ആ കുഞ്ഞിളം കണ്ണിലെ കണ്ണീര്‍ താങ്ങാനാവാതെ കേരളം ഇസക്കുഞ്ഞിനൊപ്പം വിതുമ്പുകയാണ്. പക്ഷെ സുരേഷ് എന്ന ഹോംഗാര്‍ഡിന്റെ സ്‌നേഹവും കരുതലും കണ്ട് ഇസക്കുഞ്ഞ് മാത്രമല്ല കേരളവും കുറച്ചു നേരത്തേയ്ക്ക് ആശ്വസിച്ചു. പാല്‍മണം മാറാത്ത ഇസയെ തോളിലിട്ട് താരാട്ട് പാടി തട്ടിയുറക്കുന്ന ഹോംഗാര്‍ഡ് സുരേഷ്. അതാണ് കേരളം കണ്ട മറക്കാനാവാത്ത കാഴ്ച.

സുരേഷിന്റെ കൈകളുടെ സുരക്ഷിതത്വത്തില്‍ മയങ്ങുന്ന ഏഴുമാസം പ്രായമുളള ഇസ. അപകടത്തില്‍പ്പെട്ട് ആശുപത്രിയിലായ ഇസയ്ക്ക് അച്ഛനും മുത്തച്ഛനും എല്ലാമാകുകയായിരുന്നു കുറച്ചുനേരത്തേക്ക് കായംകുളം പോലീസ് സ്റ്റേഷനിലെ ഹോംഗാര്‍ഡ് കെ.എസ്. സുരേഷ്.

പാട്ടുപാടിയുറക്കുന്ന അമ്മയും മുത്തശ്ശിയും ആശുപത്രിക്കിടക്കയിലാണെന്നറിയാതെ, ഒന്നരവയസ്സുകാരി ചേച്ചി സൈറ മരിച്ചതറിയാതെ ഇസ സുരേഷിന്റെ തോളില്‍ ചേര്‍ന്നുകിടന്നു.

ദേശീയപാതയില്‍ രാമപുരത്ത് കഴിഞ്ഞദിവസമുണ്ടായ വാഹനാപകടത്തില്‍ ഇസയുടെ അമ്മയ്ക്കും ബന്ധുക്കള്‍ക്കും ഗുരുതര പരിക്കേറ്റിരുന്നു. ഇവരെ അടിയന്തര ചികിത്സക്കായി മെഡിക്കല്‍ കോളേജിലേക്ക് മാറ്റിയപ്പോള്‍ അപകടത്തില്‍ നിന്നും അത്ഭുതകരമായി രക്ഷപ്പെട്ട ഏഴു മാസം പ്രായമുള്ള ഇസയുടെ സംരക്ഷണം ബന്ധുക്കള്‍ എത്തുന്നത് വരെ ഏറ്റെടുക്കുകയായിരുന്നു സുരേഷ്.  

നിര്‍ത്താതെ കരയുന്ന കുഞ്ഞിനെ ആശുപത്രി വളപ്പില്‍ ചുറ്റിനടന്ന് കരച്ചില്‍ മാറ്റി. പതിയെ സുരേഷിനോട് ഇസ ഇണങ്ങി..അവളെ പാടിയുറക്കി. പുലര്‍ച്ചേ ബന്ധുക്കള്‍ എത്തുന്നതുവരെ ഒക്കത്തുനിന്ന് ഇസയെ സുരേഷ് മാറ്റിയില്ല. ഈ സമയം ആരോ പകര്‍ത്തിയ വീഡിയോ ഇപ്പോള്‍ സമൂഹികമാധ്യമങ്ങളില്‍ വൈറലായിരിക്കുന്നത്.

കറ്റാനം കട്ടച്ചിറ അജയഭവനത്തില്‍ സുരേഷ് നാലുവര്‍ഷം മുന്‍പാണ് ഹോംഗാര്‍ഡായി സേവനത്തിന് എത്തിയത്. തിരുച്ചിറപ്പള്ളി ചിറയ്ക്കല്‍ വീട്ടില്‍ ഡെന്നി വര്‍ഗീസിന്റെ മകളാണ് ഇസ. അപകടത്തില്‍ ഇസയുടെ സഹോദരി ഒന്നര വയസ്സുകാരി സൈറ മരിച്ചിരുന്നു. അമ്മ മിന്ന അടക്കമുള്ളവര്‍ക്കു സാരമായ പരിക്കുമേറ്റിരുന്നു.

പരിക്കേറ്റ ഇസ, മിന്ന, മിന്നയുടെ അമ്മ ആനി  എന്നിവരെ കായംകുളം ഗവ.ആശുപത്രിയിലും മിന്നയുടെ സഹോദരന്‍ മിഥുനെ ആലപ്പുഴ മെഡിക്കല്‍ കോളജിലേക്കുമാണു കൊണ്ടുപോയത്. പിന്നീട് മിന്നയെയും ആനിയെയും അടിയന്തര ചികിത്സയ്ക്കായി മെഡിക്കല്‍ കോളേജിലേക്ക് മാറ്റുകയായിരുന്നു