വയസാംകാലത്തെ ഏടാകൂടം... പലരും സരിതയ്‌ക്കെതിരെ പറ്റിച്ചെന്ന് പരാതി പറയുമ്പോള്‍ തന്നെ പറ്റിച്ചെന്ന പരാതിയുമായി സരിത എസ് നായര്‍; 40 ലക്ഷം രൂപ കൈക്കൂലിയായി വാങ്ങിയെന്ന സരിത എസ് നായരുടെ പരാതിയില്‍ ആര്യാടന്‍ മുഹമ്മദിനെതിരെ വിജിലന്‍സ് അന്വേഷണം; വിജിലന്‍സ് കേസിന് ഗവര്‍ണറുടെ അനുമതി തേടും
ഒരിടവേളയ്ക്ക് ശേഷം സരിത എസ് നായര്‍ വീണ്ടും കളം നിറയുകയാണ്. സരിത പറ്റിച്ചെന്ന നിരവധി പരാതികളില്‍ കേസുകള്‍ നടക്കുകയാണ്. അതിനിടെ തന്നെ പറ്റിച്ചെന്ന പരാതിയുമായി സാക്ഷാല്‍ സരിത തന്നെ രംഗത്തെത്തിയിരിക്കുകയാണ്. മുന്‍ വൈദ്യുതി മന്ത്രിയും മുതിര്‍ന്ന കോണ്‍ഗ്രസ് നേതാവുമായ ആര്യാടന്‍ മുഹമ്മദിനെതിരെയാണ് പരാതി.
ഈ പരാതിയില്‍ ഇപ്പോള്‍ ട്വസ്റ്റ് ഉണ്ടായിരിക്കുകയാണ്. ആര്യാടന്‍ മുഹമ്മദിനെതിരെ വിജിലന്‍സ് അന്വേഷണത്തിന് മന്ത്രിസഭാ തീരുമാനം. വൈദ്യുതി മന്ത്രിയായിരിക്കെ 40 ലക്ഷം രൂപ കൈക്കൂലിയായി വാങ്ങിയെന്ന സോളര്‍ കേസ് പ്രതി സരിത എസ്. നായരുടെ പരാതിയിലാണ് പ്രാഥമിക അന്വേഷണം നടത്താന്‍ തീരുമാനമായത്.
കൈക്കൂലി വാങ്ങിയെന്ന കാര്യം സോളര്‍ കമ്മിഷന്റെ അന്വേഷണ പരിധിയിലും വന്നിരുന്നു. എന്നാല്‍ പരാതിയില്‍മേല്‍ തുടര്‍നടപടികളൊന്നും ഉണ്ടായില്ലെന്ന് കാണിച്ച് സരിത മുഖ്യമന്ത്രിക്ക് പരാതി നല്‍കി. ഇക്കാര്യം മന്ത്രിസഭ പരിഗണിക്കുകയും പ്രാഥമിക അന്വേഷണത്തിന് അനുമതി നല്‍കുകയുമായിരുന്നു. തുടര്‍നടപടികള്‍ വിജിലന്‍സ് വകുപ്പ് സ്വീകരിക്കും.
അങ്ങനെയാണ് ആര്യാടന്‍ മുഹമ്മദിനെതിരെ വിജിലന്‍സ് കേസെടുക്കുന്നതിനു ഗവര്‍ണറുടെ അനുമതി തേടാന്‍ മന്ത്രിസഭ തീരുമാനിച്ചത്. സോളര്‍ കേസ് പ്രതി സരിത എസ്.നായരുടെ പരാതിയുടെ അടിസ്ഥാനത്തില്‍ നടത്തിയ പ്രാഥമിക അന്വേഷണത്തില്‍ ആര്യാടന്‍ അഴിമതി നടത്തിയെന്നു വിലയിരുത്തുകയും കേസെടുക്കാന്‍ അനുമതി തേടി വിജിലന്‍സ് ഡയറക്ടര്‍ സര്‍ക്കാരിനു കത്തു നല്‍കുകയും ചെയ്തിരുന്നു. ഇതിന്റെ അടിസ്ഥാനത്തിലാണു മന്ത്രിസഭാ തീരുമാനം. ഗവര്‍ണര്‍ അനുമതി നല്‍കിയാല്‍ കേസെടുത്തു വിജിലന്‍സ് വിശദ അന്വേഷണത്തിലേക്കു കടക്കും.
മന്ത്രിയായിരിക്കെ സോളര്‍ പദ്ധതികളുടെ അനുമതിക്കായി തന്നില്‍ നിന്നു 2 തവണയായി 40 ലക്ഷം രൂപ കൈപ്പറ്റിയെന്നു സരിത പ്രത്യേക അന്വേഷണ സംഘത്തിനും സോളര്‍ കമ്മിഷനും മൊഴി നല്‍കിയിരുന്നു. 2016ല്‍ സോളര്‍ റിപ്പോര്‍ട്ട് പ്രസിദ്ധീകരിച്ചതിനു പിന്നാലെ ഈ മൊഴിയുടെ അടിസ്ഥാനത്തില്‍ ആര്യാടനെതിരെ വിജിലന്‍സ് അന്വേഷണത്തിനു സര്‍ക്കാര്‍ നിര്‍ദേശിച്ചു. അന്നു തുടങ്ങിയ പ്രാഥമിക അന്വേഷണമാണ് ഇപ്പോള്‍ പൂര്‍ത്തിയാക്കി കേസെടുക്കാന്‍ സര്‍ക്കാരിന്റെ അനുമതി തേടിയത്. സരിതയില്‍ നിന്നും ആര്യാടനില്‍ നിന്നുമടക്കം വിജിലന്‍സ് മൊഴി ശേഖരിച്ചിരുന്നു.
അതേസമയം തനിക്കെതിരെ വിജിലന്‍സ് അന്വേഷണത്തിന് ഉത്തരവിട്ട സര്‍ക്കാര്‍ നടപടിയെ നിയമപരമായി നേരിടുമെന്നു മുന്‍ മന്ത്രി ആര്യാടന്‍ മുഹമ്മദ്. ഇതേ ആരോപണത്തില്‍ സ്വകാര്യ അന്യായത്തിന്റെ അടിസ്ഥാനത്തില്‍ നടത്തിയ വിജിലന്‍സ് അന്വേഷണം നേരത്തെ ഹൈക്കോടതി റദ്ദാക്കിയതാണ്. പിന്നീട് വിജിലന്‍സ് ഡിവൈഎസ്പിയുടെ നേതൃത്വത്തില്‍ അന്വേഷണം പ്രഖ്യാപിച്ചു. അത് എവിടെ വരെയെത്തിയെന്ന് അറിയില്ലെന്നും ആര്യാടന്‍ പറഞ്ഞു.
രാഷ്ട്രീയപരമായി ആര്യാടന്‍ മുഹമ്മദിന് വളരെയേറെ ദോഷം ചെയ്യുന്നതാണ് ഈ കേസ്. വയസാം കാലത്ത് ഇങ്ങനെയൊരു കേസ് കുത്തിപ്പൊക്കുമെന്ന് ആര്യാടന്‍ സ്വപ്നത്തില്‍ പോലും വിചാരിച്ചില്ല. സോളാര്‍ കേസിന്റെ ആദ്യ ഘട്ടത്തില്‍ തന്നെ ആര്യാടന്‍ മുഹമ്മദിനെ പറ്റി വലിയ ആരോപണങ്ങളാണ് വന്നത്. എന്നാല്‍ എല്ലാവരും രക്ഷപ്പെടുന്ന കൂട്ടത്തില്‍ ആര്യാടനും രക്ഷപ്പെടുകയായിരുന്നു. വര്‍ഷങ്ങള്‍ക്ക് ശേഷമാണ് കേസ് വീണ്ടും പൊങ്ങുന്നത്.
https://www.facebook.com/Malayalivartha
