ദുരൂഹ സാഹചര്യത്തില്‍ വീടിനുള്ളില്‍ പൊള്ളലേറ്റ നിലയില്‍ കാണപ്പെട്ട വീട്ടമ്മ മരിച്ചു..... മരിക്കുന്നതിന് മുമ്പ് തന്നെ ശല്യപ്പെടുത്തിയ യുവാവിന്റെ പേര് ബന്ധുക്കളോട് പറഞ്ഞു, അസ്വാഭാവിക മരണത്തിന് കേസെടുത്ത് പോലീസ്.

നായരമ്പലം ഭഗവതി ക്ഷേത്രത്തിനു കിഴക്ക് തെറ്റയില്‍ പരേതനായ സാജുവിന്റെ ഭാര്യ സിന്ധുവാണ് (42) മരിച്ചത്. അമ്മയോടൊപ്പം പൊള്ളലേറ്റ മകന്‍ അതുല്‍ (17) ഗുരുതരാവസ്ഥയില്‍ തുടരുകയാണ്.

ഇന്നലെ പുലര്‍ച്ചെ വീട്ടിനുള്ളില്‍ വച്ചാണ് ഇരുവര്‍ക്കും പൊള്ളലേറ്റത്. വീടിനുള്ളില്‍ നിന്നു പുക ഉയരുന്നതു കണ്ട് എത്തിയ സമീപവാസികളും ബന്ധുക്കളും ചേര്‍ന്ന് വീടിന്റെ വാതില്‍ ചവിട്ടിപ്പൊളിച്ച് അകത്തു കടന്നാണ് ഇരുവരെയും രക്ഷിച്ചത്.

ഉടന്‍ തന്നെ ആശുപത്രിയില്‍ പ്രവേശിപ്പിക്കുകയും ചെയ്തു. എന്നാല്‍ സിന്ധുവിന്റെ ജീവന്‍ രക്ഷിക്കാനായില്ല. ഇരുവര്‍ക്കും പൊള്ളലേറ്റത് എങ്ങനെ എന്ന കാര്യത്തില്‍ വിശദമായ അന്വേഷണം നടന്നു വരികയാണ്.

അതേസമയം, രക്ഷാപ്രവര്‍ത്തനത്തിനിടെ സംഭവത്തിനു പിന്നില്‍ ആരാണെന്ന് ബന്ധുക്കള്‍ ചോദിക്കുമ്പോള്‍ വീട്ടമ്മ ഒരു യുവാവിന്റെ പേരു പറയുന്ന ശബ്ദരേഖ പ്രചരിച്ചിട്ടുണ്ട്. ബന്ധുക്കള്‍ ഇത് പൊലീസില്‍ ഹാജരാക്കുകയും ചെയ്തു.

ശല്യം ചെയ്യുന്നുവെന്നാരോപിച്ച് ഈ യുവാവിനെതിരെ വീട്ടമ്മ പൊലീസില്‍ പരാതി നല്‍കുകയും പൊലീസ് കേസ് രജിസ്റ്റര്‍ ചെയ്യുകയും ചെയ്തിരുന്നു.സംഭവം കൊലപാതകമാണെന്ന് ബന്ധുക്കള്‍ ആരോപിക്കുന്നുണ്ടെങ്കിലും കൂടുതല്‍ അന്വേഷണം ആവശ്യമാണെന്നും അസ്വാഭാവിക മരണത്തിനു കേസെടുത്തതായും പൊലീസ് പറഞ്ഞു.

ആലുവയില്‍ നിന്ന് ഫൊറന്‍സിക് വിദഗ്ദ്ധര്‍ എത്തി വീട്ടില്‍ പരിശോധന നടത്തി. മുറിയില്‍ നിന്നും സാമ്പിളുകള്‍ ശേഖരിച്ചു. തീപ്പെട്ടി മുറിയില്‍ നിന്നും കണ്ടെത്തിയിട്ടുണ്ട്.
എറണാകുളം ലൂര്‍ദ് ആശുപത്രിയിലെ ജീവനക്കാരിയാണ് സിന്ധു. മൃതദേഹം പോസ്റ്റ് മോര്‍ട്ടത്തിനായി കളമശ്ശേരി മെഡിക്കല്‍ കോളേജിലേക്ക് മാറ്റി.