സംസ്ഥാനത്ത് ശക്തമായ മഴ തുടരുമ്പോൾ രക്ഷാപ്രവർത്തനത്തിന് കേരളത്തിന്റെ സൈന്യവും പത്തനംതിട്ടയിൽ എത്തി. മഴ നാശം വിതച്ച പത്തനംതിട്ടയിൽ കൊല്ലത്ത് നിന്നുള്ള മത്സ്യത്തൊഴിലാളികളാണ് രക്ഷാപ്രവർത്തനത്തിന് എത്തിയത്. കൊല്ലത്ത് നിന്ന് ഏഴ് വള്ളങ്ങളിലായി 21 അംഗ സംഘമാണ് രക്ഷാപ്രവർത്തനത്തിനായി പുലർച്ചെ അഞ്ച് മണിയോടെ പത്തനംതിട്ടയിലെത്തിയത്. മഴക്കെടുതി രൂക്ഷമായ ആറന്മുള, പന്തളം, റാന്നി പ്രദേശങ്ങളിലാണ് സംഘം രക്ഷാപ്രവർത്തനം നടത്തുക.

രാത്രി 12 മണിയോടെയാണ് കൊല്ലം ഹാര്‍ബറുകളില്‍ നിന്ന് ലോറികളില്‍ വള്ളം കയറ്റി പുറപ്പെട്ടത്. ആറന്‍മുള, പന്തളം, റാന്നി എന്നീ സ്ഥലങ്ങളിലേക്കാണ് ഇവരെ വിളിച്ചത്. പുലര്‍ച്ചെ അഞ്ച് മണിയോടെ മല്‍സ്യത്തൊഴിലാളികള്‍ പത്തനംതിട്ടയിലെത്തി. വെള്ളക്കെട്ടുകള്‍ കുറവാണെന്ന് സംഘത്തിലുള്ളവര്‍ പ്രതികരിച്ചു.