വളരെ സൗമ്യമായി ചിരിച്ചും കളിച്ചും നടന്നുകൊണ്ടിരുന്ന മുഖ്യമന്ത്രിയുടെ വൈകുന്നേരത്തെ വാര്‍ത്താ സമ്മേളനം സീരിയസായത് സ്വര്‍ണക്കടത്ത് വിഷയം വന്നതോടെയാണ്. സര്‍ക്കാരിനെ പ്രതിരോധത്തിലാക്കാന്‍ പ്രതിപക്ഷം ശ്രമിച്ചപ്പോള്‍ അതിന് ഒത്താശ ചെയ്ത് ചില ചാനലുകാര്‍ രംഗത്തെത്തിയതോടെയാണ് പത്രസമ്മേളനത്തിന്റെ രീതി മാറിയത്. ചോദ്യങ്ങള്‍ ചോദിച്ച് മുഖ്യമന്ത്രിയെ പ്രകോപിപ്പിക്കുന്ന ശൈലിയും ചില ചാനലുകാര്‍ സ്വീകരിച്ചു. മുഖ്യമന്ത്രി ആ ചോദ്യത്തിന് ഉത്തരം നല്‍കിയാലും അതില്‍ കടിച്ച് തൂങ്ങി മറ്റ് പല ചോദ്യങ്ങള്‍ ചോദിച്ചുകൊണ്ടിരിക്കും. ഇന്നലത്തെ പത്രസമ്മേളനത്തിലാണ് മനോരമ ചാനലിലെ റിപ്പോര്‍ട്ടര്‍ നിര്‍ത്താതെ മുഖ്യമന്ത്രിയെ പ്രകോപിപ്പിച്ചത്. അതോടെ മുഖ്യമന്ത്രി റിപ്പോര്‍ട്ടര്‍ക്ക് വേണ്ടത് കൊടുത്തു.

ലൈഫ് മിഷന്‍ അഴിമതിയുമായി ബന്ധപ്പെട്ട് ഉയര്‍ന്ന ആരോപണത്തില്‍ വിജിലന്‍സ് അന്വേഷണത്തിന് ഉത്തരവിട്ടതുമായി ബന്ധപ്പെട്ട ചോദ്യമാണ് വിവാദമായത്. വടക്കാഞ്ചേരി ലൈഫ് മിഷന്‍ പദ്ധതിയില്‍ വിജിലന്‍സ് അന്വേഷണം പ്രഖ്യാപിച്ചത് സി.ബി.ഐ അന്വേഷണ സാദ്ധ്യത തടയാനാണെന്ന ആക്ഷേപമുണ്ടല്ലോ എന്നാണ് മനോരമ ന്യൂസിലെ ദീപു രേവതി ചോദിച്ചത്. ഉരുളയ്ക്ക് ഉപ്പേരി എന്ന പോലെയാണ് മുഖ്യമന്ത്രി മറുപടി പറഞ്ഞത്. തുടര്‍ന്ന് മുഖ്യമന്ത്രിയുടെ കീഴിലുള്ള ഏജന്‍സി അന്വേഷിക്കുന്നത് എത്രത്തോളം ഫലപ്രദമാകുമെന്ന ചോദ്യവും ദീപു രേവതി ചോദിച്ചു. ലൈഫ്മിഷന്‍ അഴിമതിയുമായി ബന്ധപ്പെട്ട് സംസ്ഥാന സര്‍ക്കാര്‍ വിജിലന്‍സ് അന്വേഷണം പ്രഖ്യാപിച്ചത് ദേശീയ ഏജന്‍സികളെ ഭയന്നാണെന്ന ആരോപണവും ചോദ്യമായി വന്നു.

വടക്കാഞ്ചേരി ലൈഫ് മിഷന്‍ പദ്ധതി ഇടപാടിലെ ആരോപണങ്ങളുമായി ബന്ധപ്പെട്ട് മുഖ്യമന്ത്രിയെയും തദ്ദേശ മന്ത്രിയെയുമൊക്കെ ആരൊക്കെയോ ചോദ്യം ചെയ്യാന്‍ പോകുന്നുവെന്ന പൂതി മനസ്സില്‍ വച്ചാല്‍ മതിയെന്ന് മുഖ്യമന്ത്രി തുറന്നടിച്ചു.
അതാണ് നിങ്ങളുടെയൊക്കെ മാനസികാവസ്ഥയ്ക്കുള്ള തകരാറ്. ഞാന്‍ നന്നാവൂല അമ്മാവാ എന്ന പഴയകാലത്തെ കുട്ടിയുടെ മാനസികാവസ്ഥയില്‍ നിന്ന് ചോദ്യം ചോദിക്കാന്‍ ഇറങ്ങിപ്പുറപ്പെട്ടാല്‍ ഇതാകും അവസ്ഥ. നിങ്ങളെന്തേ അന്വേഷണം നടത്തുന്നില്ലെന്നായിരുന്നു ആദ്യത്തെ വര്‍ത്തമാനം. ഇപ്പോള്‍ അന്വേഷണത്തിന് തീരുമാനിച്ചപ്പോള്‍, നിങ്ങളെന്തോ ഭയപ്പെട്ടിട്ടാണ് അന്വേഷണം നടത്തുന്നതെന്നായി. യഥാര്‍ത്ഥ വസ്തുതകള്‍ സംബന്ധിച്ചാണ് അന്വേഷണം. അത് നടക്കട്ടെ. അതുമായി ബന്ധപ്പെട്ട് മറ്റെന്തെങ്കിലും വേണമെങ്കില്‍ ബന്ധപ്പെട്ട അന്വേഷണ ഏജന്‍സി പറയും. മുഖ്യമന്ത്രി ഉള്‍പ്പെടുന്ന വിജിലന്‍സല്ല ഉള്ളത്. വിജിലന്‍സ് സ്വതന്ത്ര ഏജന്‍സിയാണ്. അല്ലാത്ത എന്തനുഭവമാണ് നിങ്ങള്‍ക്കുള്ളത്. എന്താരോപണം. ആര്‍ക്കെതിരെ ആരോപണം. എന്തസംബന്ധവും വിളിച്ചുപറയാന്‍ നാക്കുണ്ടെന്ന് കരുതി എന്തും പറയരുത്. അസംബന്ധം പറയാനല്ലല്ലോ വാര്‍ത്താസമ്മേളനം. നിങ്ങള്‍ക്ക് വേറെന്തോ ഉദ്ദേശ്യമുണ്ട്. അതിന് വഴങ്ങാന്‍ ഞാന്‍ തയാറല്ല. വേറെ ഉദ്ദേശ്യമുണ്ടെങ്കില്‍ മനസ്സില്‍ വച്ചാല്‍ മതി എന്നാണ് മുഖ്യമന്ത്രി പറഞ്ഞത്.

എം.എല്‍.എയാണ് ആരോപണമുന്നയിച്ചതെന്ന് മാദ്ധ്യമപ്രവര്‍ത്തകന്‍ ചൂണ്ടിക്കാട്ടിയപ്പോള്‍, ആര്‍ക്കെങ്കിലും എന്തെങ്കിലുമൊക്കെ തോന്നി വിളിച്ചുപറഞ്ഞാലത് ആരോപണമാകുമോ എന്നായിരുന്നു മുഖ്യമന്ത്രിയുടെ മറുചോദ്യം.

മാദ്ധ്യമപ്രവര്‍ത്തകനാണെന്ന നിലയിലാണല്ലോ നിങ്ങളിരിക്കുന്നത്. ആദ്യം മാദ്ധ്യമപ്രവര്‍ത്തകനുണ്ടാവേണ്ട സാധാരണ ഗുണമാര്‍ജ്ജിക്കാന്‍ നോക്ക്. അതാണ് വേണ്ടത് മുഖ്യമന്ത്രി പറഞ്ഞു. ഇതോടെ ചാനലുകാരന്‍ ഫ്‌ളാറ്റായി. തുടര്‍ന്ന് മുഖ്യമന്ത്രി മൈക്ക് അടുത്തയാള്‍ക്ക് കൊടുക്കാന്‍ പറയുകയും ചെയ്തതോടെ എല്ലാം ശുഭം.

എന്തായാലും മനോരമ ചാനല്‍ റിപ്പോര്‍ട്ടറുടെ ചോദ്യവും മുഖ്യമന്ത്രിയുടെ ഉശിരന്‍ മറുപടിയും സോഷ്യല്‍ മീഡിയയില്‍ വൈറലാണ്.