അപ്രതീക്ഷിതമായി ഭാഗ്യം കൈവന്നതിന്റെ അമ്ബരപ്പിലും ആഹ്ലാദത്തിലുമാണ് കോട്ടയം കുടയംപടി സ്വദേശി സദന്‍. ഇന്ന് ഉച്ചക്ക് രണ്ട് മണിക്ക് നറുക്കെടുത്ത ക്രിസ്തുമസ് പുതുവത്സര ബമ്പറിലൂടെ 12 കോടിയാണ് സദാനന്ദന്‍ എന്ന സദന് സ്വന്തമായിരിക്കുന്നത്. അതും ഇന്ന് രാവിലെ എടുത്ത ടിക്കറ്റിലൂടെ. തീര്‍ത്തും അപ്രതീക്ഷിതമായാണ് സമ്മാനാര്‍ഹമായ ടിക്കറ്റ് ഇദ്ദേഹത്തിന്റെ കൈയ്യിലെത്തുന്നത്. പെയിന്റിംഗ് തൊഴിലാളിയാണ് സദന്‍.

രാവിലെ പത്ത് മണിയോടെ സാധനങ്ങള്‍ വാങ്ങാനായി കടയില്‍ പോയതായിരുന്നു സദന്‍. പോകുംനേരം ഭാര്യ രാജമ്മ ലോട്ടറി എടുക്കുന്ന കാര്യം സദനോട് പറഞ്ഞിരുന്നു. എന്നാല്‍ കയ്യില്‍ കാശില്ലെന്ന് പറഞ്ഞായിരുന്നു സദന്‍ വീടുവിട്ടിറങ്ങിയത്. വഴിയില്‍ വച്ച് സുഹൃത്തായ ശെല്‍വന്‍ എന്ന ലോട്ടറി വില്‍പനക്കാരനെ കാണുകയും സാധനം വാങ്ങാന്‍ വച്ചിരുന്ന 500 രൂപയില്‍ നിന്ന് 300രൂപ കൊടുത്ത് ടിക്കറ്റ് എടുക്കുകയുമായിരുന്നു.

'തിരഞ്ഞ് നോക്കി ടിക്കറ്റ് എടുക്കാറില്ല. ശെല്‍വനെ കണ്ടപ്പോള്‍ ഏതേലും ഒരു ടിക്കറ്റ് തരാന്‍ ആവശ്യപ്പെട്ടു. വില്‍ക്കാന്‍ ബാക്കിയുണ്ടായിരുന്ന ടിക്കറ്റുകളില്‍ ഒന്ന് അദ്ദേഹം തരികയായിരുന്നു',സദന്‍ പറയുന്നു. സ്ഥിരമായി ലോട്ടറി എടുക്കുന്ന ആളല്ല താനെന്നും എന്നാല്‍ ഇക്കുറി ക്രിസ്മസ് ബമ്ബര്‍ എടുക്കണമെന്ന് കരുതിയിരുന്നുവെന്നും സദന്‍ കൂട്ടിച്ചേര്‍ത്തു.