മുന് എംഎല്എ മുമ്പേ പോയി... ജില്ലാ കോണ്ഗ്രസ് അദ്ധ്യക്ഷന്മാരെ സമവായത്തിലൂടെ പ്രഖ്യാപിച്ചു; തിരുവനന്തപുരത്ത് പാലോട് രവിക്കെതിരെ പോസ്റ്റര് ഒട്ടിച്ചിട്ടും കാര്യമില്ല; എതിര്ത്ത മുന് എം.എല്.എ കെ.ശിവദാസന് നായരെയും മുന് കെ.പി.സി.സി ജനറല് സെക്രട്ടറി കെ.പി. അനില്കുമാറിനെയും സസ്പെന്ഡ് ചെയ്തു
പണ്ടെങ്ങുമില്ലാതെ പാര്ട്ടിക്കെതിരെ മിണ്ടിയവര്ക്കെതിരെ കടുത്ത നടപടിയാണ് കെപിസിസി അധ്യക്ഷന് കെ സുധാകരന് നടത്തിയിരിക്കുന്നത്. ഡി.സി.സി പുനഃസംഘടനയുമായി ബന്ധപ്പെട്ട് പാര്ട്ടി അച്ചടക്കം ലംഘിച്ച് ദൃശ്യമാദ്ധ്യമങ്ങളിലൂടെ പരസ്യപ്രതികരണം നടത്തിയ മുന് എം.എല്.എ കെ.ശിവദാസന് നായരെയും മുന് കെ.പി.സി.സി ജനറല് സെക്രട്ടറി കെ.പി. അനില്കുമാറിനെയും പാര്ട്ടിയില് നിന്നു താത്കാലികമായി സസ്പെന്ഡ് ചെയ്തതായി കെ.പി.സി.സി പ്രസിഡന്റ് കെ. സുധാകരന് എം.പി അറിയിച്ചു.
കോണ്ഗ്രസിലെ എ, ഐ ഗ്രൂപ്പുകളെ അനുനയിപ്പിക്കുന്നതിന്റെ ഭാഗമായി നേരത്തെ സംസ്ഥാന നേതൃത്വം കൈമാറിയ പട്ടികയില് മാറ്റം വരുത്തി ഹൈക്കമാന്ഡ് ഡി.സി.സി അദ്ധ്യക്ഷന്മാരെ പ്രഖ്യാപിച്ചു.
പാലോട് രവി (തിരുവനന്തപുരം),പി. രാജേന്ദ്ര പ്രസാദ് (കൊല്ലം)സതീഷ് കൊച്ചുപറമ്പില് (പത്തനംതിട്ട),ബി. ബാബുപ്രസാദ് (ആലപ്പുഴ), നാട്ടകം സുരേഷ് (കോട്ടയം),സി.പി. മാത്യു (ഇടുക്കി)മുഹമ്മദ് ഷിയാസ് (എറണാകുളം),ജോസ് വളളൂര് (തൃശൂര്),
എ.തങ്കപ്പന് (പാലക്കാട്),വി.എസ്.ജോയ് (മലപ്പുറം), കെ. പ്രവീണ്കുമാര് (കോഴിക്കോട്),എന്.ഡി. അപ്പച്ചന് (വയനാട്), മാര്ട്ടിന് ജോര്ജ്(കണ്ണൂര്),പി.കെ. ഫൈസല്(കാസര്കോട്) പുതിയഡി.സി.സി പ്രസിഡന്റുമാര്. രാത്രി സംഘടനാ ജനറല് സെക്രട്ടറി കെ.സി. വേണുഗോപാല് പട്ടിക പ്രഖ്യാപിക്കുകയായിരുന്നു.
ഇരു ഗ്രൂപ്പുകള്ക്കും സ്വീകാര്യമായ നിലയില് ഈഴവ, നായര്, ക്രിസ്ത്യന്, മുസ്ളീം സമുദായ സന്തുലനം ഉറപ്പാക്കിയെന്നാണ് പാര്ട്ടി നേതൃത്വം അവകാശപ്പെടുന്നത്. പക്ഷേ, വനിതാ, ദളിത് പ്രാതിനിദ്ധ്യമില്ല.
സോണിയാ ഗാന്ധിയുടെ നിര്ദ്ദേശ പ്രകാരം കേരളത്തിന്റെ ചുമതലയുള്ള ജന.സെക്രട്ടറി താരിഖ് അന്വര് സംസ്ഥാന നേതാക്കളുമായി ഫോണില് സംസാരിച്ച ശേഷമാണ് കെ.പി.സി.സി അദ്ധ്യക്ഷന് കെ.സുധാകരന് കൈമാറിയ പട്ടികയില് അവസാന നിമിഷം മാറ്റം വരുത്തിയത്. ആലപ്പുഴയിലും ഇടുക്കിയിലും കോട്ടയത്തുമാണ് മാറ്റം.
ആലപ്പുഴയില് ബി. ബാബു പ്രസാദിനെയും ഇടുക്കിയില് സി.പി. മാത്യുവിനെയും ഉള്പ്പെടുത്തി ഐ ഗ്രൂപ്പിനും കോട്ടയത്ത് നാട്ടകം സുരേഷിലൂടെ എ ഗ്രൂപ്പിനും പ്രാതിനിദ്ധ്യം ഉറപ്പാക്കി. ആലപ്പുഴയില് നേരത്തെ കെ.പി. ശ്രീകുമാറിനെയും കോട്ടയത്ത് ഫില്സണ് മാത്യൂസിനെയുമാണ് പരിഗണിച്ചിരുന്നത്.ഇടുക്കിയില് സി.പി.മാത്യുവിനെ നിയമിച്ചതിലൂടെ ക്രിസ്ത്യന് സന്തുലനം ഉറപ്പാക്കി.
ഇടുക്കിയില് കെ. എസ്. അശോകനെയാണ് പരിഗണിച്ചിരുന്നത്. പ്രതിഷേധം ഉയര്ന്നെങ്കിലും തിരുവനന്തപുരത്ത് പാലോട് രവിക്ക് നറുക്കു വീണു. മലപ്പുറത്ത് വി.എസ്. ജോയിയെ നിയമിക്കുന്നതിലും പ്രതിഷേധം ഉയര്ന്നിരുന്നു. പ്രായാധിക്യം ചൂണ്ടിക്കാട്ടിയുള്ള വിമര്ശനങ്ങള് തള്ളി കൊല്ലത്ത് കൊടിക്കുന്നില് സുരേഷ് എം.പിയുടെ നോമിനിയായ രാജേന്ദ്ര പ്രസാദിനെയും നിയമിച്ചു.
ഇതിന് പിന്നാലെയാണ് കെ.ശിവദാസന് നായര്ക്കും കെ.പി.അനില്കുമാറിനും സസ്പെന്ഷന് വന്നത്. ചാനല് ചര്ച്ചയിലെ വിമര്ശനങ്ങളുടെ പേരിലാണ് കെപിസിസി നടപടി. സസ്പെന്ഷന് പ്രഖ്യാപിച്ചതിന് പിന്നാലെ പൊട്ടിത്തെറിച്ച് കെപിസിസി ജനറല് സെക്രട്ടറി കെ.പി.അനില്കുമാര്.
സസ്പെന്ഷന് കയ്യില് വച്ചാല് മതി. സസ്പെന്ഡ് ചെയ്ത് പേടിപ്പിക്കേണ്ടെന്നും അനില്കുമാര് തുറന്നടിച്ചു. പട്ടികയിലുള്ള പകുതിയിലധികം പേരും നേതാക്കളുടെ പെട്ടിതൂക്കികളാണ്. ഡിസിസി ഓഫിസിലേക്ക് ജനം വരാന് പേടിക്കും. കച്ചവടക്കാരാണ് അവര്. കോണ്ഗ്രസിലെ പൂരം നാളെ തുടങ്ങും. കാണാനിരിക്കുന്നത് പറഞ്ഞറിയിക്കുന്നില്ലെന്നും നമുക്ക് കാണാമെന്നും കെ.പി.അനില്കുമാര് പറഞ്ഞു.
https://www.facebook.com/Malayalivartha
