'ആളില്ലാത്ത കാരണത്താല് ഒരു ദിവസം പോലും ജനസേവനം മുടങ്ങാന് പാടില്ല'; ഓഫിസ് പ്രവൃത്തിസമയങ്ങളില് ജീവനക്കാര് പൂര്ണമായി സീറ്റിലുണ്ടാകണമെന്ന് മുഖ്യമന്ത്രി പിണറായി വിജയന്
ഓഫിസ് പ്രവൃത്തിസമയങ്ങളില് ജീവനക്കാര് പൂര്ണമായി സീറ്റിലുണ്ടാകണമെന്ന് മുഖ്യമന്ത്രി പിണറായി വിജയന്. വെബിനാറിലൂടെ ജീവനക്കാരോട് സംസാരിക്കുകയായിരുന്നു അദ്ദേഹം. കോവിഡ് മാറുന്നതോടെ കൃത്യനിഷ്ഠ ഉറപ്പാക്കാന് ബയോമെട്രിക് പഞ്ചിങ് സംവിധാനം കൂടുതല് ഓഫിസുകളിലേക്ക് വ്യാപിപ്പിക്കും. ഫയലുകള് കെട്ടിക്കിടക്കുന്നില്ലെന്ന് ഉറപ്പുവരുത്തണം. ഒരു ഉദ്യോഗസ്ഥന് ഓഫിസില് ഹാജരില്ലെന്നത് ആ സെക്ഷനിലെ ഫയല് നീക്കത്തിന് പ്രതിബന്ധമാകരുത്. ആളില്ലാത്ത കാരണത്താല് ഒരു ദിവസം പോലും ജനസേവനം മുടങ്ങാന് പാടില്ല.
മനഃപൂര്വം നൂലാമാലകള് സൃഷ്ടിച്ച് ഫയല് താമസിപ്പിക്കുന്ന മനോഭാവവും പൂര്ണമായി മാറിയിട്ടില്ല. സഹപ്രവര്ത്തകരോടുപോലും ഇതാണ് മനോഭാവം. ഫയല് തീര്പ്പാക്കലിന് ഏറ്റവും കുറഞ്ഞ സമയപരിധി നിശ്ചയിക്കും. നിസ്സാര കാര്യങ്ങള് ചൂണ്ടിക്കാട്ടി പ്രമോഷനും ആനുകൂല്യങ്ങളും തടഞ്ഞുവെക്കുക, ഇഷ്ടക്കാര്ക്കുവേണ്ടി മാസങ്ങളോളം സീറ്റ് ഒഴിച്ചിടുക, പ്രധാനപ്പെട്ട സീറ്റുകള് നല്കാന് പാരിതോഷികം സ്വീകരിക്കുക തുടങ്ങി പുരോഗമന സ്വഭാവമുള്ള, കേരളത്തിന് യോജിക്കാത്ത നടപടികളാണ് ചില ഓഫിസുകള് കേന്ദ്രീകരിച്ച് നടക്കുന്നത്.
ഒരു ചെറുവിഭാഗം സിവില് സര്വിസ് മേഖലയുടെ ശോഭ കെടുത്തുന്ന പ്രവണതകളില് ഏര്പ്പെടുന്നുണ്ട്. ചിലര് നേരിട്ട് കൈക്കൂലിയോ പാരിതോഷികങ്ങളോ കൈപ്പറ്റുന്നുണ്ടാകില്ല. പക്ഷേ, സര്ക്കാര് ഫണ്ട് ചോര്ന്നുപോകാനും അത് അനര്ഹമായ ഇടങ്ങളില് ചെന്നുചേരാനും അവര് മൂകസാക്ഷികളാകും. ഇത് അഴിമതിയാണ്. പദ്ധതികള്ക്ക് വകയിരുത്തുന്ന ഫണ്ട് ചില്ലിക്കാശുപോലും നഷ്ടമാകാതെ നിര്ദിഷ്ട കാര്യത്തിനായി മാത്രം ചെലവഴിക്കുന്നെന്ന് ഉറപ്പാക്കേണ്ടത് ജീവനക്കാരുടെ ഉത്തരവാദിത്തമാണ്.
എല്ലാ ഓഫിസുകളിലും ഫ്രണ്ട് ഓഫിസ് സംവിധാനം വേണം. ഓഫിസില് എത്തുന്നവരോട് മാന്യമായി പെരുമാറുകയും ആവശ്യങ്ങള് ക്ഷമയോടെ കേള്ക്കുകയും വേണം. ജീവനക്കാരാകെ സ്മാര്ട്ടാകണമെന്ന് മുഖ്യമന്ത്രി പറഞ്ഞു.
ഉദ്യോഗസ്ഥര് വലിയ സുഖസൗകര്യങ്ങളില് മാത്രം കഴിയുന്നവരാണെന്ന ചിന്ത ജനങ്ങളുടെ മനസ്സില് നിന്ന് മാറ്റി, ജനങ്ങള്ക്കുവേണ്ടി കര്മനിരതരാണെന്ന ചിന്ത സൃഷ്ടിക്കാനാകണം. നികുതിപ്പണത്തിെന്റ ആനുകൂല്യങ്ങള് പറ്റുന്നവരല്ല, കൃത്യമായി ജോലി ചെയ്തിട്ടാണ് ശമ്ബളം വാങ്ങുന്നതെന്ന തോന്നല് ജീവനക്കാരെക്കുറിച്ച് പൊതുവിലുണ്ടാകണം. ഭരണപരിഷ്കാര കമീഷന്റെ റിപ്പോര്ട്ടിലെ ശിപാര്ശകള് സമയബന്ധിതമായി നടപ്പാക്കുന്നതിന് പ്രത്യേക സംവിധാനമുണ്ടാക്കും. കാലഹരണപ്പെട്ട നിയമങ്ങള് റദ്ദാക്കുകയും ജീവനക്കാരുടെ സ്ഥലംമാറ്റത്തിന് നിലവിലെ മാനദണ്ഡങ്ങള് കൃത്യമായി നടപ്പാക്കുകയും ചെയ്യുമെന്ന് മുഖ്യമന്ത്രി പറഞ്ഞു.
https://www.facebook.com/Malayalivartha
