കോണ്‍ഗ്രസിന് ജയിക്കാമായിരുന്ന നെടുമങ്ങാട് സീറ്റില്‍ പി.എസ്. പ്രശാന്തിന് നല്‍കി കളഞ്ഞ് കുളിച്ചതിന് പിന്നാലെ നേതാക്കളെ പോലും തള്ളി പറയുകയാണ്. അവസാനം കെ.പി.സി.സി സെക്രട്ടറിയും നിയമസഭ തിരഞ്ഞെടുപ്പില്‍ നെടുമങ്ങാട് മണ്ഡലത്തിലെ യു.ഡി.എഫ് സ്ഥാനാര്‍ത്ഥിയുമായിരുന്ന പി.എസ്. പ്രശാന്തിനെ കോണ്‍ഗ്രസില്‍ നിന്ന് പുറത്താക്കി. നെടുമങ്ങാട്ടെ തോല്‍വിയുടെ പേരില്‍ തിരുവനന്തപുരത്തെ നിയുക്ത ഡി.സി.സി പ്രസിഡന്റ് പാലോട് രവിക്കെതിരെ ഉള്‍പ്പെടെ നേരത്തേ പരസ്യവിമര്‍ശനമുന്നയിച്ചതിന്റെ പേരില്‍ സസ്‌പെന്‍ഷനിലായിരുന്നു. അന്ന് ഡി.സി.സി പ്രസിഡന്റുമാരെ പ്രഖ്യാപിച്ചിട്ടുണ്ടായിരുന്നില്ല.

ഇന്നലെ എ.ഐ.സി.സി ജനറല്‍സെക്രട്ടറി കെ.സി. വേണുഗോപാലിനെതിരെ പ്രശാന്ത് രൂക്ഷവിമര്‍ശനമുയര്‍ത്തി. വേണുഗോപാല്‍ ബി.ജെ.പി ഏജന്റാണെന്നായിരുന്നു വിമര്‍ശനം. വേണുഗോപാലിനെതിരെ രാഹുല്‍ഗാന്ധിക്ക് കത്തുമയച്ചു. ഇതേതുടര്‍ന്നാണ് ഇന്നലെ വൈകിട്ടോടെ പുറത്താക്കിയത്.

തെറ്റു തിരുത്താന്‍ തയ്യാറാകാതെ വീണ്ടും അടിസ്ഥാനരഹിതമായ ആരോപണങ്ങള്‍ ഉന്നയിച്ചതിനാണ് പുറത്താക്കുന്നതെന്ന് കെ.പി.സി.സി പ്രസിഡന്റ് കെ. സുധാകരന്‍ അറിയിച്ചു. പാര്‍ട്ടിയെയും പാര്‍ട്ടി നേതാക്കളെയും അപകീര്‍ത്തിപ്പെടുത്താന്‍ ആരെയും അനുവദിക്കില്ലെന്നും സുധാകരന്‍ വ്യക്തമാക്കി.

പുതിയ ഡി.സി.സി പ്രസിഡന്റുമാരുടെ പ്രഖ്യാപനത്തെ അനുകൂലിച്ചും എതിര്‍ത്തും കോണ്‍ഗ്രസില്‍ ചേരിപ്പോര് രൂക്ഷമായി തുടരവേ, മുന്‍ എം.എല്‍.എയും മുതിര്‍ന്ന നേതാവും മുന്‍ ഡി.സി.സി പ്രസിഡന്റുമായ എ.വി.ഗോപിനാഥ് പാര്‍ട്ടിയുടെ പ്രാഥമിക അംഗത്വം രാജിവച്ചു. വികാരാധീനനായിട്ടായിരുന്നു വാര്‍ത്താസമ്മേളനത്തില്‍ രാജി പ്രഖ്യാപനം.

50 വര്‍ഷം നീണ്ട കോണ്‍ഗ്രസ് ബന്ധം അവസാനിപ്പിച്ചു. പാര്‍ട്ടിക്ക് വേണ്ടിയാണ് ജീവിതം ഉഴിഞ്ഞുവച്ചത്. മനസിനെ തളര്‍ത്തുന്ന സംഭവങ്ങള്‍ നേതാക്കളില്‍ നിന്നുണ്ടായി. പാര്‍ട്ടിയുടെ മുന്നോട്ടുപോക്കിന് താന്‍ തടസമാകുമോ എന്ന ഭീതിയാണ് തീരുമാനത്തിന് പിന്നില്‍. പ്രതീക്ഷ ഇല്ലാത്ത യാത്ര അവസാനിപ്പിക്കാന്‍ മനസ് പറയുന്നുവെന്ന് ഗോപിനാഥ് പറഞ്ഞു. ഡി.സി.സി പ്രസിഡന്റുമാരെച്ചൊല്ലിയുയര്‍ന്ന തര്‍ക്കത്തില്‍ കോണ്‍ഗ്രസ് വിടുന്ന ആദ്യനേതാവായി ഗോപിനാഥ്.

അതേസമയം, വാര്‍ത്താസമ്മേളനത്തില്‍ മുഖ്യമന്ത്രി പിണറായി വിജയനെ പ്രകീര്‍ത്തിച്ചതും ശ്രദ്ധേയമായി. എന്നാല്‍, സി.പി.എമ്മിലേക്കോ മറ്റേതേങ്കിലും പാര്‍ട്ടിയിലേക്കോ പോകുന്നതിനെക്കുറിച്ചുള്ള സൂചനയൊന്നും നല്‍കിയില്ല. പാര്‍ട്ടിയെ ഹൃദയത്തില്‍ നിന്നിറക്കാന്‍ സമയമെടുക്കും. ഇപ്പോള്‍ ഒരു പാര്‍ട്ടിയിലേക്കും പോകുന്നില്ല. നല്ല പ്രകാശം മുന്നില്‍ കാണുമെന്ന ഉത്തമ വിശ്വാസത്തിലാണ് തുടര്‍യാത്ര ആരംഭിക്കുന്നത്, എന്നായിരുന്നു ഇതേക്കുറിച്ചുള്ള പ്രതികരണം.

കെ.പി.സി.സി പ്രസിഡന്റ് കെ.സുധാകരന്‍ അനുനയശ്രമം തുടങ്ങിയിട്ടുണ്ട്. ഗോപിനാഥിനെ ഇടതുപാളയത്തിലെത്തിക്കാന്‍ സി.പി.എമ്മും എന്‍.സി.പിയും അണിയറ നീക്കം ശക്തമാക്കി. സി.പി.എമ്മില്‍ ചേരുമെന്ന അഭ്യൂഹം ശക്തമാണ്. ഗോപിനാഥിനെ പാലക്കാട് ഡി.സി.സി അദ്ധ്യക്ഷനാക്കണമെന്നാവശ്യപ്പെട്ട് അദ്ദേഹത്തെ അനുകൂലിക്കുന്നവര്‍ നേരത്തെ രംഗത്തെത്തിയിരുന്നു. പരിഗണിക്കരുതെന്ന് ആവശ്യപ്പെട്ട് ഒട്ടെറെപ്പേര്‍ എ.ഐ.സി.സിക്കും കെ.പി.സി.സിക്കും കത്തയച്ചിരുന്നു.

സീറ്റിനെച്ചൊല്ലിയും ഇടഞ്ഞുനിയമസഭാ തിരഞ്ഞെടുപ്പ് സമയത്ത് പാലക്കാട് സീറ്റിനെച്ചൊല്ലി ഗോപിനാഥ് കോണ്‍ഗ്രസ് നേതൃത്വവുമായി പരസ്യമായി ഇടഞ്ഞിരുന്നു. ഉമ്മന്‍ചാണ്ടി ഉള്‍പ്പെടെയുള്ളവര്‍ ഇടപെട്ടാണ് അനുനയിപ്പിച്ചത്. മുന്‍ ആലത്തൂര്‍ എം.എല്‍.എയാണ്. പതിറ്റാണ്ടോളം പെരിങ്ങോട്ടുകുറുശ്ശി പഞ്ചായത്ത് പ്രസിഡന്റായിരുന്നു. നിലവില്‍ അവിടെ മെമ്പര്‍. കോണ്‍ഗ്രസിലെ ഒരു സ്ഥാനവും ആവശ്യമില്ല. സമ്മര്‍ദ്ദ തന്ത്രത്തിന്റെ ഭാഗമല്ല രാജി എന്നുമാണ് എ.വി.ഗോപിനാഥ് പറയുന്നത്.