വല്ലാത്തൊരു ചെയ്ത്ത്... കോവിഡ് നിയന്ത്രണങ്ങള് തുടരുന്നതിനിടെ ശ്രദ്ധനേടി കല്യാണ പെണ്ണിന്റേയും ചെക്കന്റേയും പ്രതിഷേധം; ഇവര് ബീവറേജ് ഔട്ട് ലെറ്റിന് മുന്നിലെത്തിയപ്പോള് ക്യൂ നിന്നവര്ക്കും ആകാംക്ഷ; ശ്രദ്ധക്ഷണിക്കല് സമരത്തിന്റെ ഭാഗമായുള്ള പ്രതിഷേധം ഏറെ ശ്രദ്ധ നേടി
സംസ്ഥാനത്തെ കോവിഡ് വ്യാപനം കൂടുന്നില്ല. തുടര്ച്ചയായി ഒന്നര ആഴ്ചയായി ടി.പി.ആര്. പത്തിന് മുകളില് തന്നെ നില്ക്കുകയാണ്. ഇന്നലത്തെ പ്രതിദിന കേസ് 14000ന് മുകളില് ആകുകയും ചെയ്തു.
അതിനിടെ കല്യാണപ്പെണ്ണും ചെക്കനും കല്യാണ വേഷത്തില് ബീവറേജ് ഔട്ട് ലെറ്റിന് മുന്നിലെത്തിയപ്പോള് കണ്ടുനിന്നവര് അമ്പരന്നു. വീണ്ടും അന്വേഷിച്ചപ്പോഴാണ് കാര്യം പിടികിട്ടിയത്. ഓള് കേരള കാറ്ററേഴ്സ് അസോസിയേഷന് തിരൂര് കെ.ജി. പടിയിലെ ബീവറേജസ് ഔട്ട്ലെറ്റിനു മുമ്പില് നടത്തിയ ശ്രദ്ധക്ഷണിക്കല് സമരത്തിന്റെ ഭാഗമായുള്ള പ്രതിഷേധമാണിത്.
ഈ പ്രതിഷേധവേദിയിലാണ് സംഘടനാപ്രവര്ത്തകരായ പൊന്നാനി സ്വദേശികളായ ഇസ്ഹാഖ് വരനായും ഫവാസ് വധുവായും വേഷമിട്ടെത്തിയത്. ബീവറേജില് ആയിരങ്ങള്ക്ക് വരിനിന്ന് മദ്യംവാങ്ങാം, കല്യാണത്തിന് 20 പേര്ക്കേ പങ്കെടുക്കാവൂ എന്ന വിവേചനത്തില് പ്രതിഷേധിച്ചാണ് സമരവേദി ബീവറേജ് ഔട്ട്ലെറ്റിന് മുമ്പിലാക്കിയത്.
കാറ്ററിങ് മേഖലയെ സംരക്ഷിക്കുക, കാറ്ററിങ് മേഖലയെ ചെറുകിട വ്യവസായമായി അംഗീകരിക്കുക, ഹാളുകളുടെ വലിപ്പത്തിനനുസരിച്ച് മാനദണ്ഡം പാലിച്ച് വിവാഹങ്ങള്ക്ക് അനുമതി നല്കുക എന്നീ ആവശ്യങ്ങള് ഉന്നയിച്ചായിരുന്നു സമരം.
കുറുക്കോളി മൊയ്തീന് എം.എല്.എ. പ്രതിഷേധസമരം ഉദ്ഘാടനംചെയ്തു. സംഘടനയുടെ ജില്ലാസെക്രട്ടറി സലീം ബ്രദേഴ്സ് അധ്യക്ഷതവഹിച്ചു. കെ.എച്ച്.ജി.ഒ.എ. ജില്ലാസെക്രട്ടറി ആര്. ഇബ്രാഹിംകുട്ടി, മുഹമ്മദ്, ഷമീര്, നാസര് ബിസ്മി, മജീദ് എന്നിവര് പ്രസംഗിച്ചു.
സംസ്ഥാനത്ത് വ്യാപാരി വ്യവസായി ഏകോപന സമിതിയുടെ നേതൃത്വത്തില് ഇന്നലെ കടയടപ്പ് സമരവും നടത്തിയിരുന്നു. കൊറോണ വ്യാപനത്തിന്റെ പേരില് കടകള് തുറക്കുന്നതിന് സര്ക്കാര് തുടരുന്ന നിയന്ത്രണങ്ങളില് പ്രതിഷേധിച്ചാണ് സമരം. ഇന്നലെ രാവിലെ ആറ് മുതല് വൈകീട്ട് അഞ്ച് വരെയാണ് വ്യാപാരികള് കടകള് അടച്ച് പ്രതിഷേധിച്ചത്.
സെക്രട്ടറിയേറ്റ് ഉള്പ്പെടെ 25,000 കേന്ദ്രങ്ങളില് വ്യാപാരികള് ഉപവാസ സമരവും നടത്തി. കൊറോണ സുരക്ഷാ മാര്ഗ്ഗ നിര്ദ്ദേശങ്ങള് പാലിച്ച് എല്ലാ കടകളും തുറന്നു പ്രവര്ത്തിക്കാന് അനുവദിക്കണമെന്നാണ് സമിതിയുടെ ആവശ്യം. ഇത് അംഗീകരിച്ചില്ലെങ്കില് അനിശ്ചിതകാല സമരം ആരംഭിക്കാനാണ് സമിതിയുടെ തീരുമാനം.
സംസ്ഥാനത്ത് ലോക്ഡൗണ് പിന്വലിച്ചതിന് പിന്നാലെ മുഴുവന് കടകളും തുറന്നു പ്രവര്ത്തിക്കാന് അനുവദിക്കണമെന്ന് വ്യാപാരി വ്യവസായി ഏകോപന സമിതി നേരത്തെ ആവശ്യപ്പെട്ടിരുന്നു. എന്നാല് സര്ക്കാര് ഇത് അംഗീകരിച്ചിട്ടില്ല. ഇതിന്റെ പശ്ചാത്തലത്തിലാണ് സമിതി സമരം ചെയ്യുന്നത്.
കോവിഡ് പ്രതിരോധ നിയന്ത്രണങ്ങളോട് സഹകരിക്കുന്ന വ്യാപാരി സമൂഹത്തെ സര്ക്കാറിനെതിരെ തിരിക്കാനാണ് ഏകോപന സമിതിക്ക് പിറകില് കളിക്കുന്നവര് ലക്ഷ്യമിടുന്നത്. കട അടപ്പിക്കലല്ല തുറപ്പിക്കലാണ് വേണ്ടത്.
ടെസ്റ്റ് പോസിറ്റിവിറ്റി നിരക്കിന്റെ പുതിയ മാനദണ്ഡങ്ങളില് ഇളവ് നല്കി എല്ലാ കടകളും തുറക്കാനുള്ള അനുമതിക്കായി വ്യാപാരി വ്യവസായി സമിതി ഇടപെടല് ശക്തമാക്കിയിട്ടുണ്ടെന്നും ഭാരവാഹികള് പറഞ്ഞു.
അതേമയം കോവിഡ് വ്യാപനം പത്തു ശതമാനത്തില് താഴെനില്ക്കുന്ന പ്രദേശങ്ങളിലെ സര്ക്കാര്, അര്ദ്ധസര്ക്കാര് സ്ഥാപനങ്ങളില് നാളെ മുതല് മുഴുവന് ജീവനക്കാരും ഹാജരാകണമെന്ന് മുഖ്യമന്ത്രി പിണറായി വിജയന്റെ അദ്ധ്യക്ഷതയില് ചേര്ന്ന കൊവിഡ് അവലോകനയോഗം നിര്ദ്ദേശിച്ചു. 497 തദ്ദേശ സ്ഥാപന പരിധിയിലാണ് ഇതു ബാധകമാവുന്നത്. തിരുവനന്തപുരം കോര്പ്പറേഷന് മേഖലയില് വരുന്ന എല്ലാ സര്ക്കാര് ഓഫീസുകളും ഇതു പ്രകാരം പൂര്ണതോതില് പ്രവര്ത്തിക്കും. എന്നാല് സന്ദര്ശകര്ക്ക് നിയന്ത്രണമുണ്ടാവും. ഹോട്ടലുകളുടെ പ്രവര്ത്തനസമയം രാത്രി 9.30വരെയാക്കി. കൂടുതല് ഇളവുകള് കൊവിഡ് വ്യാപനം കുറഞ്ഞാല് മാത്രം നല്കിയാല് മതിയെന്നും പ്രതിവാര അവലോകനയോഗം തീരുമാനിച്ചു.
" f
https://www.facebook.com/Malayalivartha
