കണ്ണീര്‍ക്കടലായി.... അഴീക്കല്‍ തുറമുഖത്തിന് സമീപം തീരക്കടലില്‍ മീന്‍പിടിക്കുന്നതിനിടെ അതി ശക്തമായ തിരയില്‍ പെട്ട് വള്ളം മറിഞ്ഞ് നാലു പേര്‍ മരിച്ചു.... ഒമ്പതു പേര്‍ നീന്തി രക്ഷപ്പെട്ടു, മൂന്നു പേരെ രക്ഷപ്പെടുത്തി, തീരത്തു നിന്ന് 1.85 കിലോമീറ്റര്‍ അകലെയായിരുന്നു അപകടം നടന്നത്. നാലു പേരുടെയും വേര്‍പാട് താങ്ങാനാവാതെ ഉറ്റവരും ബന്ധുക്കളും നാട്ടുകാരും.

ആലപ്പുഴ ആറാട്ടുപുഴ തറയില്‍ക്കടവ് തട്ടാശേരില്‍ സുദേവന്‍ (55), കൊച്ചോണ്ടലില്‍ പടീറ്റതില്‍ ശ്രീകുമാര്‍ (50),നെടിയത്ത് തങ്കപ്പന്‍ (70), പറത്തറയില്‍ സുനില്‍ദത്ത് (24) എന്നിവരാണ് മരിച്ചത്. സുനില്‍ദത്ത് നീന്തി തീരത്തോട് അടുത്തെത്തിയശേഷമാണ് തിരമാലയില്‍ അകപ്പെട്ട് മരണത്തിന് കീഴടങ്ങിയത്.

വലിയഴീക്കല്‍ തറയില്‍ക്കടവ് സ്വദേശികളായ ഒതളത്തുംമൂട്ടില്‍ തരുണ്‍ (29), കാട്ടില്‍ അരവിന്ദന്‍ (68), കാട്ടില്‍ അനീഷ് (40), വൈദ്യന്റെ പടീറ്റതില്‍ റിജു കുമാര്‍ (48), കൂട്ടിന്റെ പടീറ്റതില്‍ സോമന്‍ (57), തട്ടാനത്ത് ഭാനു (60), കുറുങ്ങാട്ട് തറയില്‍ ബിജു പൊന്നപ്പന്‍ (44) എന്നിവരെ പരിക്കുകളോടെ കരുനാഗപ്പള്ളി താലൂക്ക് ആശുപത്രിയിലും തട്ടാനത്ത് രമണന്‍ (65) പറത്തറയില്‍ ബൈജു (35), കാട്ടേക്കാട് അക്ഷയകുമാര്‍ (51), കാട്ടില്‍ സജീവന്‍ (48) എന്നിവരെ കായംകുളം താലൂക്ക് ആശുപത്രിയിലും തെക്കേപ്പുറത്ത് ഉമേഷിനെ (40) ആലപ്പുഴ മെഡി. കോളേജ് ആശുപത്രിയിലും പ്രവേശിപ്പിച്ചു.


രക്ഷാപ്രവര്‍ത്തനത്തിനിടെ പരിക്കേറ്റ രഞ്ജിത്ത് കരുനാഗപ്പള്ളി താലൂക്ക് ആശുപത്രിയില്‍ ചികിത്സയിലാണ്.ഇന്നലെ രാവിലെ 9.30ഓടെയാണ് ദുരന്തമുണ്ടായത്. തറയില്‍ക്കടവ് സ്വദേശി അനീഷ് അരവിന്ദന്റെ 'ഓംകാര'മെന്ന വള്ളം പുലര്‍ച്ചെ 5 മണിയോടെ തറയില്‍ക്കടവ് അമ്പലവളവിലുള്ള കടവില്‍ നിന്നാണ് പുറപ്പെട്ടത്.

വലിയ വള്ളത്തില്‍ 13 പേരും കാരിയര്‍ വള്ളത്തില്‍ 3 പേരും ഉണ്ടായിരുന്നു. ശക്തമായ തിരകളില്‍ വലിയ വള്ളം മറിയുകയായിരുന്നു. കാരിയര്‍ വള്ളത്തിലെ തൊഴിലാളികള്‍ ഇവരെ രക്ഷിക്കാന്‍ ശ്രമിക്കുന്നതിനിടെ ആ വള്ളവും മറിഞ്ഞു. ഒന്‍പതുപേര്‍ നീന്തി കരയ്‌ക്കെത്തി. മൂന്നുപേരെ 'യോഗീശ്വരന്‍' വള്ളത്തിലുണ്ടായിരുന്നവര്‍ രക്ഷിച്ചു. കോസ്റ്റ് ഗാര്‍ഡും മറ്റ് മത്സ്യത്തൊഴിലാളികളും രക്ഷാപ്രവര്‍ത്തനത്തിനിറങ്ങി.


വള്ളവും വലയും മത്സ്യത്തൊഴിലാളികള്‍ കെട്ടിവലിച്ച് കരയില്‍ കയറ്റി. മരിച്ചവരുടെ ആശ്രിതര്‍ക്ക് അടിയന്തര സഹായമായി 10,000 രൂപയും ചികിത്സയില്‍ കഴിയുന്നവര്‍ക്ക് 5,000 രൂപയും ഉടന്‍ നല്‍കുമെന്ന് മന്ത്രി സജി ചെറിയാന്‍ അറിയിച്ചു.