ആശങ്കമാറാതെ ലോകം... ബിപിന് റാവത്തിന്റെ മരണത്തിനിടയാക്കിയ കാരണങ്ങള് തേടുമ്പോള് അപകടത്തിന് പിന്നില് അമേരിക്കയെന്ന് ചൈനീസ് മാധ്യമം; റഷ്യ ഇന്ത്യ ആയുധ ഇടപാട് സംബന്ധിച്ചുള്ള അമേരിക്കയുടെ നിലപാടിന്റെ പശ്ചാത്തലത്തിലാണ് ചൈനീസ് മാധ്യമത്തിന്റെ വരവ്
സംയുക്ത സൈനിക തലവന് ബിപിന് റാവത്തിന്റെ മരണത്തിനിടയാക്കിയ ഹെലികോപ്ടര് അപകടത്തിന്റെ കാരണം അന്വേഷിക്കാന് പല ഏജന്സികള് പരിശോധന നടത്തുകയാണ്. ലോകത്ത് തന്നെ പല രാജ്യങ്ങളിലും ഇതിന്റെ കാരണങ്ങളന്വേഷിച്ച് ചര്ച്ചകള് നടക്കുകയാണ്.
അതിനിടെ ഇതിന് പിന്നില് അമേരിക്ക എന്ന ആരോപണവുമായി ചൈനീസ് മാധ്യമം. റഷ്യ ഇന്ത്യ ആയുധ ഇടപാട് സംബന്ധിച്ചുള്ള അമേരിക്കയുടെ നിലപാടിന്റെ പശ്ചാത്തലത്തിലാണ് ചൈനീസ് മാധ്യമായ ഗ്ലോബല് ടൈംസിന്റെ ട്വീറ്റ്. എഴുത്തുകാരനും സ്ട്രാറ്റജിസ്റ്റുമായ ബ്രഹ്മ ചെല്നിയുടെ ട്വീറ്റ് ഉദ്ധരിച്ചു കൊണ്ടായിരുന്നു ചൈനീസ് മാധ്യമത്തിന്റെ ആരോപണം. റഷ്യയുമായുള്ള ആയുധ ഇടപാടില് അമേരിക്ക ഉയര്ത്തിയ ആശങ്കയാണ് ആരോപണം ബലപ്പെടുത്താനുള്ള തെളിവായി ചൈന ഉയര്ത്തിക്കാണിക്കുന്നത്.
റാവത്തിന്റെ മരണത്തിനിടയാക്കിയ ഹെലികോപ്ടര് അപകടവും കഴിഞ്ഞവര്ഷം തായ്വാന് ചീഫ് ജനറലിന്റെ മരണത്തിനിടയാക്കിയ ഹെലികോപ്ടര് അപകടവും തമ്മില് സാമ്യമുണ്ടെന്നാണ് ചെല്ലിനിയുടെ അഭിപ്രായം. അന്നത്തെ അപകടത്തില് ചീഫ് ജനറല് അടക്കം ഏട്ട് പേരാണ് കൊല്ലപ്പെട്ടത്.
രാജ്യത്തെ സൈനിക, പ്രതിരോധ രംഗത്തുള്ള പ്രമുഖരെയാണ് രണ്ട് അപകടങ്ങളിലൂടെയും നഷ്ടമായത്. അതുകൊണ്ടാണ് അപകടങ്ങള്ക്ക് പിന്നില് അമേരിക്കയുടെ കൈയുണ്ടെന്ന് ചെല്നി വാദിക്കുന്നത്. അദ്ദേഹത്തിന്റെ ട്വീറ്റ് പങ്കുവച്ചുകൊണ്ടാണ് ഗ്ലോബല് ടൈംസ് രംഗത്തെത്തിയിരിക്കുന്നത്.
അതേസമയം, അപകടത്തിന് ഇടയാക്കിയ കാരണങ്ങളെക്കുറിച്ചുള്ള അന്വേഷണം പുരോഗമിക്കുകയാണ്. ഇപ്പോഴും വ്യക്തമായ കാരണം എന്താണെന്ന് കണ്ടെത്താനായിട്ടില്ല. മോശം കാലാവസ്ഥയാണ് അപകടത്തിന് ഇടയാക്കിയതെന്നാണ് കരുതുന്നത്. ഹെലികോപ്ടറിന്റെ ബ്ളാക്ക്ബോക്സ് ഉള്പ്പടെ വിശദ പരിശോധനയ്ക്ക് വിധേയമാക്കിയാലേ ഇക്കാര്യത്തില് വ്യക്തത വരൂ.
ഇന്ത്യയുടെ ആദ്യ സംയുക്ത സൈനിക മേധാവി ബിപിന് റാവത്തിന്റെ നിര്യാണത്തില് ഞെട്ടല് രേഖപ്പെടുത്തി ലോകരാജ്യങ്ങള് രംഗത്തെത്തി. അമേരിക്ക, ബ്രിട്ടണ്, ഫ്രാന്സ്, റഷ്യ, യു.എ.ഇ തുടങ്ങിയ നിരവധി ലോക രാജ്യങ്ങള് സംഭവത്തില് അനുശോചിച്ചു.
ബിപിന് റാവത്തിന്റെ അപ്രതീക്ഷിത വിയോഗത്തില് ദുഃഖിക്കുന്നതായി യു.എസ് പ്രതിരോധ സെക്രട്ടറി ലോയിഡ് ജെ ഓസ്റ്റിന് പ്രതികരിച്ചു. ബിപിന് റാവത്തിന്റെ വിയോഗം തീരാ നഷ്ടമാണെന്ന് യു.എസ് സ്റ്റേറ്റ് സെക്രട്ടറി ആന്റണി ബ്ലിങ്കന് പ്രതികരിച്ചു. ഇന്ത്യയും റഷ്യയും തമ്മിലുള്ള ഉഭയകക്ഷി ബന്ധം ശക്തിപ്പെടുത്തുന്നതില് നിര്ണായക പങ്ക് വഹിച്ചയാളായിരുന്നു ബിപിന് റാവത്തെന്ന് ഇന്ത്യയിലെ റഷ്യന് അംബാസിഡര് നിക്കോളായ് കുദാഷേവ് ട്വിറ്ററില് കുറിച്ചു.
അടുത്ത സുഹൃത്തിനെയാണ് നഷ്ടമായതെന്നും ഇന്ത്യയുടെ ദുഃഖത്തില് പങ്കുചേരുന്നുവെന്നും അദ്ദേഹം പറഞ്ഞു. ബിപിന് റാവത്തിന്റെ മരണവാര്ത്തയില് അതീവ ദുഃഖം രേഖപ്പെടുത്തുന്നുവെന്ന് മാലിദ്വീപ് പ്രസിഡന്റ് ഇബ്രാഹിം മുഹമ്മദ് സ്വാലിഹ് പറഞ്ഞു. ഹെലികോപ്ടര് അപകടത്തില് അന്തരിച്ച ഇന്ത്യയുടെ സംയുക്ത സൈനിക മേധാവിയും ഭാര്യയും ഉള്പ്പെടെ 13 പേര് മരിച്ച സംഭവത്തില് ഭാരത സര്ക്കാരിനും ജീവന് നഷ്ടമായവരുടെ കുടുംബാംഗങ്ങള്ക്കും അനുശോചനം രേഖപ്പെടുത്തുന്നതായി യു.എ.ഇ വിദേശകാര്യ മന്ത്രാലയം അറിയിച്ചു.
ശ്രീലങ്കന് പ്രധാനമന്ത്രി മഹിന്ദ രജപക്സെ, നേപ്പാള് പ്രധാനമന്ത്രി ഷേര് ബഹാദുര് ദുബ, ഭൂട്ടാന് പ്രധാനമന്ത്രി ലോട്ടെ ഷെറിംഗ്, ഇന്ത്യയിലെ ഫ്രഞ്ച് അംബാസഡര് ഇമ്മാനുവല് ലെനൈന്, ഇസ്രായേല് പ്രതിരോധ മന്ത്രി ബെന്നി ഗന്റ്സ് തുടങ്ങിയവരും അനുശോചനം രേഖപ്പെടുത്തി.
"
https://www.facebook.com/Malayalivartha