വിവിധ ആവശ്യങ്ങള്‍ ഉന്നയിച്ച് ഡിസംബര്‍ 21 മുതല്‍ ബസുടമകളുടെ സംയുക്ത സമരസമിതി പ്രഖ്യാപിച്ചിരുന്ന സ്വകാര്യ ബസ് സമരം മാറ്റിവച്ചു.

ഉന്നയിച്ച വിഷയങ്ങളില്‍ സര്‍ക്കാര്‍ അനുഭാവപൂര്‍ണമായ നിലപാടെടുക്കുമെന്ന സൂചന ലഭിച്ചതോടെയാണ് സമരം മാറ്റാന്‍ തീരുമാനിച്ചതെന്ന് സമരസമിതി നേതാക്കള്‍ അറിയിച്ചു. നേതാക്കള്‍ രാവിലെ ഗൂഗിള്‍ മീറ്റ് വഴി യോഗം ചേര്‍ന്നിരുന്നു.

മിനിമം ചാര്‍ജ് 12 രൂപയാക്കുക, വിദ്യാര്‍ഥികളുടെ ബസ്ചാര്‍ജ് മിനിമം ആറു രൂപയാക്കുക, ഡിസംബര്‍ 31 വരെയുള്ള റോഡ് ടാക്‌സ് ഒഴിവാക്കുക തുടങ്ങിയ ആവശ്യങ്ങളുന്നയിച്ചാണ് സംയുക്ത സമരസമിതി പണിമുടക്ക് പ്രഖ്യാപിച്ചിരുന്നത്.

അതേസമയം ക്രിസ്മസ് അടുത്തിരിക്കേ പണിമുടക്കിലേക്ക് പോകുന്നത് പൊതുജനത്തിന് ബുദ്ധിമുട്ടാകും എന്ന കാര്യവും സമരസമിതി പരിഗണിച്ചുവെന്നാണ് നേതാക്കള്‍ അറിയിച്ചത്.