എല്‍ഡിഎഫില്‍ അടി പ്രതീക്ഷിച്ച എല്ലാവര്‍ക്കും തെറ്റി. മാത്രമല്ല ജോസ് കെ മാണിയെ ചൊല്ലി ഒരു കലാപവും നടന്നില്ല. സിപിഐ ചങ്ങനാശേരിയെ ചൊല്ലി കലഹിക്കുമെന്ന് വിചാരിച്ചെങ്കിലും അതും കാനം മാനേജ് ചെയ്തു.

സീറ്റ് വിഭജനം ഏതാണ്ട് പൂര്‍ത്തിയാകുമ്പോള്‍ കേരള കോണ്‍ഗ്രസ് എം ഒഴിച്ച് എല്‍ഡിഎഫിലെ ഘടകകക്ഷികള്‍ അതൃപ്തിയിലും അമര്‍ഷത്തിലുമായി. സ്വന്തം സീറ്റുകള്‍ വിട്ടുകൊടുത്ത് കേരള കോണ്‍ഗ്രസിനോടു കാട്ടിയ ഔദാര്യത്തിന്റെ പേരില്‍ സിപിഎമ്മില്‍ പ്രാദേശികമായ പ്രതിഷേധം അണപൊട്ടി. പക്ഷെ അതെല്ലാം ഉടന്‍ കെട്ടടങ്ങും.

കേരള കോണ്‍ഗ്രസ് പുതുതായി വരികയും എല്‍ജെഡി തിരിച്ചുവരികയും ചെയ്തതിനാല്‍ സീറ്റ് വിഭജനത്തില്‍ എല്ലാവരും വിട്ടുവീഴ്ച ചെയ്യണമെന്നു മുന്‍കൂറായി സിപിഎം പറഞ്ഞിരുന്നു. ഏതാനും സീറ്റുകള്‍ ത്യജിച്ചു പാര്‍ട്ടി മാതൃക കാട്ടി.

പക്ഷേ, കേരള കോണ്‍ഗ്രസ് തൃപ്തരായെങ്കില്‍ മറ്റുള്ളവരെല്ലാം അതൃപ്തിയില്‍ എന്നായി അന്തിമ ഫലം. പതിറ്റാണ്ടുകളായുള്ള യുഡിഎഫ് ബന്ധം വിഛേദിച്ച് വന്ന കക്ഷി എന്നതു കണ്ട് മാന്യമായ പരിഗണന കേരള കോണ്‍ഗ്രസിനോട് കാട്ടിയേ തീരൂവെന്നു സിപിഎം നേതൃത്വം ചൂണ്ടിക്കാട്ടുന്നു. ക്രിസ്ത്യന്‍ ന്യൂനപക്ഷങ്ങളെ അടുപ്പിച്ചു നിര്‍ത്താന്‍ ബലമുളള പാലമായി അവര്‍ ജോസ് കെ.മാണിയുടെ കക്ഷിയെ കരുതുന്നു.

അതേസമയം സിപിഎമ്മിന്റെ ന്യായം ദഹിക്കുന്നില്ല. 10 സീറ്റു പോലും കേരള കോണ്‍ഗ്രസിനു കൊടുക്കേണ്ട കാര്യമില്ല എന്നായിരുന്നു സിപിഐയുടെ അഭിപ്രായം. തദ്ദേശ തെരഞ്ഞെടുപ്പില്‍ കേരള കോണ്‍ഗ്രസ് വന്നതു ഗുണം ചെയ്തുവെങ്കിലും പുറത്ത് ചിത്രീകരിക്കപ്പെട്ട നേട്ടം ആ വരവു കൊണ്ട് ഉണ്ടായില്ല എന്നായിരുന്നു അവരുടെ വിശകലനം. പാര്‍ട്ടിയുടെ കാഞ്ഞിരപ്പള്ളിയും ഇരിക്കൂറും കേരള കോണ്‍ഗ്രസിനു വിട്ടുകൊടുക്കാന്‍ കാട്ടിയ ഉദാരതയ്ക്കു ചേര്‍ന്ന സമീപനം തിരിച്ച് ഉണ്ടായില്ല എന്ന അമര്‍ഷവും ഉണ്ട്.

ജനതാദള്‍ എസിന് കഴിഞ്ഞ തവണത്തെ 5 സീറ്റ് നാലായി കുറഞ്ഞു. സിറ്റിങ് സീറ്റായ വടകര എല്‍ജെഡിക്ക് കൊടുത്തതില്‍ പ്രതിഷേധം പരസ്യമായ പ്രകടിപ്പിച്ചു.

യുഡിഎഫ് വിട്ടു വന്ന കേരള കോണ്‍ഗ്രസിനെ കാര്യമായി പരിഗണിച്ചപ്പോള്‍ തിരിച്ചെത്തിയ തങ്ങളെ ക്രൂരമായി തഴഞ്ഞു എന്ന് എല്‍ജെഡി പ്രതിഷേധം ഉന്നയിച്ചു. യുഡിഎഫ് 7 സീറ്റ് നല്‍കിയ ഇടത്തു കിട്ടിയത് 3.

എന്‍സിപിയാകട്ടെ സിറ്റിങ് സീറ്റായ പാലാ കേരള കോണ്‍ഗ്രസിനു കൊടുക്കേണ്ടി വന്നതിനാല്‍ വലിയ നഷ്ടക്കച്ചവടം ആദ്യം തന്നെ ഉണ്ടായി. പാര്‍ട്ടി തന്നെ പിളര്‍ന്നു. 4 സീറ്റില്‍ മത്സരിച്ചിരുന്ന പാര്‍ട്ടിക്ക് കിട്ടിയത് 3.




ജനാധിപത്യ കേരള കോണ്‍ഗ്രസിന് 2016 ല്‍ 4 സീറ്റ് കിട്ടിയപ്പോള്‍ ഇക്കുറി ലഭിച്ചത് ഒന്നു മാത്രം. കേരള കോണ്‍ഗ്രസിനും ജനാധിപത്യ കേരള കോണ്‍ഗ്രസിനും ഒരേ മേഖലയിലാണ് സ്വാധീനം എന്നതിനാല്‍ വേറെ വഴിയില്ലെന്നു ആദ്യ ചര്‍ച്ചയില്‍ തന്നെ സിപിഎം വ്യക്തമാക്കി.

ഐഎന്‍എല്‍ ഘടകകക്ഷിയായ സാഹചര്യത്തില്‍ 5 സീറ്റ് ചോദിച്ചെങ്കിലും കിട്ടിയത് പഴയ 3 തന്നെ. കേരള കോണ്‍ഗ്രസ് (ബി) 2 സീറ്റ് ചോദിച്ചെ ങ്കിലും വീണ്ടും ഒന്നില്‍ തന്നെ നിന്നു. കോണ്‍ഗ്രസ് എസിലെ രാമചന്ദ്രന്‍ കടന്നപ്പള്ളിക്കു വീണ്ടും കണ്ണൂര്‍ സീറ്റ് ലഭിച്ചു. കേരള കോണ്‍ഗ്രസ് സ്‌കറിയാ തോമസ് പാര്‍ട്ടി ചെയര്‍മാനായ സ്‌കറിയ തോമസിന് കഴിഞ്ഞ തവണ കടുത്തുരുത്തി കൊടുത്തെങ്കിലും ഇക്കുറി സീറ്റില്ല. ആ സീറ്റും കേരള കോണ്‍ഗ്രസ് എമ്മിന്.

ഇത്രയൊക്കെ മാറ്റം വന്നിട്ടും വലിയ പ്രതിഷേധമൊന്നും എല്‍ഡിഎഫില്‍ ഉണ്ടായിട്ടില്ല എന്നത് വേറെ കാര്യം. ഇവിടെ ജോസ് കെ. മാണി തകര്‍ക്കുമ്പോള്‍ ജോസഫിന്റെ കാര്യം പരിതാപകരമാണ്. വെറും 9 സീറ്റില്‍ തൃപ്തിപ്പെടേണ്ടി വരും. അതിന്റെ അടി ഉടന്‍ പ്രതീക്ഷിക്കാം.