സര്‍ക്കാര്‍ ജീവനക്കാരുടെ സാലറി കട്ടില്‍ നിര്‍ദേശങ്ങളുമായി സര്‍ക്കാര്‍. ഇക്കാര്യത്തില്‍ മൂന്നു നിര്‍ദേശങ്ങളാണ് പ്രധാനമായും മുന്നോട്ടുവച്ചിരിക്കുന്നത്. ഇതുവരെ മാറ്റിവച്ച ശമ്പളം പണമായി നല്‍കുമെന്നതുള്‍പ്പെടെയുള്ള നിര്‍ദേശമാണ് ഇതിലുള്ളത്. ഇതുസംബന്ധിച്ച് ഇന്ന് അഭിപ്രായം അറിയിക്കാന്‍ സംഘടനകളോട് ആവശ്യപ്പെട്ടിട്ടുണ്ട്.

കഴിഞ്ഞ തവണ മാറ്റിവച്ച ഒരു മാസത്തെ ശമ്ബളം പിഎഫില്‍ ലയിപ്പിക്കാനുള്ള തീരുമാനം പിന്‍വലിക്കും. പകരം പണമായി തുക ജീവനക്കാര്‍ക്ക് നല്‍കാം. ആറ് മാസത്തേക്ക് കൂടി ശമ്ബളം മാറ്റിവയ്ക്കാന്‍ സമ്മതിക്കണമെന്നതാണ് ഒന്നാമത്തേത്. ഓണം അഡ്വാന്‍സ്, പിഎഫില്‍ നിന്നുള്ള വായ്പ എന്നിവയുടെ തിരിച്ചടവിന് ആറ് മാസത്തെ സാവകാശം അനുവദിക്കാം.
ഇവ രണ്ടും അംഗീകരിക്കാനാവില്ലെങ്കില്‍ അടുത്ത മാര്‍ച്ച് വരെ മാസം മൂന്ന് ദിവസത്തെ ശമ്ബളം വീതം മാറ്റിവയ്ക്കാന്‍ സമ്മതിക്കണമെന്നും സര്‍ക്കാര്‍ ആവശ്യപ്പെട്ടു. മുന്നോട്ട് വച്ച നിര്‍ദേശങ്ങളില്‍ മാറ്റിവച്ച ശമ്പളം പണമായി തിരികെ നല്‍കുന്നതിനോട് എല്ലാവരും പൊതുവെ യോജിച്ചു. ഇന്ന് വൈകുന്നേരത്തിനുള്ളില്‍ ഇവയില്‍ ഏത് മാര്‍ഗമാണ് വേണ്ടതെന്ന് തീരുമാനിച്ച് രേഖാമൂലം അറിയിക്കണമെന്ന് സംഘടനകളോട് ധനമന്ത്രി ആവശ്യപ്പെട്ടിട്ടുണ്ട്.