ബി.ജെ.പി സസ്‌പെന്‍സായി നിറുത്തിയ കഴക്കൂട്ടം മണ്ഡലത്തിലേക്ക് ഒടുവില്‍ പോരാട്ടവീര്യത്തോടെ ശോഭ സുരേന്ദ്രന്‍ എത്തിയതോടെ കഥ മാറി.

കഴിഞ്ഞ ലോക്‌സഭാ തെരഞ്ഞെടുപ്പില്‍ ശോഭ സുരേന്ദ്രന്‍ മത്സരിച്ചത് ആറ്റിങ്ങലിലാണ്. 2,48,081 വോട്ടാണ് ശോഭ നേടിയത്. അതൊരു ചെറിയ വോട്ടല്ല. കേരളത്തില്‍ സിപിഎം ജയിക്കുമെന്ന് പ്രവചിച്ച വിരലിലെണ്ണാവുന്ന മണ്ഡലമായിരുന്നു അത്. എന്നാല്‍ സമ്പത്തിനെ തോല്‍പ്പിച്ചത് ശോഭ നേടിയ ആ രണ്ടര ലക്ഷം വോട്ടാണ്.

എന്തായാലും ശോഭാ സുരേന്ദ്രന്‍ വൈകിയാണെങ്കിലും കടന്നുവരികയാണ്. ബി.ജെ.പിയുടെ വനിതാ നേതാക്കളില്‍ ഏറ്റവും തീപ്പൊരി പരിവേഷം. ജനപ്രീതിയിലും മുന്നില്‍. ശബരിമല യുവതീപ്രവേശന വിവാദത്തിലും ബി.ജെ.പി സമരമുഖത്ത് ശോഭയുടെ സജീവസാന്നിദ്ധ്യം.

കഴക്കൂട്ടത്ത് മത്സരം തീ പാറിക്കുമെന്ന് ശോഭ പറയുന്നു. ബി.ജെ.പിയുടെ പുതിയ സംസ്ഥാന നേതൃത്വം നിലവില്‍ വന്നശേഷം പാര്‍ട്ടിയുടെ കോര്‍ കമ്മിറ്റിയില്‍ നിന്ന് ഒഴിവാക്കപ്പെട്ടതില്‍ പരിഭവിച്ച് നേതൃത്വത്തോട് ഇടഞ്ഞു. ഇപ്പോള്‍ ബി.ജെ.പി സംസ്ഥാന വൈസ് പ്രസിഡന്റാണ്. ജനറല്‍സെക്രട്ടറി സ്ഥാനത്ത് നിന്ന് നീക്കിയതോടെയാണ് കോര്‍ കമ്മിറ്റിയില്‍ നിന്നൊഴിവായത്.

ഇതേത്തുടര്‍ന്ന് പാര്‍ട്ടിയുടെ ഔദ്യോഗിക വേദികളില്‍ നിന്ന് വിട്ടുനില്‍ക്കുകയായിരുന്നു. ദേശീയ അദ്ധ്യക്ഷന്‍ ജെ.പി. നദ്ദ തിരഞ്ഞെടുപ്പ് പ്രചാരണത്തിന് തുടക്കം കുറിച്ച് തൃശൂരില്‍ നടത്തിയ യോഗത്തിലാണ് ഇടവേളകള്‍ക്ക് ശേഷം ശോഭയുടെ സാന്നിദ്ധ്യമുണ്ടായത്. ശോഭയുടെ സാന്നിദ്ധ്യവും അസാന്നിദ്ധ്യവുമായിരുന്നു സംസ്ഥാന ബി.ജെ.പിക്കകത്ത് സമീപകാലത്തെ ഏറ്റവും വലിയ ചര്‍ച്ചാവിഷയം.

2016ലെ നിയമസഭാ തിരഞ്ഞെടുപ്പില്‍ പാലക്കാട്ട് മത്സരിച്ച് സി.പി.എമ്മിനെ മറികടന്ന് രണ്ടാമതെത്തി. നാല്പതിനായിരത്തില്‍പ്പരം വോട്ടുകള്‍ നേടി. 2019ലെ ലോക്‌സഭാ തിരഞ്ഞെടുപ്പില്‍ ആറ്റിങ്ങലില്‍ 2.48ലക്ഷം വോട്ടുകള്‍ അവര്‍ പിടിച്ചെടുത്തു. ഇത്തവണ നിയമസഭാ തിരഞ്ഞെടുപ്പിനില്ലെന്നാണ് ശോഭ ആദ്യം പ്രഖ്യാപിച്ചിരുന്നത്.

സെക്രട്ടേറിയറ്റ് നടയില്‍ ഉദ്യോഗാര്‍ത്ഥികള്‍ നടത്തിയ സമരപ്പന്തലിലെത്തി 48 മണിക്കൂര്‍ ഉപവാസമനുഷ്ഠിച്ച് സമരക്കാര്‍ക്ക് അവര്‍ ഐക്യദാര്‍ഢ്യം പ്രഖ്യാപിച്ച വേളയില്‍ സംസ്ഥാന, ജില്ലാ ബി.ജെ.പി നേതൃത്വങ്ങളില്‍ നിന്നാരും തിരിഞ്ഞുനോക്കാതിരുന്നതും വലിയ ചര്‍ച്ചയായി.

ബി.ജെ.പിയുടെ ആദ്യ സ്ഥാനാര്‍ത്ഥി പട്ടിക പുറത്തുവന്ന ദിവസവും, താന്‍ മത്സരിക്കാനില്ലെന്ന സൂചന നല്‍കിയ ശോഭ അടുത്ത ദിവസങ്ങളില്‍ നിലപാട് മാറ്റി. അഖിലേന്ത്യാ നേതൃത്വത്തിന്റെ അറിവോടെയെന്നാണ് സംസാരം.കഴക്കൂട്ടത്ത് മത്സരിക്കാനുള്ള സന്നദ്ധത ദേശീയനേതൃത്വം ആരാഞ്ഞത് കൊണ്ടാവാം, താന്‍ മത്സരിക്കാന്‍ തയാറെന്ന് അവര്‍ പ്രഖ്യാപിച്ചു.

അപ്പോഴും കഴക്കൂട്ടത്തെ സ്ഥാനാര്‍ത്ഥിപ്രഖ്യാപനം നീണ്ടുനീണ്ടുപോയി. ശക്തമായ ത്രികോണ മത്സരംമന്ത്രി കടകംപള്ളി സുരേന്ദ്രന്റെ തട്ടകത്തില്‍ പോരാടാന്‍ ശോഭകൂടിയെത്തിയതോടെ ശക്തമായ ത്രികോണ മത്സരത്തിന് കളമൊരുങ്ങി. ലോകാരോഗ്യ സംഘടനയുടെ ഉദ്യോഗസ്ഥനായിരുന്ന ഡോ.എസ്.എസ്. ലാലാണ് യു.ഡി.എഫ് സ്ഥാനാര്‍ത്ഥി. പക്ഷെ ശോഭ വന്നതോടെ മത്സരം ശോഭയും കടകംപള്ളിയും തമ്മിലായി.

ശബരിമല വിഷയത്തില്‍ വിശ്വാസികള്‍ക്കെതിരെ പ്രവര്‍ത്തിച്ച ദേവസ്വം മന്ത്രിയോടുള്ള പോരാട്ടമാണെന്ന് ശോഭ പറഞ്ഞു. ആര് സ്ഥാനാര്‍ത്ഥി എന്നതിനല്ല പ്രസക്തി, ആര്‍ക്കെതിരെയാണ് മത്സരം എന്നതാണ് പ്രധാനമെന്നാണ് ശോഭാ സുരേന്ദ്രന്‍ പറയുന്നത്.