പ്രതിശ്രുത വരനൊപ്പം ബൈക്കില്‍ യാത്രചെയ്യുന്നതിനിടെ ബസിനടിയിലേക്ക് വീണ് യുവതിക്ക് ദാരുണാന്ത്യം
പ്രതിശ്രുത വരനൊപ്പം ബൈക്കില്‍ യാത്രചെയ്യുന്നതിനിടെ കെ.എസ്.ആര്‍.ടി.സി ബസിനടിയിലേക്ക് വീണ് യുവതിക്ക് ദാരുണാന്ത്യം. മാമ്മൂട് വളവുകുഴി കരിങ്ങണാമറ്റം സണ്ണിയുടെയും ബിജിയുടെയും ഏകമകള്‍ സുബി ജോസഫാണ് (25) മരിച്ചത്. വാഴൂര്‍ റോഡില്‍ പൂവത്തുംമൂടിന് സമീപം ചൊവ്വാഴ്ച വൈകീട്ട് 5.35 നായിരുന്നു അപകടം. ഇവര്‍ സഞ്ചരിച്ചിരുന്ന ബൈക്കിനെ കെ.എസ്.ആര്‍.ടി.സി ബസ് മറികടക്കുന്നതിനിടെയായിരുന്നു അപകടം.
സംഭവത്തെക്കുറിച്ച് പൊലീസ് പറയുന്നതിങ്ങനെ: പ്രതിശ്രുത വരനൊപ്പം ചങ്ങനാശ്ശേരിയിലേക്ക് വരികയായിരുന്നു സുബി. കുമളിയില്‍നിന്ന് കായംകുളത്തേക്ക് വരികയായിരുന്ന കെ.എസ്.ആര്‍.ടി.സി ബസ് പൂവത്തുമൂടിന് സമീപത്തുവെച്ച് ഇവരുടെ ബൈക്കിനെ ഓവര്‍ടേക്ക് ചെയ്യാന്‍ ശ്രമിച്ക്കുചു. അതിനിടെ തെന്നിമറിഞ്ഞ ബൈക്കിന്റെ പിന്നില്‍നിന്ന് സുബി ബസിനടിയിലേക്ക് വീഴുകയായിരുന്നു. ബസിന്റെ പിന്‍ചക്രം സുബിയുടെ തലയിലൂടെ കയറിയതായി പൊലീസ് പറഞ്ഞു.
സമീപത്തെ സി.സി.ടി.വി കാമറയില്‍നിന്നുള്ള ദൃശ്യങ്ങള്‍ പൊലീസിന് ലഭിച്ചിട്ടുണ്ട്. അപകടത്തെ തുടര്‍ന്ന് ബഹളംകേട്ട് നാട്ടുകാരും വഴിയാത്രക്കാരും ഓടിയെത്തിയെങ്കിലും തല പൂര്‍ണമായി തകര്‍ന്ന നിലയിലായിരുന്നു. തുടര്‍ന്ന് പൊലീസിലും ഫയര്‍ഫോഴ്‌സിലും നാട്ടുകാര്‍ വിവരം അറിയിച്ചു. മുക്കാല്‍ മണിക്കൂറോളം മൃതദേഹം റോഡില്‍ കിടന്നു. നാട്ടുകാര്‍ ചേര്‍ന്നാണ് യുവതിയുടെ മൃതദേഹം ആംബുലന്‍സിലേക്ക് മാറ്റിയത്. മൃതദേഹം കോട്ടയം മെഡിക്കല്‍ കോളജ് ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. പോസ്റ്റ്‌മോര്‍ട്ടത്തിനുശേഷം ബന്ധുക്കള്‍ക്ക് വിട്ടുനല്‍കും.
https://www.facebook.com/Malayalivartha
