ഇനിയെല്ലാം വളരെപ്പെട്ടെന്ന്... കേരളത്തിലേക്കുള്ള ദൂരം കുറച്ച് പി.എസ്. ശ്രീധരന് പിള്ളയെ ഗോവയിലെ ഗവര്ണര് ആക്കുമ്പോള് മലയാളികള്ക്കും ഏറെ സന്തോഷം; കുറഞ്ഞ നാള് കൊണ്ട് മോദിയുടെ ഗുഡ് ലിസ്റ്റില് കയറിപ്പറ്റിയ ശ്രീധരന് പിള്ളയുടെ അടുത്ത വരവ് കേരളത്തിലേക്കോ
മലയാളികള്ക്ക് ഏറെ സുപരിചിതനാണ് പി.എസ്. ശ്രീധരന്പിള്ള. സംസ്ഥാന ബിജെപി അധ്യക്ഷനായ ശ്രീധരന് പിള്ളയെ മിസോറാം ഗവര്ണറാക്കുമ്പോള് എല്ലാവരും കളിയാക്കിയതാണ്. എന്നാല് ഇന്നിപ്പോള് ശ്രീധരന് പിള്ള പ്രധാനമന്ത്രി നരേന്ദ്ര മോദിയുടെ ഗുഡ് ലിസ്റ്റിലുണ്ട്. ഇന്ന് ഗോവയെങ്കില് നാളെ എന്ത്കൊണ്ട് കേരളമാവില്ല എന്ന ചോദ്യവും ഉയരുന്നുണ്ട്.
ശ്രീധരന് പിള്ളയെ ഗോവ ഗവര്ണറായി മാറ്റി നിയമിച്ച് രാഷ്ട്രപതി രാംനാഥ് കോവിന്ദ് ഉത്തരവിറക്കി. വിശാഖപട്ടണം മുന് എം.പിയും ബി.ജെ.പി ദേശീയ എക്സിക്യുട്ടീവ് അംഗവുമായ ഹരിബാബു കംബംപട്ടിയാണ് പുതിയ മിസോറം ഗവര്ണര്. കേന്ദ്ര സാമൂഹ്യനീതി മന്ത്രി താവര് ചന്ദ് ഗെലോട്ടിനെ കര്ണാടക ഗവര്ണറായും നിയമിച്ചു. കേന്ദ്ര മന്ത്രിസഭ പുന:സംഘടനയുമായി ബന്ധപ്പെട്ടാണ് ഈ മാറ്റം.
എട്ടു സംസ്ഥാനങ്ങളിലാണ് പുതിയ ഗവര്ണര്മാരെ നിയമിച്ചത്. 2019 ഒക്ടോബറില് മിസോറം ഗവര്ണറായി നിയമിതനായ ശ്രീധരന് പിള്ളയ്ക്ക് കേരളത്തിനടുത്ത് ഗോവയിലേക്കുള്ള മാറ്റം നേട്ടമായി. ബി.ജെ.പി കേരള ഘടകം അദ്ധ്യക്ഷനായിരിക്കെയാണ് ശ്രീധരന്പിള്ളയെ മിസോറം ഗവര്ണറായി നിയമിച്ചത്.
നേരത്തേ ബി.ജെ.പി നേതാവ് കുമ്മനം രാജശേഖരനും മിസോറം ഗവര്ണര് സ്ഥാനം വഹിച്ചിട്ടുണ്ട്. ഗുജറാത്തില് നിന്നുള്ള ബി.ജെ.പി നേതാവ് മംഗുഭായ് ഛഗന്ഭായ് ആണ് പുതിയ മദ്ധ്യപ്രദേശ് ഗവര്ണര്. മുന് ഗോവ സ്പീക്കറും ബി.ജെ.പി നേതാവുമായ വിശ്വനാഥ് അര്ലേക്കറിനെ ഹിമാചല് പ്രദേശ് ഗവര്ണറായി നിയമിച്ചു. ഹിമാചല് ഗവര്ണറും മുന് കേന്ദ്രമന്ത്രിയുമായ ബന്ദാരു ദത്ത്രാത്രേയയെ ഹരിയാനയിലും അവിടെ നിന്ന് സത്യദേവ് നാരായണ് ആര്യയെ ത്രിപുരയിലും ഗവര്ണര്മാരായി നിയമിച്ചു. ത്രിപുര ഗവര്ണര് രമേശ് ബയസിനെ ജാര്ഖണ്ഡിലേക്ക് മാറ്റി നിയമിച്ചു.
കേരളവും ഗോവയും തമ്മില് ഏറെ അകലമില്ലാത്തത് ശ്രീധരന് പിള്ളയെ സന്തോഷിപ്പിക്കുന്നു. ശ്രീധരന് പിള്ളയുടെ അടുത്ത വരവ് കേരളത്തിലേക്കാണോ എന്ന സൂചനയും പ്രചരിക്കുന്നുണ്ട്.
അതേസമയം ഫോണ് വിളി വിവാദത്തില് അകപ്പെട്ട മുകേഷ് എം എല് എയെ പിന്തുണച്ച് ശ്രീധരന്പിളള രംഗത്തെത്തിയത് കൗതുകമായി. സ്വന്തം എംഎല്എയുടെ പേര് അറിയില്ല എന്ന് പറഞ്ഞപ്പോള് ചൂരല് കൊണ്ട് അടിക്കണമെന്ന് മുകേഷ് പറഞ്ഞതിനെ അദ്ദേഹം പിന്തുണച്ചു.
സ്വന്തം നാട്ടിലെ എംഎല്എ ആരാണെന്ന് ചോദിക്കുമ്പോള് അറിയില്ല എന്ന് പറഞ്ഞാല് ആ കുട്ടിയെ പിടിച്ച് ഉമ്മ വെക്കുകയാണോ വേണ്ടത്. അല്ലെങ്കില് പ്രോത്സാഹിപ്പിക്കുകയാണോ വേണ്ടതെന്ന് ശ്രീധരന് പിള്ള ചോദിച്ചു. കോഴിക്കോട് ബഷീര് അനുസ്മരണ പരിപാടിയില് സംസാരിക്കുകയായിരുന്നു അദ്ദേഹം.
ഒരു എംഎല്എയെ ഒരു കുട്ടി വിളിച്ചു. വിളിച്ച കുട്ടി ഫോണ് റെക്കോര്ഡ് ചെയ്തിട്ടുണ്ട്. വിളിച്ച് പ്രശ്നം പറയുന്നതിന് ഫോണ് റെക്കോര്ഡ് ചെയ്യുന്നതിലേക്ക് ഒരു പത്താം ക്ലാസ് വിദ്യാര്ഥി മാറുമ്പോള് രാഷ്ട്രീയത്തിനപ്പുറം നമ്മള് ചിന്തിക്കേണ്ട വിഷയമുണ്ട്. സാമൂഹിക ജീവിതത്തില് ഒരു ജനാധിപത്യ വ്യവസ്ഥയില് വളര്ന്നുവരുന്ന കുട്ടികള് എങ്ങോട്ടേക്ക് എന്തിലേക്ക് പോകുന്നുവെന്ന വിഷയം നമ്മള് എല്ലാവരും ചിന്തിക്കേണ്ടതാണെന്നും അദ്ദേഹം വ്യക്തമാക്കി.
രാഷ്ട്രീയം അതിന്റെ അന്ധമായ ചട്ടക്കൂടില് മുന്നോട്ട് പോകുമ്പോള് തെറ്റുകള് കുന്നുകൂടുകയാണെന്നും അദ്ദേഹം കൂട്ടിച്ചേര്ത്തു.
"
https://www.facebook.com/Malayalivartha
