ബേബി മുതല്‍ ജേക്കബ് തോമസ് വരെ പിണറായിക്ക് കൊട്ടോട് കൊട്ടാണ് ...പിണറായി സഖാവിന് പലയിടത്ത് നിന്നും  സ്വന്തം പാര്‍ട്ടിയില്‍ നിന്ന് തുടങ്ങി ട്വന്റി ട്വന്റി വരെ , കടക്ക് പുറത്ത് പറയുകയാണ് ... തീര്‍ന്നില്ല അമ്പലപ്പുഴയില്‍ രക്തസാക്ഷി സ്മരാകത്തില്‍ പുഷ്പാര്‍ച്ചന നടത്തി സഖാക്കന്‍മാരുടെ ആപ്പീസ് പൂട്ടിച്ചിരിക്കുന്നു സന്ദീപ് വചസ്പതി.

വര്‍ഗ വഞ്ചനയുടെ കഥ അക്കമിട്ട് നിരത്തി സഖാക്കന്‍മാരെ സന്ദീപ് വെള്ളം കുടിപ്പിച്ചു എന്ന് പറഞ്ഞാല്‍ മതിയല്ലോ. തീര്‍ന്നില്ല മുഖ്യമന്ത്രിയോട് ചോദ്യങ്ങളുമായി മുന്‍ ഡിജിപി ഡോ.ജേക്കബ് തോമസ്...  പഞ്ച് ഡയലോഗുകള്‍ പറയേണ്ടവരോട് പറയണം എന്ന് പറഞ്ഞ് പഞ്ചിലിറങ്ങിയിരിക്കുകയാണ് ആശാന്‍.

ഇ. ശ്രീധരന്റെ കാല്‍തൊട്ട് വന്ദിക്കുന്ന ചിത്രത്തിന് താഴെ ആക്രോശവുമായിറങ്ങിയവര്‍ക്ക് പണ്ട് മലമ്പുഴയില്‍ വി.എസ്. അച്യുതാനന്ദന്റെ കാല്‍ തൊട്ട് വന്ദിക്കുന്ന ചിത്രമിറക്കി സാമൂഹ്യ മാധ്യമങ്ങളില്‍ മറ്റു ചിലരും കളം പിടിച്ചു. ഏതായാലും അങ്കവും കാണാം താളിയുമൊടിക്കാം എന്ന മട്ടിലാണ് കേരളത്തിലെ ബി.ജെ.പി സ്ഥാനാര്‍ഥികളും അണികളും. കൊണ്ടും കൊടുത്തും ഗോദയില്‍ അങ്ങനെ തന്നെ.

ഏതായാലും വമ്പന്‍ സ്രാവുകള്‍ക്കൊപ്പം നീന്തി എന്ന സര്‍വീസ് സ്‌റ്റോറിയും മെറ്റല്‍ ഇന്‍ഡസ്ട്രീസിന്റെ തലപ്പത്ത് നിന്നുമുള്ള പടിയിറക്കത്തിനുമൊപ്പം ജേക്കബ് തോമസ് ഒരുക്കിവച്ചിരിക്കുന്നത് വമ്പന്‍ കത്തിയാണ്. അതു പിണറായിക്കുള്ള രാഷ്ട്രീയ ആരോപണ കത്തി. ജനങ്ങളുടെ ഹൃദയപക്ഷത്തു നില്‍ക്കുന്നുവെന്ന് അവകാശപ്പെടുന്ന മുഖ്യമന്ത്രിയോട് ചോദ്യങ്ങളുന്നയിച്ച് മുന്‍ ഡിജിപിയും എന്‍ഡിഎ ഇരിങ്ങാലക്കുട നിയോജക മണ്ഡലം സ്ഥാനാര്‍ത്ഥിയുമായ ഡോ.ജേക്കബ് തോമസ് വീണ്ടും ചര്‍ച്ചയായത്.

 ബഹുമാന്യനും സര്‍വ്വോപരി ജനങ്ങളുടെ ഹൃദയപക്ഷത്ത് നില്‍ക്കുന്നയാളുമാണ് ഞങ്ങളുടെ മുഖ്യമന്ത്രി എന്നാണ് അണികള്‍ പൊതുവേ പറയാറ്... അദ്ദേഹത്തോടുള്ള ചില ചെറിയ ചോദ്യങ്ങള്‍ക്ക് മറുപടി ലഭിക്കുമോ എന്ന് നോക്കാം എന്ന മുഖവുരയോടെയായിരുന്നു തുടക്കം.

ബിജെപിയില്‍ ചേരുന്ന ആളുകളെല്ലാം അവരുടെ തനി സ്വഭാവം കാണിക്കും എന്നാണ് ഏറ്റവുമൊടുവിലായി മുഖ്യമന്ത്രി പിണറായി വിജയന്‍ നടത്തിയ പ്രസ്താവന. അങ്ങനെയെങ്കില്‍ സിപിഎമ്മിലേക്ക് പോകുന്ന ആളുകളെല്ലാം ആ 'തനി സ്വഭാവം' പുറത്തെടുക്കും എന്ന് ഞങ്ങള്‍ പറയുന്നതില്‍ തെറ്റുണ്ടോ?  ജേക്കബ് തോമസ് ചോദിച്ചു. താങ്കള്‍ക്ക് എതിര്‍ക്കാന്‍ പറ്റില്ല.

കാരണം, താങ്കള്‍ ഉള്‍പ്പെടെയുള്ള നേതാക്കന്മാരെല്ലാം സിപിഎമ്മില്‍ വന്ന ശേഷം സിപിഎമ്മിന്റെ 'യഥാര്‍ത്ഥ സ്വഭാവം' എടുത്തണിഞ്ഞ വരാണല്ലോ... അദ്ദേഹം പറഞ്ഞു.   മുഖ്യമന്ത്രിയെന്ന പരമോന്നത സ്ഥാനത്തിരുന്നിട്ടും വെറും പാര്‍ട്ടി സെക്രട്ടറിയെ പോലെ താങ്കള്‍ പെരുമാറിയ പല സന്ദര്‍ഭങ്ങളുമുണ്ട്.  അതിലൊന്നാണല്ലോ പത്രമാധ്യമങ്ങളെ കാണുമ്പോഴുള്ള അവജ്ഞ.

'കടക്ക് പുറത്ത്' എന്ന പഞ്ച് ഡയലോഗ് അണികള്‍ക്ക് ആഘോഷമായിരിക്കാം.  ഒന്ന് ചോദിച്ചോട്ടെ,  ഇ. പി. ജയരാജന്‍ ബന്ധുനിയമനം നടത്തിയപ്പോഴും,  കെ. ടി. ജലീലിന്റെ ബന്ധു നിയമനങ്ങള്‍ തെളിവു സഹിതം പുറത്തു വന്നപ്പോഴും 'ഇരട്ടചങ്ക'നായ അങ്ങ് എന്താണ് അവരോടൊന്നും 'കടക്ക് പുറത്ത്' എന്ന് പറയാതിരുന്നത്?

ഉന്നത ഉദ്യോഗസ്ഥനായ ശിവശങ്കരന്റെ ഭാഗത്ത് നിന്ന് ഗുരുതരമായ രാജ്യദ്രോഹം തെളിഞ്ഞപ്പോഴും കടക്ക് പുറത്ത് എന്ന് താങ്കള്‍ക്ക് പറയാന്‍ സാധിക്കാതിരുന്നത് എന്തുകൊണ്ടാണ്? പറയേണ്ട പഞ്ച് ഡയലോഗുകള്‍ പറയേണ്ടവരോട് പറയാതെ പാവം പത്രക്കാരുടെ വായടപ്പിക്കുന്നതിലെന്താണ് താങ്കള്‍ കണ്ട മേന്മ?  ജേക്കബ് തോമസ് ചോദിച്ചു. അപ്പോള്‍ ഇരിഞ്ഞാലക്കുടയിലും അമ്പലപ്പുഴയിലും പാലക്കാട് നിന്നുമൊക്കെ സാമ്പിള്‍ വെടിക്കെട്ട് തുടങ്ങി. തൃശൂര്‍ പൂരം ഇനിയല്ലേ...