വെള്ളം തുറന്നുവിടുമ്പോഴും ഷട്ടര്‍ ഉയര്‍ത്തിയപ്പോഴും തമിഴ്‌നാട് അറിയിച്ചില്ല... മുല്ലപ്പെരിയാര്‍ ഡാമിന്റെ ഷട്ടറുകള്‍ മുന്നറിയിപ്പില്ലാതെ തുറന്ന തമിഴ്‌നാടിന്റെ നടപടി പ്രതിഷേധാര്‍ഹമെന്ന് മന്ത്രി റോഷി അഗസ്റ്റിന്‍...
മുല്ലപ്പെരിയാര്‍ ഡാമിന്റെ ഷട്ടറുകള്‍ മുന്നറിയിപ്പില്ലാതെ തുറന്ന തമിഴ്‌നാടിന്റെ നടപടി പ്രതിഷേധാര്‍ഹമെന്ന് മന്ത്രി റോഷി അഗസ്റ്റിന്‍. വെള്ളം തുറന്നുവിടുമ്പോഴും ഷട്ടര്‍ ഉയര്‍ത്തിയപ്പോഴും തമിഴ്‌നാട് അറിയിച്ചില്ല.
ഒരു സര്‍ക്കാരില്‍നിന്ന് പ്രതീക്ഷിക്കാത്ത നടപടിയാണ് തമിഴ്‌നാടിന്റെ ഭാഗത്തുനിന്ന് ഉണ്ടായത്. മുഖ്യമന്ത്രിയുമായി വിഷയം സംസാരിച്ചു. മുഖ്യമന്ത്രി തമിഴ്‌നാടുമായി നേരിട്ട് സംസാരിക്കാമെന്ന് അറിയിച്ചിട്ടുണ്ട്.
തമിഴ്‌നാടിന്റെ നടപടിക്കെതിരേ സുപ്രീം കോടതിയില്‍ പരാതി നല്‍കുമെന്നും റോഷി വ്യക്തമാക്കി. റൂള്‍ കര്‍വ് പാലിക്കാത്ത തമിഴ്‌നാട് നടപടി കോടതിയലക്ഷ്യമാണ്.
ജലനിരപ്പ് 142 അടി എത്താന്‍ കാത്തിരിക്കരുതെന്നും നേരത്തേ തുറക്കാന്‍ നടപടി വേണമെന്നും കോടതിയില്‍ ആവശ്യപ്പെടുമെന്നും റോഷി പറഞ്ഞു.
അതേസമയം, മുല്ലപ്പെരിയാര്‍ ഡാം മുന്നറിയിപ്പില്ലാതെ തുറന്നുവിട്ടതോടെ നാട്ടുകാര്‍ പ്രതിഷേധവുമായി രംഗത്തെത്തിയിരിക്കുകയാണ്. പുലര്‍ച്ചെ പത്ത് സ്പില്‍വേ ഷട്ടറുകള്‍ അറുപത് സെ.മീ വീതം ഉയര്‍ത്തിയതിനു പിന്നാലെ പെരിയാറില്‍ വലിയ ജലപ്രവാഹം ഉണ്ടായി.
പെരിയാറിന്റെ തീരത്തെ നിരവധി വീടുകളില്‍ വെള്ളം കയറി. വള്ളക്കടവ് ഭാഗത്തെ പത്ത് വീടുകളിലാണ് വെള്ളം കയറിയത്. രാത്രിയില്‍ ഉറങ്ങുന്ന സമയമായിരുന്നതിനാല്‍ വെള്ളം ഇരച്ചെത്തിയത് പലരും അറിഞ്ഞില്ല. ഇത് ജനങ്ങളില്‍ പരിഭ്രാന്തി സൃഷ്ടിച്ചു. രാത്രിയില്‍ പെരിയാറില്‍ കുളിക്കാനിറങ്ങിയ ആളാണ് ജലനിരപ്പ് ഉയരുന്നതുകണ്ട് നാട്ടുകാര്‍ക്ക് മുന്നറിയിപ്പ് നല്‍കിയത്.
ഏഴടിയോളം വെള്ളം പെട്ടെന്ന് ഉയര്‍ന്നു. ഇതോടെ ജനം പരിഭ്രാന്തരായി തടിച്ചുകൂടി. പുലര്‍ച്ചെ മുന്നറിയിപ്പുമായെത്തിയ അനൗണ്‍സ്മെന്റ് വാഹനം നാട്ടുകാര്‍ തടഞ്ഞു. രാത്രി ഉറങ്ങിക്കിടക്കുമ്പോള്‍ വെള്ളം തുറന്നു വിട്ടിട്ട് ജാഗ്രത പാലിക്കണമെന്ന് പറഞ്ഞാല്‍ കുട്ടികളും പ്രായമായവരെയും കൊണ്ട് എവിടെപ്പോകുമെന്ന് നാട്ടുകാര്‍ ചോദിക്കുന്നു. കൊട്ടാരക്കര- ദിണ്ഡിഗല്‍ ദേശീയപാത നാട്ടുകാര്‍ ഉപരോധിച്ചു.
https://www.facebook.com/Malayalivartha
