇ.പി.ജയരാജനും എ.കെ.ശശീന്ദ്രനും അതേ വകുപ്പുകളുമായി മന്ത്രിസഭയില് തിരികെ എത്തിയിരുന്നു.
കേസില് പ്രതി ചേര്ക്കപ്പെട്ടാല് രാജി വേണോ എന്നതു പോലും മറ്റു ചില കേസുകളുടെ കാര്യം കൂടി കണക്കിലെടുത്തിട്ടേ തീരുമാനിക്കൂ.
സിപിഎം പറഞ്ഞാല് രാജി എന്ന വെല്ലുവിളി ജലീല് ഉയര്ത്തുന്നത് പിന്തുണ ഉറപ്പായതു കൊണ്ടു തന്നെയാണ്. ലീഗ് വിരുദ്ധ രാഷ്ട്രീയത്തിന്റെ പ്രതീകമായി സ്വയം അവതരിപ്പിക്കുന്ന ജലീല്, മലബാറില് പാര്ട്ടിക്ക് താന് അനിവാര്യനാണെന്നു സ്ഥാപിക്കാനാണു ശ്രമിക്കുന്നത്. അതേസമയം, മുസ്ലിം വിഭാഗത്തെ ഇടതുപക്ഷത്തേക്ക് അടുപ്പിക്കാന് സിപിഎം നടത്തിയ മറ്റൊരു പരീക്ഷണം കൂടി പൊളിഞ്ഞെന്നാണ് ലീഗിന്റെ വാദം.
സിപിഎം അന്വേഷണ ഏജന്സികള്ക്കെതിരെ ചില അവിശ്വാസ സൂചനകള് പ്രകടിപ്പിച്ചുവെങ്കിലും എന്ഐഎയെ അവിശ്വസിക്കാന് കാരണമില്ലെന്നാണു ചോദ്യം ചെയ്യലിനു വിധേയനായ മന്ത്രിയുടെ വാക്കുകള്.
https://www.facebook.com/Malayalivartha