തിരുവനന്തപുരം അന്താരാഷ്ട്ര വിമാനത്താവളത്തോടു ചേര്‍ന്ന 5 ഏക്കര്‍ സര്‍ക്കാര്‍ ഭൂമി വിമാനത്താവള കൈമാറ്റത്തിന്റെ മറവില്‍ അദാനിക്ക് കൈമാറാനുള്ള നീക്കം നടക്കുന്നതായുള്ള റിപ്പോർട്ടുകളാണ് പുറത്ത് വരുന്നത്. ഒരു പ്രമുഖ മാധ്യമമാണ് ഇത് റിപ്പോർട്ട് ചെയ്യുന്നത്. എയര്‍ഇന്ത്യയ്ക്ക് സര്‍ക്കാര്‍പാട്ടത്തിന് നല്‍കിയ 15 ഏക്കര്‍ ഭൂമിയില്‍ നിന്നുള്‌ള 5 ഏക്കര്‍ ഭൂമിയാണിത്.

അതോടൊപ്പം തന്നെ വിമാനത്താവള അനുബന്ധ പ്രവര്‍ത്തനത്തിന് സര്‍ക്കാര്‍ അറിയാതെ പാട്ട വ്യവസ്ഥ ലംഘിച്ച്‌ എയര്‍ ഇന്ത്യ എയര്‍പോര്‍ട്ട് അതോറിറ്റി ഓഫ് ഇന്ത്യയ്ക്ക് ഉപയോഗിക്കാന്‍ നല്‍കിയ ഭുമിയാണിത്.

എയര്‍ഇന്ത്യയ്ക്ക് സര്‍ക്കാര്‍ നല്‍കിയ പാട്ടഭൂമി തിരിച്ചു പിടിക്കാന്‍ റവന്യൂ വകുപ്പ് നടപടി ഊര്‍ജ്ജിതമാക്കിയതിന് പിന്നാലെയാണ് അദാനിക്ക് സര്‍ക്കാര്‍ ഭൂമി കൈമാറാന്‍ വിമാനത്താവള അധികൃതര്‍ ത്വരിതപ്പെടുത്തിയത്.

കൂടാതെ കോടികള്‍ വിലയുള്ള വാഹനങ്ങളും എയര്‍പോര്‍ട്ട് അതോറിറ്റി ഓഫ് ഇന്ത്യ അദാനിക്ക് കൈമാറുന്നുണ്ട്. 5 കോടിയിലധികം വിലവരുന്ന സുരക്ഷാ വാഹനങ്ങള്‍ ഉദ്യോഗസ്ഥര്‍ ഉപയോഗിച്ചിരുന്ന വാഹനങ്ങള്‍ എന്നിവ ഉള്‍പ്പെടെയാണ് കൈമാറാൻ ഒരുങ്ങുന്നത്.

അതേസമയം തിരുവനന്തപുരം വിമാനത്താവള കൈമാറ്റത്തിനെതിരെ ജനകീയ പ്രക്ഷോഭം അവഗണിച്ചാണ് കേന്ദ്രസര്‍ക്കാര്‍ 50 വര്‍ഷത്തേക്ക് അദാനിക്ക് വിമാനത്താവളം കൈമാറിയത്. ഈ കൈമാറ്റത്തിന്റെ മറവിലാണ് ഇപ്പോള്‍ സര്‍ക്കാര്‍ ഭൂമിയും കൈമാറാനുള്ള ശ്രമം നടക്കുന്നത് എന്നത് ശ്രദ്ധേയമാണ്.