കോവിഡ് രൂക്ഷമായതോടെ സംസ്ഥാനത്ത് ലോക്ഡൗണ്‍ ആയതിനാല്‍ നിരവധി പേരാണ് ഇപാസിനായി അപേക്ഷിക്കുന്നത്. എന്നാല്‍ പല അപേക്ഷകളും അനാവശ്യ യാത്രകള്‍ക്കുള്ളതാണെന്നാണ് പൊലീസ് പറയുന്നത്. അതുകൊണ്ട് തന്നെ നിരവധി അപേക്ഷകള്‍ തള്ളിക്കളയുകയും ചെയ്യുന്നു. അപേക്ഷകള്‍ വിശദമായി പരിശോധിച്ചതിന് ശേഷം മാത്രമേ ഇപാസ് അനുവദിക്കൂ.

എന്നാല്‍ കണ്ണൂരില്‍ കഴിഞ്ഞ ദിവസം ലഭിച്ച അപേക്ഷ പൊലീസുകാരെ ശരിക്കും അമ്ബരപ്പിച്ചു. ഒരു സ്ഥലത്ത് സെക്‌സിന് പോകണമെന്നായിരുന്നു അപേക്ഷകന്റെ ആവശ്യം. അപേക്ഷകന്റെ ആവശ്യം കണ്ട് അമ്ബരന്ന പൊലീസ് വിവരം എഎസ്പിയെ അറിയിച്ചു. അപേക്ഷകനെ കൈയോടെ പൊക്കാനായിരുന്നു വളപട്ടണം പൊലീസിന് ലഭിച്ച നിര്‍ദ്ദേശം.
അധികം വൈകാതെ പൊലീസ് അപേക്ഷകനെ കൈയോടെ പൊക്കി കണ്ണൂര്‍ എ എസ് പി ഓഫീസിലെത്തിച്ചു. ചോദ്യം ചെയ്തപ്പോഴാണ് പോലീസ് ഉദ്യോഗസ്ഥര്‍ക്ക് സംഭവത്തിലെ തമാശ മനസിലായത്. വൈകുന്നേരം 'സിക്‌സ് ഒ ക്ലോക്കിന് 'പുറത്തിറങ്ങണം എന്നാണ് പിടിയിലായ ആള്‍ എഴുതാന്‍ ഉദ്ദേശിച്ചത്. എന്നാല്‍, എഴുതി വന്നപ്പോള്‍ 'സിക്‌സ്' സെക്‌സ് ആയതാണ്. ടൈപ്പ് ചെയ്തപ്പോള്‍ സംഭവിച്ച തെറ്റ് മനസിലാക്കാതെ അപേക്ഷ സമര്‍പ്പിക്കുകയും ചെയ്തു. അവസാനം കാര്യം മനസിലായ പൊലീസ് ഉദ്യോഗസ്ഥര്‍ അപേക്ഷകനെ വിട്ടയച്ചു.