പുതിയ കാലം പുതിയ നിര്‍മാണം എന്ന കാഴ്ചപ്പാടില്‍ ഉന്നത നിലവാരത്തിലുള്ള പുനരുദ്ധാരണ പ്രവൃത്തനങ്ങള്‍ക്കു ശേഷം നിര്‍മാണം പൂര്‍ത്തിയാക്കിയ തരുവണ-നിരവില്‍പുഴ റോഡ് മന്ത്രി ജി. സുധാകരന്‍ നാളെ വിഡിയോ കോണ്‍ഫറന്‍സിലൂടെ നാടിനു സമര്‍പ്പിക്കും.

ഒരു വര്‍ഷമായിരുന്നു പൂര്‍ത്തീകരിക്കേണ്ട കാലാവധി. തരുവണ മുതല്‍ കാഞ്ഞിരങ്ങാട് വരെയുള്ള ഭാഗം നവീകരിക്കാന്‍ 2015 ഡിസംബര്‍ 20-ന് ഭരണാനുമതിയും 2017 ഏപ്രില്‍ 28-ന് സാങ്കേതിക അനുമതിയും ലഭിച്ചു. തുടര്‍ന്ന് നവംബര്‍ 14-ന് കരാര്‍ നടപടികള്‍ പൂര്‍ത്തിയാക്കുകയും 22-ന് കരാറുകാരന് സൈറ്റ് കൈമാറുകയും ചെയ്തു. എന്നാല്‍ പിന്നീട് പണികള്‍ ഇഴയുകയും നിര്‍മാണം പൂര്‍ത്തിയാകാന്‍ ഒന്നര വര്‍ഷം അധിക സമയം എടുക്കുകയും ചെയ്തിരുന്നു.

രണ്ട് ജില്ലകളെ കൂട്ടിയിണക്കുന്ന വടക്കേ വയനാട്ടിലെ തരുവണ-നിരവില്‍പുഴ റോഡ് തകര്‍ന്നിട്ടു വര്‍ഷങ്ങളായിരുന്നു. മാനന്തവാടി - പക്രംതളം റോഡിന്റെ ഭാഗമായ ഈ പാതയ്ക്ക് 15 കിലോമീറ്ററാണ് ദൂരം. താമരശ്ശേരി ചുരത്തില്‍ ഗതാഗത തടസ്സം സംഭവിച്ചാല്‍ കോഴിക്കോട് ഭാഗത്തേക്കു യാത്രയ്ക്കുള്ള ഏക വഴിയാണിത്. പ്രളയത്തില്‍ താമരശ്ശേരി ചുരത്തിലെ ഗതാഗതം നിലച്ച സമയത്തു പൂര്‍ണമായി തകര്‍ന്ന ഈ റോഡിലും യാത്ര അസാധ്യമാവുകയും വയനാട് പൂര്‍ണമായി ഒറ്റപ്പെട്ട സംഭവവും ഉണ്ടായി. പക്രംതളം ചുരം വഴി അയല്‍ ജില്ലകളിലേക്ക് അടക്കം നൂറുകണക്കിന് വാഹനങ്ങള്‍ ദിവസവും കടന്നു പോകുന്ന റോഡ് തകര്‍ന്നതോടെ ദുരിതം ഇവിടെ തുടര്‍ക്കഥയായി.

നാള്‍ക്കുനാള്‍ ദുരിതം ഇരട്ടിച്ചതോടെ പൊറുതിമുട്ടിയ ജനം സമര പരിപാടികളുമായി രംഗത്തിറങ്ങി. മാസങ്ങളോളം തുടര്‍ന്ന ജനകീയ സമരങ്ങളെയും വാര്‍ത്താ പരമ്പരയെയും തുടര്‍ന്നു പ്രശ്‌നം പരിഹരിക്കാന്‍ അധികൃതര്‍ ഇടപെടുകയായിരുന്നു. ഒ.ആര്‍. കേളു എംഎല്‍എ പ്രശ്‌നത്തില്‍ ഇടപെടുകയും പണികള്‍ പൂര്‍ത്തീകരിക്കാന്‍ നേതൃത്വം നല്‍കുകയും ചെയ്തു. തുടര്‍ന്ന് തരുവണ മുതല്‍ കാഞ്ഞിരങ്ങാട് വരെയുള്ള പ്രവൃത്തികള്‍ക്ക് വേഗം കൈവന്നു. ഈ റോഡില്‍ ബാക്കി വരുന്ന നിരവില്‍പുഴ വരെയുള്ള 5 കിലോമീറ്റര്‍ ഭാഗം പുനര്‍ നിര്‍മിക്കാന്‍ കിഫ്ബി 17കോടി രൂപ ഫണ്ട് അനുവദിച്ചതോടെ 15 കിലോമീറ്റര്‍ ദൈര്‍ഘ്യമുള്ള റോഡ് ഉന്നത നിലവാരത്തില്‍ പുനര്‍ നിര്‍മാണം പൂര്‍ത്തിയാക്കി.

ജില്ലയിലെ വിവിധ റോഡുകളുടെ പ്രവൃത്തി പൂര്‍ത്തീകരണ ഉദ്ഘാടനവും പ്രവൃത്തി ഉദ്ഘാടനവും നാളെ മന്ത്രി ജി. സുധാകരന്‍ വിഡിയോ കോണ്‍ഫറന്‍സ് വഴി നിര്‍വഹിക്കും. രണ്ടിടങ്ങളിലായി നടക്കുന്ന ചടങ്ങുകളില്‍ ഒ.ആര്‍. കേളു എംഎല്‍എ അധ്യക്ഷത വഹിക്കും.