തിരുവനന്തപുരം നെടുമങ്ങാട് യുവാവ് വീട്ടില്‍ കയറി കുത്തി പരിക്കേല്‍പ്പിച്ച യുവതി സൂര്യഗായത്രി(20) മരിച്ചതോടെ തലസ്ഥാനം ചൂട് പിടിക്കുകയാണ്. തിരുവനന്തപുരം മെഡിക്കല്‍ കോളേജില്‍ അത്യാഹിത വിഭാഗത്തില്‍ ചികിത്സയില്‍ കഴിയവെയാണ് യുവതി മരിച്ചത്. 17 ഓളം കുത്തുകളേറ്റ യുവതിയെ അടിയന്തര ശസ്ത്രക്രിയയ്ക്ക് വിധേയമാക്കിയെങ്കിലും ഇന്ന് രാവിലെയോടെ നില വഷളാകുകയും മരണം സംഭവിക്കുകയുമായിരുന്നു.

സൂര്യഗായത്രി താമസിക്കുന്ന ഉഴപ്പാ കോണത്തെ വാടക വീട്ടില്‍ എത്തിയ യുവതിയുടെ ആണ്‍സുഹൃത്തും പേയാട് ചിറക്കോണം സ്വദേശിയുമായ അരുണ്‍ കുത്തി പരിക്കേല്‍പ്പിക്കുകയായിരുന്നു.

നെഞ്ചിലും കഴുത്തിലും ഉള്‍പ്പെടെ 17ല്‍ പരം കുത്തുകള്‍ ഏറ്റ സൂര്യഗായത്രി ഗുരുതര പരിക്കുകളോടെ ആയിരുന്നു മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്. അടിയന്തര ശസ്ത്രക്രിയ ഉള്‍പ്പെടെ നടത്തിയെങ്കിലും ഇന്ന് പുലര്‍ച്ചെ മരണം സ്ഥിരീകരിക്കുകയായിരുന്നു.

പെണ്‍കുട്ടിയെ രക്ഷിക്കാന്‍ ശ്രമിക്കുന്നതിനിടയില്‍ അമ്മ വത്സലയ്ക്കും പരിക്ക് പറ്റിയിരുന്നു, വികലാംഗ കൂടിയായ ഇവരും ചികിത്സയിലാണ്.

യുവാവിനെ പ്രകോപിപ്പിച്ച കാരണമെന്താണെന്ന് ഇപ്പോഴും പിടികിട്ടിയിട്ടില്ല. ഭര്‍ത്താവുമായി പിണങ്ങി കഴിഞ്ഞ ആറ് മാസക്കാലമായി മാതാപിതാക്കളോട് ആയിരുന്നു സൂര്യഗായത്രി കഴിഞ്ഞു വന്നിരുന്നത് എന്നാണ് നാട്ടുകാര്‍ പറയുന്നത്.

സൂര്യഗായത്രിയുടെ വീടിന്റെ പിന്‍വാതിലിലൂടെയാണ് അരുണ്‍ വീടിനുള്ളില്‍ പ്രവേശിച്ചതും, ആക്രമണം നടത്തിയതും നിലവിളി കേട്ട് പരിസരവാസികളും നാട്ടുകാരും ഓടിയെത്തിയപ്പോഴേക്കും അരുണ്‍ ഓടിരക്ഷപ്പെടുകയായിരുന്നു. തുടര്‍ന്ന് ഒരു വീടിന്റെ ശുചിമുറിയില്‍ ഒളിച്ചിരുന്ന് പ്രതിയെ നാട്ടുകാര്‍ പിടികൂടി വലിയമല പോലീസില്‍ കൈമാറുകയായിരുന്നു.

കൈമാറുന്ന സമയം അരുണിന്റ കൈക്കും പരിക്കേറ്റ ഇരുന്നു. അരുണ്‍ പോലീസ് നിരീക്ഷണത്തില്‍ നെടുമങ്ങാട് ആശുപത്രിയില്‍ ചികിത്സയിലാണ്. വരും മണിക്കൂറുകളില്‍ കൊലപാതകകുറ്റം ഉള്‍പ്പെടെ ചുമത്തി പ്രതിയുടെ അറസ്റ്റ് രേഖപ്പെടുത്തും

ഷൂട്ടിംഗ് മേഖലയില്‍ പ്രവര്‍ത്തിച്ചുവരുന്ന അരുണും സൂര്യഗായത്രിയും തമ്മില്‍ വലിയ സൗഹൃദമുണ്ടായിരുന്നതായി പറയുന്നു. എന്നാല്‍ ഈ സമയം മറ്റൊരു യുവാവിനെ പ്രണയിച്ച് സൂര്യഗായത്രി വിവാഹിതയാവുകയായിരുന്നു. എന്നാല്‍ ഈ ദാമ്പത്യം സുഖകരമായിരുന്നില്ല.

എന്നാല്‍ യുവതിയുമായുള്ള സൗഹൃദം നാട്ടില്‍ അറിഞ്ഞ അരുണിന് മറ്റു വിവാഹങ്ങള്‍ ഒന്നും നടക്കാതിരുന്നത് അസ്വസ്ഥനാക്കിയിരുന്നു , പലപ്പോഴും പൊതു ഇടങ്ങളില്‍ വച്ച് കാണുമ്പോള്‍ സൂര്യഗായത്രി അരുണുമായി വാക്കേറ്റം നടത്തുന്നത് പതിവായിരുന്നുഎന്നും, ഇതിലെ പ്രകോപനമാണ് ആക്രമണം നടത്താന്‍ തന്നെ പ്രേരിപ്പിച്ചതെന്നാണ് അരുണ്‍ പോലീസിനു നല്‍കിയ മൊഴി.

സംഭവത്തെക്കുറിച്ച് കൂടുതല്‍ അന്വേഷിച്ചുവരുന്നുവെന്നും, പ്രതിയെ കസ്റ്റഡിയിലെടുത്ത് ചോദ്യം ചെയ്താല്‍ മാത്രമേ വ്യക്തതവരൂ എന്ന് പോലീസ് പറഞ്ഞു.