സംസ്ഥാനത്ത് പൊലീസിനു ഹെലികോപ്ടര്‍ വാടകക്കെടുത്ത വകയില്‍ സര്‍ക്കാറിന് കോടികളുടെ നഷ്ടമെന്നാണ് വിവരം. എന്നാല്‍, എത്ര രൂപയാണ് വാടക കൊടുത്തതെന്ന് വിവരാവകാശ നിയമപ്രകാരം ആവശ്യപ്പെട്ടിട്ടും പൊലീസ് മറുപടി നല്‍കിയില്ല. സാമ്പത്തിക നിയന്ത്രണങ്ങള്‍ തുടരുന്നതിനിടെ കഴിഞ്ഞ ഫെബ്രുവരിയിലാണ് ഹെലികോപ്ടര്‍ വാടകക്കെടുക്കാന്‍ ധനകാര്യവകുപ്പ് അനുമതി നല്‍കിയത്. ആറ് മാസത്തിനിടെ അഞ്ച് പ്രാവശ്യം മാത്രം പറന്ന ഹെലികോപ്ടറിന് വേണ്ടി വാടക കോടികളാണെന്ന് ചൂണ്ടിക്കാട്ടുന്നു. 18 ശതമാനം ജി.എസ്.ടി കൂടി ഉള്‍പ്പെടുത്തി 1,70,63,000 രൂപ അനുവദിച്ചു. ഒരു മാസം 20 മണിക്കൂര്‍ പറക്കാനാണ് ഈ തുക. പറന്നാലും പറന്നില്ലെങ്കിലും ഈ തുക ഡല്‍ഹി ആസ്ഥാനമായ പവന്‍ ഹാന്‍സ് കമ്പനിക്ക് നല്‍കണമെന്നാണ് കരാര്‍. ആദ്യ ഗഡു നല്‍കിയതിനെതുടര്‍ന്നാണ് മാര്‍ച്ചില്‍ ഹെലികോപ്ടര്‍ എത്തിയത്. തുടര്‍ന്ന് ഏപ്രില്‍മുതല്‍ സെപ്റ്റംബര്‍വരെ വാടക കണക്കാക്കിയാല്‍ 10,23,76,800 രൂപയാണ് വാടക നല്‍കേണ്ടത്. ഇതാണ് കണക്കെങ്കില്‍ ഒരുവര്‍ഷം കൊണ്ട് 20,47,53,600 രൂപ വാടകയിനത്തില്‍ മാത്രം നല്‍കേണ്ടിവരുമെന്ന് ചൂണ്ടിക്കാട്ടുന്നു. ഹെലികോപ്ടര്‍ വന്നശേഷം അഞ്ച് പ്രാവശ്യം മാത്രമാണ് പറന്നത്. വി.ഐ.പി യാത്രക്കും മെഡിക്കല്‍ ആവശ്യങ്ങള്‍ക്കും. പെട്ടിമുടി ഉള്‍പ്പടെ ദുരന്തങ്ങള്‍ ഉണ്ടായപ്പോള്‍ പ്രയോജനം ചെയ്തതുമില്ല. ആദ്യ പരിശീലന പറക്കലില്‍തന്നെ വനമേഖല നിരീക്ഷണം പ്രായോഗികമല്ലെന്ന് തെളിഞ്ഞിരുന്നു.