പി എസ് സി പരീക്ഷാ തട്ടിപ്പിലും യൂണിവേഴ്‌സിറ്റി മാര്‍ക്ക് ദാനത്തിലും പ്രതിഷേധിച്ച് പട്ടം പി എസ് സി ഓഫീസ് ഉപരോധിച്ച് ഗതാഗത തടസം സൃഷ്ടിച്ച കേസില്‍ അറസ്റ്റ് വാറണ്ട് നിലവിലുള്ള രണ്ടു കെ എസ് യു നേതാക്കള്‍ കോടതിയില്‍ കീഴടങ്ങി ജാമ്യം എടുത്തു.

തിരുവനന്തപുരം അഡീഷണല്‍ ചീഫ് ജുഡീഷ്യല്‍ മജിസ്‌ട്രേട്ട് കോടതിയാണ് ഉപാധികളോടെ ജാമ്യം അനുവദിച്ചത്.ഒന്നാം പ്രതി കെ എസ് യു സംസ്ഥാന പ്രസിഡന്റ് അഭിജിത്ത് , പതിനേഴാം പ്രതി യൂത്ത് കോണ്‍ഗ്രസ് സംസ്ഥാന വൈസ് പ്രസിഡന്റ് നുസൂര്‍ എന്നിവരാണ് കോടതിയില്‍ കീഴടങ്ങിയത്.

എല്ലാ വിചാരണ ദിനങ്ങളിലും കൃത്യമായി ഹാജരാകണമെന്ന വ്യവസ്ഥയിലാണ് മജിസ്ട്രേട്ട് വിവീജ രവീന്ദ്രന്‍ ജാമ്യം അനുവദിച്ചത്.

അമ്പതിനായിരം രൂപയുടെ പ്രതികളുടെ സ്വന്തവും തുല്യ തുകക്കുള്ള രണ്ടാള്‍ ജാമ്യത്തിലുമാണ് ജാമ്യ ബോണ്ട് ഹാജരാക്കാന്‍ കോടതി ഉത്തരവിട്ടത്. പ്രതികള്‍ ഏപ്രില്‍ 16 ന് ഹാജരാകാനും കോടതി ഉത്തരവിട്ടു.