സന്ദീപേ എന്നെക്കൂടി... റമീസിന് പുറകേ സന്ദീപ് നായര്‍ക്ക് കസ്റ്റംസ് കേസില്‍ ജാമ്യം ലഭിച്ചതോടെ സ്വപ്ന അതീവ സന്തോഷവതിയായിരുന്നു; തനിക്കും എത്രയും വേഗം ജാമ്യം ലഭിക്കുമെന്ന് പ്രതീക്ഷിച്ചിരുന്ന സ്വപ്ന സുരേഷിനെ തേടി വന്നത് മറ്റൊരു വാര്‍ത്ത; ചോദ്യം ചെയ്യാന്‍ സ്വപ്ന സുരേഷ് വീണ്ടും എന്‍ഐഎ കസ്റ്റഡിയില്‍
സ്വര്‍ണക്കടത്ത് കേസിലെ മുഖ്യ പ്രതികളായ കെ.ടി. റമീസിനും സന്ദീപ് നായര്‍ക്കും ജാമ്യം ലഭിച്ചതോടെ സ്വര്‍ണക്കടത്തു കേസിലെ മുഖ്യപ്രതി സ്വപ്ന സുരേഷും ഏറെ പ്രതീക്ഷിച്ചിരുന്നു. ഇത്രയും പ്രമാദമായ കേസില്‍ ജാമ്യം ലഭിച്ചത് അന്വേഷണ സംഘം അയയുന്നു എന്നായിരുന്നു സ്വപ്ന കരുതിയത്. സ്വപ്നയ്ക്കും റമീസിനും ജാമ്യം ലഭിച്ചതിനാല്‍ ഉടന്‍ തന്നെ തനിക്ക് ജാമ്യം ലഭിക്കുമെന്നാണ് സ്വപ്ന കരുതിയത്. അതനുസരിച്ച് ജാമ്യ നടപടികള്‍ക്കായി വക്കീലിനെ നിയോഗിക്കുകയും ചെയ്തു. എന്നാല്‍ സ്വപ്നയെ തേടിയെത്തിയത് ഒട്ടും പ്രതീക്ഷിക്കാത്ത വാര്‍ത്തയായിരുന്നു.
അപ്രതീക്ഷിത നീക്കമാണ് എന്‍ഐഎ നടത്തിയത്. സ്വപ്ന സുരേഷിനെ വെള്ളിയാഴ്ച വരെ എന്‍ഐഎ കസ്റ്റഡിയില്‍ വാങ്ങിയിരിക്കുകയാണ്. സ്വപ്നയുടെ മൊബൈല്‍ ഫോണുകള്‍, ലാപ്‌ടോപ് എന്നിവയുടെ ഡിജിറ്റല്‍ ഫൊറന്‍സിക് പരിശോധനാ ഫലം എന്‍ഐഎക്കു ലഭിച്ച പശ്ചാത്തലത്തിലാണ് വീണ്ടും ചോദ്യം ചെയ്യുന്നത്.
സ്വപ്നയുടെ ആദ്യമൊഴികളുമായി വൈരുധ്യമുള്ള വിവരങ്ങളാണ് ഇതിലുള്ളത്. മൊബൈല്‍ ഫോണില്‍ നിന്നു സ്വപ്ന മായ്ച്ചുകളഞ്ഞ ഓണ്‍ലൈന്‍ ചാറ്റുകള്‍ അന്വേഷണ സംഘം വീണ്ടെടുത്തിരുന്നു.
അറസ്റ്റ് ചെയ്ത് 60 ദിവസം പൂര്‍ത്തിയായ സാഹചര്യത്തില്‍ സന്ദീപ് നായര്‍ക്കു കസ്റ്റംസ് കേസില്‍ ഇന്നലെ സാമ്പത്തിക കുറ്റവിചാരണക്കോടതി ജാമ്യം അനുവദിച്ചു. കുറ്റപത്രം സമര്‍പ്പിക്കാത്ത സാഹചര്യത്തിലാണു ജാമ്യം. എന്നാല്‍, യുഎപിഎ ചുമത്തി എന്‍ഐഎ കേസ് റജിസ്റ്റര്‍ ചെയ്തിട്ടുള്ളതിനാല്‍ പ്രതി റിമാന്‍ഡില്‍ തുടരും.
നയതന്ത്ര പാഴ്‌സല്‍ സ്വര്‍ണക്കടത്തു കേസില്‍ അറസ്റ്റിലായ പല പ്രതികളും ബെനാമികളാണെന്ന് ആദായ നികുതി വകുപ്പ് ഇന്റലിജന്‍സ് വിഭാഗം കണ്ടെത്തി. പ്രതികളായ സ്വപ്ന സുരേഷ്, പി.എസ്. സരിത്, സന്ദീപ് നായര്‍, കെ.ടി. റമീസ്, ഹംജദ് അലി, ജലാല്‍, മുഹമ്മദ് ഷാഫി, മുഹമ്മദ് അന്‍വര്‍, ഇ. സയീദ് അലവി എന്നിവരെ ജയിലില്‍ ചോദ്യം ചെയ്യാനുള്ള ആദായനികുതി വകുപ്പിന്റെ അപേക്ഷ സാമ്പത്തിക കുറ്റവിചാരണക്കോടതി അനുവദിച്ചു. സ്വര്‍ണക്കടത്തിനു വേണ്ടി പണം മുടക്കിയവരെയും ലാഭവിഹിതം പങ്കിട്ടവരെയും കണ്ടെത്തുകയാണു ലക്ഷ്യം.
അതേസമയം സ്വപ്നയേയും കൂട്ടരേയും പിടികൂടാനായി ആദായ നികുതി വകുപ്പും പുറകില്‍ തന്നെയുണ്ട്. നയതന്ത്ര സ്വര്‍ണക്കടത്തു കേസില്‍ ആദായനികുതി അന്വേഷണ വിഭാഗം പ്രതികളെ ചോദ്യം ചെയ്യുന്നതോടെ സ്വര്‍ണക്കടത്തുമായി ബന്ധപ്പെട്ട കമ്മിഷന്‍ ഇടപാടുകളില്‍ കൂടുതല്‍ വ്യക്തത ലഭിച്ചേക്കും. സ്വപ്നസുരേഷിന്റെ ലോക്കറുകളില്‍ കണ്ടെത്തിയ ഒരു കോടിരൂപ, 1 കിലോഗ്രാം സ്വര്‍ണാഭരണങ്ങള്‍ എന്നിവയുടെ ഉറവിടം വെളിപ്പെടുത്തുന്നതോടെ ലൈഫ് മിഷന്‍, യുഎഇ കോണ്‍സുലേറ്റ് വീസാ സ്റ്റാംപിങ് കേന്ദ്രം എന്നിവയെ മറയാക്കി നടത്തിയ കമ്മിഷന്‍ ഇടപാടുകളും പുറത്തുവരും.
ആദായനികുതി നിയമം, ബെനാമി സ്വത്തുകൈമാറ്റ നിരോധന നിയമം എന്നിവ ചുമത്തിയാണു സ്വര്‍ണക്കടത്തു കേസിലെ പ്രതികളെ ഐടി വിഭാഗം ചോദ്യം ചെയ്യുന്നത്. സ്വര്‍ണക്കടത്തു കേസില്‍ നേരിട്ടുള്ള തെളിവുകളുടെ അഭാവത്തില്‍ എന്‍ഐഎ, കസ്റ്റംസ് എന്നിവര്‍ ചോദ്യം ചെയ്യാതെ ഒഴിവാക്കിയവരെ ബെനാമി നിയമത്തിന്റെ ബലത്തില്‍ ഐടി വിഭാഗത്തിനു ചോദ്യം ചെയ്യാന്‍ കഴിയും. സ്വര്‍ണക്കടത്തിനു പണം മുടക്കിയവര്‍, ലാഭം പങ്കിട്ടവര്‍ എന്നിവരെ കണ്ടെത്തുകയാണ് ഐടി അന്വേഷണ സംഘത്തിന്റെ ലക്ഷ്യം.
റമീസിനും സന്ദീപിനും പുറകേ ജാമ്യം പ്രതീക്ഷിച്ച സ്വപ്ന സുരേഷിന് ജാമ്യം കിട്ടിയില്ല എന്നുമാത്രമല്ല അന്വേഷണം ശക്തമാക്കുകയും ചെയ്തിരിക്കുകയാണ്.
https://www.facebook.com/Malayalivartha
