വൈപ്പിന്‍ ചെറായിയില്‍ പ്രണവിനെ ആക്രമിക്കാന്‍ ശീമക്കൊന്ന വടികളാണു പ്രതികളുടെ കൈവശമുണ്ടായിരുന്നത്. വടിയുടെ ഭാഗങ്ങള്‍ മൃതദേഹത്തിനടുത്തു നിന്നു ലഭിച്ചിരുന്നു. പള്ളത്താംകുളങ്ങര ബീച്ചിന് സമീപമെത്തിയ പ്രണവിനെ പ്രതികള്‍ നാലുപേരും ചേര്‍ന്ന് തലയ്ക്കടിച്ചു വീഴ്ത്തുകയായിരുന്നു. കൊലപ്പെടുത്തിയതിനു ശേഷം പ്രതികള്‍ ഒരുമിച്ചു മടങ്ങിപ്പോകുന്ന ദൃശ്യങ്ങള്‍ സിസിടിവിയില്‍ പതിഞ്ഞിട്ടുണ്ട്. ചൊവ്വാഴ്ച പുലര്‍ച്ചെ നാലിനായിരുന്നു കൊലപാതകം. 

കയ്യിലുണ്ടായിരുന്ന ചെറിയ കത്തി ഉപയോഗിച്ച് പ്രണവിന്റെ തലയിലും ശരീരത്തിലും മുറിവേല്‍പ്പിച്ചിരുന്നു. ചെമ്മീന്‍കെട്ടില്‍ കത്തിയെറിഞ്ഞ സ്ഥലം പ്രതികള്‍ പൊലീസിന് കാണിച്ചു കൊടുത്തു. തലയുടെ നെറുകയിലേറ്റ ആഴത്തിലുള്ള മുറിവാണ് മരണ കാരണം. മരിച്ചുവെന്ന് ഉറപ്പായതോടെ പ്രതികള്‍ സ്ഥലം വിട്ടു. ചെറായി സ്വദേശികളായ ശരത്, ജിബിന്‍, അമ്പാടി എന്നിവരാണ് കേസില്‍ അറസ്റ്റിലായത്.

ക്രിമിനല്‍ സംഘത്തിലെ ശരത് എന്ന യുവാവുമായി, മരിച്ച പ്രണവുമായി പ്രണയത്തിലായിരുന്ന യുവതി അടുപ്പത്തില്‍ ആയതോടെയാണ് ഇവര്‍ തമ്മില്‍ പ്രശ്‌നങ്ങള്‍ ഉടലെടുക്കുന്നത്. പെണ്‍കുട്ടി പ്രണവുമായും അടുപ്പം സൂക്ഷിക്കുന്നു എന്ന ചിന്തയാണ് പ്രണവിനെ ഇല്ലാതാക്കണമെന്ന് ശരത് തീരുമാനിക്കാന്‍ കാരണം. ഇതിന് സുഹൃത്തുക്കളെ കൂടി കൂട്ടു പിടിക്കുകയായിരുന്നു.

തന്റെ രണ്ട് സുഹൃത്തുക്കള്‍ക്കൊപ്പമാണ് പ്രണവ് ചൊവ്വാഴ്ച പുലര്‍ച്ചെ ബീച്ചില്‍ എത്തിയതെന്നത് സിസിടിവി ദൃശ്യങ്ങളില്‍ കാണാം. പെണ്‍കുട്ടിയുമായി സംസാരിക്കാനുള്ള സാഹചര്യം ഒരുക്കുവാന്‍ പ്രണവിനൊപ്പം എത്തിയ സുഹൃത്തുക്കള്‍ ബീച്ചില്‍ നിന്ന് കുറച്ചുമാറിയാണ് നിന്നിരുന്നതെന്ന് പൊലീസ് പറയുന്നു. പ്രണവിന്റെ ഉച്ചത്തിലുള്ള നിലവിളി കേട്ടുവെങ്കിലും പെണ്‍കുട്ടിക്കൊപ്പം പ്രണവ് പിടിയിലായെന്നാണ് ഇവര്‍ കരുതിയിരുന്നത്. പ്രണവിനെ ഫോണില്‍ കിട്ടാതെ ആയപ്പോള്‍ ഇവര്‍ ചെറായിലേക്ക് മടങ്ങിപോയി.

ഏതു രാത്രിയിലും യുവതി വിളിച്ചാല്‍ പ്രണവ് ഇറങ്ങി വരുമെന്ന് അറിയാമായിരുന്ന ശരത്തും സംഘവും ആദ്യം പെണ്‍കുട്ടിയെക്കൊണ്ടു തന്നെ വിളിപ്പിക്കാനാണ് തീരുമാനിച്ചതെങ്കിലും പിന്നീട് തീരുമാനം മാറ്റി. യുവതിയുടെ പേരില്‍ സ്വന്തമായി അക്കൗണ്ട് ഉണ്ടാക്കി പ്രണവുമായി ചാറ്റ് ചെയ്യുകയായിരുന്നു. അര്‍ധരാത്രി പ്രണവിനെ സമൂഹമാധ്യമത്തിലൂടെ വിളിച്ച് ഉണര്‍ത്തി ചാറ്റ് ചെയ്ത് ഇറങ്ങി വരാന്‍ ആവശ്യപ്പെടുകയായിരുന്നു. കാമുകിയുടെ പേരിലെത്തിയ സന്ദേശം വിശ്വസിച്ചാണ് പ്രണവ് പുലര്‍ച്ചെ ബീച്ചിലെത്തിയത്.

കൊല്ലപ്പെട്ട പ്രണവ് ആയുധം കൈവശം വച്ചതുള്‍പ്പെടെ 3 ക്രിമിനല്‍ കേസുകളില്‍ പ്രതിയായിരുന്നു. അറസ്റ്റിലായ 3 പ്രതികളെയും മുനമ്പം പൊലീസ് ഇന്നലെ സ്ഥലത്തെത്തിച്ചു തെളിവെടുത്തു. നാലാമത്തെ പ്രതിയും ഉടന്‍ കസ്റ്റഡിയിലാവുമെന്നാണു സൂചന.