ഒരു യുവാവിന്റെ കാടത്തരത്തില്‍ ഒരു കുടുംബത്തിന്റെ പ്രതീക്ഷ മുഴുവന്‍ പോയി. വീട്ടില്‍ അതിക്രമിച്ച് കയറി യുവാവ് കത്തികൊണ്ട് ആക്രമിച്ച യുവതി മരിച്ചു. തിരുവനന്തപുരം നെടുമങ്ങാട് സ്വദേശിനി സൂര്യഗായത്രി (20) ആണ് മരിച്ചത്. തിരുവനന്തപുരം മെഡിക്കല്‍ കോളേജ് ആശുപത്രിയില്‍ ചികിത്സയിലായിരുന്നു യുവതി. തിങ്കളാഴ്ച ഉച്ചയക്ക് രണ്ട് മണിയോടെയാണ് സംഭവം നടന്നത്. സൂര്യഗായത്രിയും അച്ഛനും അമ്മയും വാടകയ്ക്ക് താമസിച്ചിരുന്ന നെടുമങ്ങാട് കരുപ്പൂരെ വീട്ടിലെത്തിയായിരുന്നു ആക്രമണം.

ശാരീരികവെല്ലുവിളികളുള്ള വ്യക്തികളാണ് സൂര്യയുടെ അച്ഛനും അമ്മയും. ഇവരേയും അരുണ്‍ അക്രമിച്ചിരുന്നു. യുവാവിന്റെ കാടത്തത്തില്‍ ശരീരമാസകലം കുത്തേറ്റുവീണ സൂര്യഗായത്രി അച്ഛനമ്മമാരുടെ പ്രതീക്ഷയായിരുന്നു. സൂര്യഗായത്രിയുടെ മനോബലമായിരുന്നു ശാരീരികവൈകല്യം ബാധിച്ച മാതാപിതാക്കളെ മുന്നോട്ടു നയിച്ചിരുന്നത്.

തിങ്കളാഴ്ച ഉച്ചയോടെയാണ് ഇവര്‍ വാടകയ്ക്ക് താമസിക്കുന്ന വീട്ടില്‍ നിന്നും നിലവിളി ഉയര്‍ന്നുകേട്ടത്. അടുക്കളവാതിലിലൂടെ അകത്തുകടന്ന അരുണ്‍, സൂര്യയെ തലങ്ങുംവിലങ്ങും കുത്തുകയായിരുന്നു. മകളെ ആക്രമിക്കുന്നതുകണ്ട അമ്മ വത്സല തടയാന്‍ ശ്രമിക്കുന്നതിനിടെ അമ്മയെയും അരുണ്‍ കുത്തി. പുറത്ത് കസേരയിലിരിക്കുകയായിരുന്ന അച്ഛന്‍ ശിവദാസനെയും അരുണ്‍ ക്രൂരമായി മര്‍ദിച്ചു. സൂര്യയുടെ തലമുതല്‍ കാല്‍ വരെ പതിനേഴ് ഇടങ്ങളിലാണ് അരുണ്‍ കുത്തിയത്.

തല ചുമരില്‍ ഇടിച്ച് പലവട്ടം മുറിവേല്‍പ്പിച്ചു. സൂര്യ അബോധാവസ്ഥയിലായിട്ടും ഇയാള്‍ വീണ്ടും വീണ്ടും കുത്തി. അയല്‍ക്കാരുടെ നിലവിളി ഉയര്‍ന്നതോടെ അരുണ്‍ ഓടി സമീപത്തെ വീട്ടിലെ ടെറസില്‍ ഒളിക്കാന്‍ ശ്രമിച്ചു. ഇവിടെ നിന്നുമാണ് നെടുമങ്ങാട് പോലീസ് ഇയാളെ അറസ്റ്റുചെയ്തത്. വഞ്ചിയൂര്‍, ആര്യനാട്, പേരൂര്‍ക്കട സ്‌റ്റേഷനുകളില്‍ അരുണിനെതിരേ നിരവധി കേസുകള്‍ നിലവിലുണ്ടെന്ന് പോലീസ് പറയുന്നു.

ആക്രമണത്തിനിടയില്‍ കൈവിരലിന് പരിക്കേറ്റ പ്രതി പേയാട് സ്വദേശി അരുണിനെ (28) പൊലീസ് കസ്റ്റഡിയിലെടുത്ത് ആശുപതിയില്‍ പ്രവേശിപ്പിച്ചു. ആര്യനാട്, മ്യൂസിയം സ്‌റ്റേഷനുകളിലായി നിരവധി പിടിച്ചുപറി, മാല മോഷണ കേസുകളില്‍ പ്രതിയാണ് അരുണെന്ന് പൊലീസ് പറഞ്ഞു.

വീടിന്റെ ഉമ്മറത്ത് ഇരിക്കുകയായിരുന്ന അമ്മ വത്സലയുടെ വായ പൊത്തിപ്പിടിച്ച അരുണ്‍ കത്തി ഉപയോഗിച്ച് കൈകളില്‍ കുത്തിപ്പരിക്കേല്പിച്ചു. സമീപത്തെ മേശയിലടിച്ച് വത്സല ശബ്ദമുണ്ടാക്കിയതിനെ തുടര്‍ന്ന് ഓടിയെത്തിയ സൂര്യയെ കഴുത്തിലും വയറ്റിലും തുടയിലും കാലിലും തുരുതുരെ കുത്തി. തുടര്‍ന്ന് തലമുടിയില്‍ ചുറ്റിപ്പിടിച്ച് ചുമരില്‍ ഇടിച്ച് തല പൊട്ടിച്ചു. തടയാന്‍ ശ്രമിച്ച ശിവദാസനും പരിക്കേറ്റു.

ലോട്ടറി ടിക്കറ്റ് വില്പന നടത്തുന്ന 20കാരിയെയും വികലാംഗയായ അമ്മയെയും വീട്ടില്‍ അതിക്രമിച്ചു കയറി ക്രൂരമായി കുത്തിപ്പരിക്കേല്പിച്ച യുവാവിനെ നാട്ടുകാരും പൊലീസും ചേര്‍ന്ന് പിടികൂടി. ഇവരെ വലിയമല പൊലീസാണ് തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്.

രണ്ടു വര്‍ഷം മുമ്പ് കൊല്ലം സ്വദേശിയായ യുവാവുമായി വിവാഹം കഴിഞ്ഞ സൂര്യ, കുടുംബ പ്രശ്‌നങ്ങളെ തുടര്‍ന്ന് വാടകവീട്ടില്‍ രക്ഷിതാക്കളോടൊപ്പം താമസിക്കുകയാണ്. നെടുമങ്ങാട് കല്ലിംഗല്‍ ജംഗ്ഷനിലെ ബിവറേജസ് ഔട്ട് ലെറ്റിന് മുന്നിലാണ് ഇവരുടെ ലോട്ടറിക്കട. സൂര്യയും അരുണും തമ്മില്‍ സുഹൃത് ബന്ധം ഉള്ളതായി സൂചന ലഭിച്ചെന്നും ആക്രമണത്തിന്റെ കാരണങ്ങള്‍ അന്വേഷിച്ചുവരികയാണെന്നും വലിയമല പൊലീസ് പറഞ്ഞു.